ಮುಂಬಯಿ : ಯುವ ಬೌಲರ್ ಶಿವಂ ಮಾವಿ ಹಾಗೂ ಆರಂಭಿಕ ಬ್ಯಾಟರ್ ಶುಬ್ಮನ್ ಗಿಲ್ ಮಂಗಳವಾರ ನಡೆದ ಶ್ರೀಲಂಕಾ ವಿರುದ್ಧದ (IndvsSL) ಟಿ20 ಸರಣಿಯಲ್ಲಿ ಭಾರತ ತಂಡದ ಪರ ಪದಾರ್ಪಣೆ ಮಾಡಿದ್ದಾರೆ. ಟಾಸ್ಗೆ ಮೊದಲು ಕೋಚ್ ರಾಹುಲ್ ದ್ರಾವಿಡ್ ಹಾಗೂ ನಾಯಕ ಹಾರ್ದಿಕ್ ಪಾಂಡ್ಯ ಅವರು ಈ ಇಬ್ಬರು ಆಟಗಾರರಿಗೆ ಕ್ಯಾಪ್ ಹಸ್ತಾಂತರ ಮಾಡಿದರು. ಈ ವೇಳೆ ಮಾವಿಗೆ 100 ಸಂಖ್ಯೆ ಇರುವ ಕ್ಯಾಪ್ ಕೊಟ್ಟರೆ, ಗಿಲ್ಗೆ 101 ಸಂಖ್ಯೆಯನ್ನು ನೀಡಲಾಯಿತು.
ಈ ಇಬ್ಬರು ಪ್ರತಿಭಾವಂತ ಆಟಗಾರರಿಗೆ ಅನುಕ್ರಮವಾಗಿ ಈ ಎರಡು ಸಂಖ್ಯೆಗಳನ್ನು ಕೊಡುವುದಕ್ಕೆ ಕಾರಣ ಏನು ಎಂಬ ಪ್ರಶ್ನೆಗಳು ಇಂಟರ್ನೆಟ್ನಲ್ಲಿ ಹರಿದಾಡಿದವು. ಬಳಿಕ ಕೆಲವರು ಇದಕ್ಕೆ ಉತ್ತರಗಳನ್ನು ಕೊಟ್ಟರು. ಟೀಮ್ ಇಂಡಿಯಾದ ಪರ ಒಂದೇ ಸಲ ಇಬ್ಬರು ಆಟಗಾರರು ಪದಾರ್ಪಣೆ ಮಾಡುವುದಾದರೆ ಹೆಸರಿನ ಇಂಗ್ಲಿಷ್ ಅಕ್ಷರಗಳ ಪ್ರಕಾರ ಸಂಖ್ಯೆಯನ್ನು ನೀಡಲಾಗುತ್ತದೆ. ಅಂದರೆ (Shivam) ಹೆಸರು (Shubman) ಅವರಿಗಿಂತ ಮುಂದೆ ಬರುತ್ತದೆ. ಇವರಿಬ್ಬರ ಹೆಸರಿನ ಮೊದಲೆರಡು ಅಕ್ಷರಗಳೂ (SH) ಆಗಿದ್ದರೂ ಮೂರನೇ ಅಕ್ಷರಕ್ಕೆ ಬಂದಾಗ ಶಿವಂ ಅವರ (I) ಶುಬ್ಮನ್ ಅವರ (U) ಗಿಂತ ಮೊದಲು ಬರುತ್ತದೆ. ಹೀಗಾಗಿ ಮಾವಿಗೆ 100ನೇ ಸಂಖ್ಯೆ ಲಭಿಸಿದೆ.
ಕ್ರಿಕೆಟ್ನಲ್ಲಿ ಟೋಪಿ ಸಂಖ್ಯೆಯ ಮೂಲಕ ಆ ತಂಡದ ಪರ ಎಷ್ಟು ಮಂದಿ ಇದುವರೆಗೆ ಆಡಿದ್ದಾರೆ ಎಂಬುದನ್ನು ಪತ್ತೆ ಗುರುತಿಸಬಹುದು. ಅಂದರೆ ಶಿವಂ ಅವರು ಟೀಮ್ ಇಂಡಿಯಾ ಪರ ಟಿ20 ಮಾದರಿಗೆ ಪದಾರ್ಪಣೆ ಮಾಡಿರುವ 100ನೇ ಆಟಗಾರ ಹಾಗೂ ಗಿಲ್ 101ನೆಯವರು.
ಇದನ್ನೂ ಓದಿ | INDvsSL | ಶಿವಂ ಮಾವಿ, ಶುಬ್ಮನ್ ಗಿಲ್ ಟಿ20 ಮಾದರಿಗೆ ಎಂಟ್ರಿ, ಅರ್ಶ್ದೀಪ್ ಸಿಂಗ್ ಅಲಭ್ಯ