ಮುಂಬಯಿ: ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆಯ(international women’s day) ಪ್ರಯುಕ್ತ ಕ್ರಿಕೆಟ್ ಪ್ರಿಯರಿಗೆ ಬಿಸಿಸಿಐ ಭರ್ಜರಿ ಆಫರ್ ನೀಡಿದೆ. ಮಾರ್ಚ್ 8 ರಂದು ನಡೆಯುವ ಮಹಿಳಾ ಪ್ರೀಮಿಯರ್ ಲೀಗ್ (WPL 2023)ನ ಆರ್ಸಿಬಿ(RCB) ಮತ್ತು ಗುಜರಾತ್ ಜೈಂಟ್ಸ್(gujarat giants) ವಿರುದ್ಧದ ಪಂದ್ಯಕ್ಕೆ ಉಚಿತ ಪ್ರವೇಶ ನೀಡಿದೆ.
ಮಹಿಳಾ ದಿನಾಚರಣೆಯ ಗೌರವಾರ್ಥವಾಗಿ ಆರ್ಸಿಬಿ ಮತ್ತು ಗುಜರಾತ್ ಜೈಂಟ್ಸ್ ಪಂದ್ಯಕ್ಕೆ ಉಚಿತ ಪ್ರವೇಶ ಇರಲಿದೆ ಎಂದು ಬಿಸಿಸಿಐ ತಿಳಿಸಿದೆ. ಈ ಮೂಲಕ ಮಹಿಳಾ ದಿನಾಚರಣೆಯನ್ನು ವಿಶೇಷವಾಗಿ ಆಚರಿಸಲು ವುಮೆನ್ಸ್ ಪ್ರೀಮಿಯರ್ ಲೀಗ್ (WPL 2023) ಮತ್ತು ಬಿಸಿಸಿಐ ನಿರ್ಧರಿಸಿದೆ.
ಈ ಟೂರ್ನಿಗೆ ಈಗಾಗಲೇ ಬಿಸಿಸಿಐ ಮಹಿಳೆಯರಿಗೆ ಉಚಿತ ಟಿಕೆಟ್‌ಗಳನ್ನು ನೀಡುತ್ತಿದೆ. ಆದರೆ ಪುರುಷ ಪ್ರೇಕ್ಷಕರು ಮಾತ್ರ ರೂ. 100 ರಿಂದ 400 ರೂ. ಒಳಗಿನ ಟಿಕೆಟ್ ತೆಗೆದುಕೊಳ್ಳಬೇಕಿತ್ತು. ಇದೀಗ ಅಂತಾರಾಷ್ಟ್ರೀಯ ಮಹಿಳಾ ದಿನದಂದು ಪುರುಷರಿಗೂ ಉಚಿತ ಟಿಕೆಟ್ ಸಿಗಲಿದೆ.
ಇದನ್ನೂ ಓದಿ WPL 2023: ಡೆಲ್ಲಿ ಕ್ಯಾಪಿಟಲ್ಸ್ ಸವಾಲಿಗೆ ಸಜ್ಜಾದ ಯುಪಿ ವಾರಿಯರ್ಸ್
ಈಗಾಗಲೇ ಆಡಿದ 2 ಪಂದ್ಯಗಳನ್ನು ಸೋತಿರುವ ಆರ್ಸಿಬಿ ಮಹಿಳಾ ದಿನಾಚರಣೆಯಂದು ಗೆಲುವಿನ ಶುಭಾರಂಭ ಕಂಡಿತೇ ಎಂದು ಕಾದು ನೋಡಬೇಕಿದೆ. ಎದುರಾಳಿ ಗುಜರಾತ್ ಜೈಂಟ್ಸ್ ಕೂಡ ಆಡಿದ ಎರಡು ಪಂದ್ಯಗಳಲ್ಲಿ ಸೋಲು ಕಂಡಿದೆ. ಒಟ್ಟಾರೆ ಉಭಯ ತಂಡಗಳಿಗೂ ಇದು ಮಹತ್ವದ ಪಂದ್ಯವಾಗಿದೆ.