ಕೇಪ್ಟೌನ್: ಜ್ವರದಿಂದ ಬಳಲುತ್ತಿದ್ದ ನಡುವೆಯೂ ನಾಯಕಿ ಹರ್ಮನ್ಪ್ರೀತ್ ಕೌರ್ ಪ್ರದರ್ಶಿಸಿದ ದಿಟ್ಟ ಬ್ಯಾಟಿಂಗ್ ಹೊರತಾಗಿಯೂ ಭಾರತ ತಂಡ ಮಹಿಳೆಯರ ಟಿ20 ವಿಶ್ವ ಕಪ್(Women’s T20 World Cup) ಸೆಮಿಫೈನಲ್ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ 5 ರನ್ಗಳ ಸೋಲು ಕಂಡು ವಿಶ್ವ ಕಪ್ ಅಭಿಯಾನ ಅಂತ್ಯಗೊಳಿಸಿದೆ.
ಸೋಲಿನ ಬಳಿಕ ಭಾವುಕರಾದ ನಾಯಕಿ ಹರ್ಮನ್ಪ್ರೀತ್ ಕೌರ್(Harmanpreet Kaur) ಕಣ್ಣೀರು ಸುರಿಸುತ್ತಾ ಡ್ರೆಸಿಂಗ್ ರೋಮ್ಗೆ ತೆರಳುತ್ತಿದ್ದರು. ಇದೇ ವೇಳೆ ಕೌರ್ ಬಳಿ ಧಾವಿಸಿದ ಟೀಮ್ ಇಂಡಿಯಾದ ಮಾಜಿ ನಾಯಕಿ ಅಂಜುಮ್ ಚೋಪ್ರಾ(Anjum Chopra) ಅವರು ಕೌರ್ ಅವರನ್ನು ತಬ್ಬಿಕೊಂಡು ಸಂತೈಸಿ ಧೈರ್ಯ ತುಂಬಿದ್ದಾರೆ. ಈ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಕೌರ್ ಅವರನ್ನು ಸಮಧಾನ ಪಡಿಸಿದ ಬಳಿಕ ಟಿವಿ ನಿರೂಪಕಿ, ಭಾರತ ಕ್ರಿಕೆಟ್‌ ತಂಡದ ಖ್ಯಾತ ವೇಗಿ ಜಸ್ಪ್ರೀತ್ ಬುಮ್ರಾ ಪತ್ನಿ ಸಂಜನಾ ಗಣೇಶನ್ ಅವರ ಜತೆ ಮಾತನಾಡಿದ ಅಂಜುಮ್ ಚೋಪ್ರಾ, ಈ ಪಂದ್ಯದಲ್ಲಿ ಬಹುಶಃ ಹರ್ಮನ್ಪ್ರೀತ್ ಆಡುವುದು ಅಸಾಧ್ಯವಾಗಿತ್ತು. ಆದರೆ ವಿಶ್ವ ಕಪ್‌ನ ಸೆಮಿಫೈನಲ್ ಪಂದ್ಯವಾಗಿದ್ದರಿಂದ ಅವರು ಆಡಿದ್ದರು. ಅವರ ದಿಟ್ಟ ಹೋರಾಟಕ್ಕೆ ಮೆಚ್ಚಲೇ ಬೇಕು ಎಂದು ಶ್ಲಾಘಿಸಿದರು.
ಇದನ್ನೂ ಓದಿ Women’s T20 World Cup: ಅಂದು ಧೋನಿ, ಇಂದು ಕೌರ್ ರನೌಟ್; ಮತ್ತೊಮ್ಮೆ ಸೆಮಿಯಲ್ಲಿ ಎಡವಿದ ಭಾರತ
‘ಹರ್ಮನ್ಪ್ರೀತ್ ಕೌರ್ ಯಾವತ್ತು ಹಿಂದೆ ಸರಿಯುವವರಲ್ಲ. ಅನಾರೋಗ್ಯದ ನಡುವೆಯೂ ಈ ಪಂದ್ಯಕ್ಕೆ ತನ್ನನ್ನು ತಾನು ಸಿದ್ಧಪಡಿಸಿಕೊಂಡ ರೀತಿ ಎಲ್ಲರಿಗೂ ಮಾದರಿ. ಪಂದ್ಯ ಸೋತರು ಅವರು ದೇಶದ ಮನಗೆದ್ದಿದ್ದಾರೆ. ನಾನು ಅವರ ದುಃಖವನ್ನು ಕಡಿಮೆ ಮಾಡಲು ಮಾತ್ರ ಬಯಸಿದ್ದೆ’ ಎಂದು ಅಂಜುಮ್ ಚೋಪ್ರಾ ಹೇಳಿದರು.