ಮುಂಬಯಿ: ಮಹಿಳಾ ಪ್ರೀಮಿಯರ್ ಲೀಗ್ನ(WPL 2023) ಭಾನುವಾರದ(ಮಾರ್ಚ್ 5) ಡಬಲ್ ಹೆಡ್ಡರ್ ಹಣಾಹಣಿಯ ದ್ವಿತೀಯ ಪಂದ್ಯದಲ್ಲಿ ಯುಪಿ ವಾರಿಯರ್ಸ್(UP Warriorz) ತಂಡ ಗುಜರಾತ್ ಜೈಂಟ್ಸ್(Gujarat Giants) ವಿರುದ್ಧ ರೋಚಕ ಮೂರು ವಿಕೆಟ್ಗಳ ಗೆಲುವು ಸಾಧಿಸಿ ಟೂರ್ನಿಯಲ್ಲಿ ಶುಭಾರಂಭ ಕಂಡಿದೆ.
ಈ ಪಂದ್ಯದಲ್ಲಿ ಮೂರನೇ ಕ್ರಮಾಂಕದಲ್ಲಿ ಆಡಿದ ಕಿರಣ್ ನವಗಿರೆ(Kiran Navgire) ಅವರು ಅರ್ಧಶತಕ ಸಿಡಿಸಿ ಮಿಂಚಿದರು. ಇದೇ ವೇಳೆ ಅವರು ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರಿಗೆ ವಿಶೇಷ ಗೌರವ ಸೂಚಿಸಿದ್ದಾರೆ.
ಕಿರಣ್ ನವಗಿರೆ ಅವರು ತನ್ನ ಬ್ಯಾಟ್ನ ಹಿಂಭಾಗದಲ್ಲಿ ‘MSD 07’ ಎಂದು ಬರೆದು ಧೋನಿಗೆ ಗೌರವ ಸೂಚಿಸಿದ್ದಾರೆ. ಕಿರಣ್ ನವಗಿರೆ ಅವರ ಬ್ಯಾಟ್ನ ಫೋಟೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಇದನ್ನೂ ಓದಿ WPL 2023 : ಗ್ರೇಸ್ ಹ್ಯಾರಿಸ್ ಅಬ್ಬರ; ಯುಪಿ ತಂಡಕ್ಕೆ ಗುಜರಾತ್ ವಿರುದ್ಧ 3 ವಿಕೆಟ್ ವೀರೋಚಿತ ಜಯ
ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಗುಜರಾತ್ ಜೈಂಟ್ಸ್ ನಿಗದಿತ 20 ಓವರ್ಗಳಲ್ಲಿ 169 ರನ್ ಬಾರಿಸಿತು. ಗುರಿ ಬೆನ್ನಟ್ಟಿದ ಯುಪಿ ವಾರಿಯರ್ಸ್ ಆರಂಭದಲ್ಲಿ 20 ರನ್ ಗೆ ಮೂರು ವಿಕೆಟ್ ಕಳೆದುಕೊಂಡು ಸೋಲಿನತ್ತ ಮುಖ ಮಾಡಿತ್ತು. ಈ ವೇಳೆ ತಂಡಕ್ಕೆ ಆಸರೆಯಾದ ಕಿರಣ್ ನವಗಿರೆ ಆಕರ್ಷಕ ಅರ್ಧಶತಕ ಬಾರಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಅಂತಿಮವಾಗಿ ತಂಡ 19.5 ಓವರ್ಗಳಲ್ಲಿ 7 ವಿಕೆಟ್ಗೆ 175 ರನ್ ಬಾರಿಸಿ ಗೆಲುವು ದಾಖಲಿಸಿತು. 43 ಎಸೆತ ಎದುರಿಸಿದ ಕಿರಣ್ ನವಗಿರೆ ಎರಡು ಸಿಕ್ಸರ್ ಮತ್ತು ಐದು ಬೌಂಡರಿ ಸಹಿತ 53 ರನ್ ಗಳಿಸಿದರು.