ಬೆಂಗಳೂರು: ರಾಜ್ಯಾದ್ಯಂತ “ಗಂಧದ ಗುಡಿ” ಸದ್ದು ಮಾಡುತ್ತಿದೆ. ಪವರ್‌ ಸ್ಟಾರ್‌ ಪುನೀತ್‌ ರಾಜಕುಮಾರ್‌ ಅವರ ಕೊನೇ ಚಿತ್ರದ ಬಗ್ಗೆ ರಾಜ್ಯದ ಜನ ಹಾಗೂ ಪುನೀತ್‌ ಅಭಿಮಾನಿಗಳು ಭಾವುಕರಾಗಿದ್ದಾರೆ. ಎಲ್ಲೆಡೆ ತುಂಬಿದ ಪ್ರದರ್ಶನ ಕಾಣುತ್ತಿದೆ. ಅಲ್ಲದೆ, ಹಾಲಿನ ಅಭಿಷೇಕ, ಟ್ಯಾಟೂ, ಟೀಶರ್ಟ್‌ ಸೇರಿದಂತೆ ಇನ್ನಿತರ ರೀತಿಯಲ್ಲಿ ತಮ್ಮ ಅಭಿಮಾನವನ್ನು ಅಭಿಮಾನಿಗಳು ಪ್ರದರ್ಶಿಸಿದ್ದಾರೆ. ಇದರ ಬೆನ್ನಲ್ಲೇ ರಾಜ್ಯದ ಬಹುದೊಡ್ಡ ಹಾಲು ಒಕ್ಕೂಟ ಸಂಸ್ಥೆಯಾಗಿರುವ ಕೆಎಂಎಫ್‌ (KMF Nandini Milk) ಪುನೀತ್‌ ರಾಜಕುಮಾರ್‌ ಅವರಿಗೆ ಗೌರವ ಸಮರ್ಪಣೆ ಮಾಡಿದೆ.
ನಂದಿನಿ ಹಾಲಿನ ಪ್ಯಾಕೆಟ್‌ನಲ್ಲಿ “ಗಂಧದ ಗುಡಿ” ಹೆಸರನ್ನು ದಾಖಲಿಸುವ ಮೂಲಕ ಕನ್ನಡಿಗರ ನೆಚ್ಚಿನ ನಾಯಕ ನಟನಿಗೆ ಕೆಎಂಎಫ್‌ ಗೌರವ ಸಮರ್ಪಣೆ ಮಾಡಿದೆ. “ಗಂಧದ ಗುಡಿ- ನಿಜ ನಾಯಕ ನೈಜ ಪಯಣ” (Gandhada Gudi- Journey of true hero) ಎಂದು ಪ್ಯಾಕೆಟ್‌ನ ಒಂದು ಬದಿಯಲ್ಲಿ ಬರೆಯುವ ಮೂಲಕ ಗೌರವವನ್ನು ಸಮರ್ಪಣೆ ಮಡಿದೆ.
೧೫ ದಿನಗಳ ಕಾಲ ಇರಲಿರುವ ಸಾಲು
ಗಂಧದ ಗುಡಿ ಬಗ್ಗೆ ಬರೆದಿರುವ ಈ ಸಾಲು ಶುಕ್ರವಾರದಿಂದ (ಅ. ೨೮) ೧೫ ದಿನಗಳ ಕಾಲ ಇರಲಿದೆ ಎಂದು ಕೆಎಂಎಫ್‌ ಹೇಳಿಕೊಂಡಿದೆ. ಅಲ್ಲದೆ, ಪುನೀತ್‌ ರಾಜಕುಮಾರ್‌ ಅವರಿಗೆ ಇದೇ ನವೆಂಬರ್‌ ೧ರಂದು ಕನ್ನಡ ರಾಜ್ಯೋತ್ಸವದ ಅಂಗವಾಗಿ “ಕರ್ನಾಟಕ ರತ್ನ” ಪ್ರಶಸ್ತಿಯನ್ನು ನೀಡಲಾಗುತ್ತಿದೆ. ಈ ಹಿನ್ನೆಲೆಯಲ್ಲಿಯೂ ಕೆಎಂಎಫ್‌ ವತಿಯಿಂದ ಈ ಗೌರವವನ್ನು ತೋರಲಾಗಿದೆ ಎಂದೂ ಹೇಳಲಾಗಿದೆ.
ಪುನೀತ್‌ ರಾಜಕುಮಾರ್‌ ಅವರು ನಂದಿನ ಹಾಲಿನ ಬ್ರಾಂಡ್ ಅಂಬಾಸಿಡರ್ ಆಗಿದ್ದರು. ಅಲ್ಲದೆ, ಅವರು ಇದಕ್ಕೆ ಯಾವುದೇ ರೀತಿಯ ಸಂಭಾವನೆ ಪಡೆಯದೇ ಇರುವ ಅಪ್ಪು, ಈ ಹಣವನ್ನು ರೈತರ ಅಭ್ಯುದಯಕ್ಕೆ ಬಳಸಿ ಎಂದು ಹೇಳಿಕೆ ನೀಡಿದ್ದರು. ಈ ಮೂಲಕ ರೈತರ ಬಗ್ಗೆಯೂ ಅಪಾರ ಕಾಳಜಿಯನ್ನು ವ್ಯಕ್ತಪಡಿಸಿದ್ದರು.
ಇದನ್ನೂ ಓದಿ | Gandhada Gudi | ಗಂಧದ ಗುಡಿ ಸಿನಿಮಾ ನೋಡಿ ಭಾವುಕರಾದ ಸ್ಯಾಂಡಲ್‌ವುಡ್‌ ತಾರೆಯರು!