ವಾಷಿಂಗ್ಟನ್‌: ಪಾಕಿಸ್ತಾನ ವಿರುದ್ಧದ ಗೆಲುವನ್ನು ಭಾರತದ ಕ್ರಿಕೆಟ್ ತಂಡದ ಅಭಿಮಾನಿಗಳೆಲ್ಲರೂ ಸಂಭ್ರಮಿಸಿದ್ದಾರೆ. ಪಂದ್ಯ ಮುಗಿದು ಒಂದು ದಿನವಾದರೂ ವಿರಾಟ್‌ ಕೊಹ್ಲಿಯ ಪರಾಕ್ರಮದ ಗುಣಗಾನ ಮುಗಿದಿಲ್ಲ. ಸಾಂಪ್ರದಾಯಿಕ ಪ್ರತಿಸ್ಪರ್ಧಿ ಪಾಕಿಸ್ತಾನದ ವಿರುದ್ಧದ ರೋಚಕ ಗೆಲುವು ದಾಖಲಿಸಿರುವುದಕ್ಕೆ ವಿದೇಶದಲ್ಲಿರುವ ಭಾರತ ಮೂಲದ ನಾಗರಿಕರೂ ಶಹಬ್ಬಾಸ್‌ ಹೇಳಿದ್ದಾರೆ. ಅಂತೆಯೇ ಈ ವಿಜಯವನ್ನು ಗೂಗಲ್‌ ಸಿಇಒ ಸುಂದರ್ ಪಿಚೈ ಕೂಡ ಖುಷಿಪಟ್ಟು ಟ್ವೀಟ್‌ ಮಾಡಿದ್ದಾರೆ.
ಸುಂದರ್ ಪಿಚೈ ಅವರು ಭಾರತ ಮೂಲದವರಾಗಿದ್ದು, ಸಹಜವಾಗಿ ಕ್ರಿಕೆಟ್ ಬಗ್ಗೆ ಪ್ರೀತಿ ಬೆಳೆಸಿಕೊಂಡಿರುತ್ತಾರೆ. ಅಂತೆಯೇ ಪಾಕಿಸ್ತಾನದ ವಿರುದ್ಧ ಪಂದ್ಯವೂ ಅವರಿಗೆ ಅತ್ಯಂತ ರೋಚಕವಾಗಿ ಕಂಡು ಬಂದಿದ್ದು, ಆ ಖುಷಿಯನ್ನು ಟ್ವೀಟ್‌ ಮಾಡಿ ತಿಳಿಸಿದ್ದಾರೆ. ಆದರೆ, ಪಾಕಿಸ್ತಾನ ಕೆಲವು ಕ್ರಿಕೆಟ್ ಅಭಿಮಾನಿಗಳು ಅದನ್ನೇ ಟ್ರೋಲ್ ಮಾಡಲು ಮುಂದಾಗಿದ್ದು, ಅವರನ್ನು ಒಂದೇ ವಾಕ್ಯದಲ್ಲಿ ಬಾಯ್ಮುಚ್ಚಿಸಿದ್ದಾರೆ.
ಭಾರತದ ಗೆಲುವನ್ನು ಸುಂದರ್ ಪಿಚೈ ಅವರು ದೀಪಾವಳಿ ಎಂದೇ ಕರೆದಿದ್ದಾರೆ. “ದೀಪಾವಳಿಯ ಶುಭಾಶಯಗಳು. ಎಲ್ಲರೂ ತಮ್ಮ ಕುಟುಂಬ ಹಾಗೂ ಹಿತೈಷಿಗಳೊಂದಿಗೆ ಹಬ್ಬದ ಸಂಭ್ರಮದಲ್ಲಿ ಮುಳುಗಿದ್ದಾರೆ ಎಂದು ಅಂದುಕೊಳ್ಳುವೆ. ಭಾರತ ಹಾಗೂ ಪಾಕಿಸ್ತಾನ ನಡುವಿನ ಪಂದ್ಯದ ಕೊನೇ ಮೂರು ಓವರ್‌ಗಳನ್ನು ನೋಡುವ ಮೂಲಕ ನಾನು ದೀಪಾವಳಿ ಆಚರಿಸಿದ್ದೇನೆ,” ಎಂದು ಅವರು ಟ್ವೀಟ್‌ ಮಾಡಿದ್ದಾರೆ.
ಸುಂದರ್ ಅವರ ಟ್ವೀಟ್‌ ಅನ್ನು ಟ್ರೋಲ್ ಮಾಡಲು ಮುಂದಾಗಿದ್ದಾನೆ. ಅವರಿಗೆ ಪ್ರತಿಕ್ರಿಯಿಸಿ “ನೀವು ಕೊನೆ ಮೂರು ಓವರ್‌ಗಳನ್ನು ಮಾತ್ರ ನೋಡಿದ್ದೀರಿ. ಆದರೆ, ಮೊದಲ ಮೂರು ಓವರ್‌ಗಳನ್ನು ನೋಡಬೇಕಿತ್ತು,” ಎಂದು ಬರೆದಿದ್ದ. ಅದಕ್ಕೆ ಮರು ಉತ್ತರ ಕೊಟ್ಟಿರುವ ಸುಂದರ್ ಅವರು “ಹೌದು, ಮೊದಲ ಮೂರು ಓವರ್‌ಗಳನ್ನು ಕೂಡ ನೋಡಿದ್ದೇನೆ. ಅರ್ಶ್‌ದೀಪ್‌ ಸಿಂಗ್‌ ಹಾಗೂ ಭುವನೇಶ್ವರ್‌ ಕುಮಾರ್‌ ಅವರ ಸ್ಪೆಲ್‌ ಸೂಪರ್‌ ಆಗಿತ್ತು,” ಎಂದು ಹೇಳುವ ಮೂಲಕ ಟ್ರೋಲಿಗನ ಬಾಯಿ ಮುಚ್ಚಿಸಿದ್ದಾನೆ.
ಇದನ್ನೂ ಓದಿ | Team India | ಪಾಕ್‌ ವಿರುದ್ಧ ಗೆದ್ದ ಭಾರತ ತಂಡದ ಕೋಚ್‌ ರಾಹುಲ್‌ ದ್ರಾವಿಡ್‌ ವಿಜಯದ ಸಂಭ್ರಮ ಹೀಗಿತ್ತು