ಮುಂಬಯಿ : ಐಪಿಎಲ್ ಅತ್ಯಂತ ಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ಕ್ರಿಕೆಟ್ ಲೀಗ್. ಹೀಗಾಗಿ ಟಿವಿ ಹಾಗೂ ಲೈವ್ ಸ್ಟ್ರೀಮಿಂಗ್ ಮೂಲಕ ಕೋಟ್ಯಂತರ ವೀಕ್ಷಣೆ ಕಾಣುತ್ತದೆ. ಇದೇ ಕಾರಣಕ್ಕೆ ಕಳೆದ ವರ್ಷ ನಡೆದ ನೇರಪ್ರಸಾರದ ಹಕ್ಕುಗಳ ವಿತರಣೆಯಲ್ಲಿ ಬಿಸಿಸಿಐ 48,390 ರೂಪಾಯಿಗಳನ್ನು ಆದಾಯ ಸಂಗ್ರಹ ಮಾಡಿತ್ತು. ಏಳು ವರ್ಷಗಳ ಅವಧಿಗೆ ಟಿವಿ ಹಾಗೂ ಲೈವ್ ಸ್ಟ್ರೀಮಿಂಗ್ ಹಕ್ಕುಗಳನ್ನು ವಿತಣೆ ಮಾಡಿತ್ತು. ಅದರಲ್ಲಿ 23575 ಕೋಟಿ ರೂಪಾಯಿಗಳನ್ನು ರಿಲಯನ್ಸ್ ಒಡೆತನದ ವಯಾಕಾಮ್18 ಲೈವ್ ಸ್ಟ್ರೀಮಿಂಗ್ ಹಕ್ಕನ್ನು ಪಡೆಯಲು ವಿನಿಯೋಗ ಮಾಡಿತ್ತು. ಭಾರತದ ಬೃಹತ್ ಮೊಬೈಲ್ ನೆಟ್ವರ್ಕ್ ಸೇವಾದಾರ ಕಂಪನಿಯಾಗಿರುವ ರಿಲಯನ್ಸ್, ಈ ಬಾರಿ ಭಾರತೀಯ ಕ್ರಿಕೆಟ್ ಅಭಿಮಾನಿಗಳಿಗೆ ಐಪಿಎಲ್ ಉಚಿತ ವೀಕ್ಷಣೆಯ ಅವಕಾಶವನ್ನು ಕಲ್ಪಿಸಲಿದೆ ಎಂದು ಹೇಳಲಾಗುತ್ತಿದೆ.
ವಯಾಕಾಮ್ 18 ಸಂಸ್ಥೆಯು ನವೆಂಬರ್ನಲ್ಲಿ ಕತಾರ್ನಲ್ಲಿ ನಡೆದ ಫಿಫಾ ವಿಶ್ವ ಕಪ್ ಅನ್ನು ಜಿಯೊ ಸಿನಿಮಾ ಆ್ಯಪ್ ಮೂಲಕ ಭಾರತೀಯ ಗ್ರಾಹಕರಿಗೆ ಉಚಿತವಾಗಿ ನೀಡಿತ್ತು. ಈ ಸೇವೆಯ ಮೂಲಕ ಜಿಯೊ ಸಿನಿಮಾ ಸಾಕಷ್ಟು ಜನಪ್ರಿಯತೆ ಪಡೆಯಿತು. ಇದೇ ಮಾದರಿಯಲ್ಲಿ ಮುಂದಿನ ಐಪಿಎಲ್ ಪಂದ್ಯಗಳನ್ನು ಉಚಿತವಾಗಿ ಪ್ರಸಾರ ಮಾಡಲು ವಯಾಕಾಮ್ ಕಂಪನಿ ಮುಂದಾಗಿದೆ ಎನ್ನಲಾಗಿದೆ.
ಒಂದು ವೇಳೆ ವರದಿ ಸರಿಯಾಗಿದ್ದರೆ ಐಪಿಎಲ್ ಪಂದ್ಯಗಳು ಮೊಟ್ಟ ಮೊದಲ ಬಾರಿಗೆ ಉಚಿತವಾಗಿ ಲೈವ್ ಸ್ಟ್ರೀಮಿಂಗ್ ಆಗಲಿದೆ. ಈ ಮೂಲಕ ತನ್ನ ಪ್ರತಿಸ್ಪರ್ಧಿ ಹಾಗೂ ಟಿವಿ ನೇರ ಪ್ರಸಾರದ ಹಕ್ಕುಗಳನ್ನು ಪಡೆದಿರುವ ಡಿಸ್ನಿ ಹಾಟ್ ಸ್ಟಾರ್ಗೆ ಸೆಡ್ಡು ಹೊಡೆಯಲಿದೆ.
ಕಳೆದ ಮೂರು ವರ್ಷ ಕೊರೊನಾ ಕಾರಣಕ್ಕೆ ಐಪಿಎಲ್ ಕಳೆಗುಂದಿತ್ತು. ಇದೀಗ ಸೋಂಕಿನ ಪ್ರಮಾಣ ಇಳಿಕೆಯಾಗಿದೆ. ಹೀಗಾಗಿ 10 ತಂಡಗಳ ಐಪಿಎಲ್ ಅದ್ಧೂರಿಯಾಗಿ ನಡೆಯಲಿದೆ. ಇದೇ ವೇಳೆ ಉಚಿತವಾಗಿ ಪಂದ್ಯ ವೀಕ್ಷಣೆಯ ಅವಕಾಶ ಸಿಕ್ಕರೆ ಜನಪ್ರಿಯತೆಯ ಮಟ್ಟ ಇನ್ನೂ ಹೆಚ್ಚಾಗಲಿದೆ.
ಇದನ್ನೂ ಓದಿ | Rishabh Pant | 16ನೇ ಆವೃತ್ತಿಯ ಐಪಿಎಲ್ನಿಂದ ರಿಷಭ್ ಪಂತ್ ಔಟ್; ಖಚಿತಪಡಿಸಿದ ಡೆಲ್ಲಿ ಕ್ಯಾಪಿಟಲ್ಸ್‌!