ಬೆಂಗಳೂರು: ಸ್ಯಾಂಡಲ್ವುಡ್ ಹಿಟ್ ಸಿನಿಮಾ ಮಿಸ್ಟರ್ & ಮಿಸೆಸ್ ರಾಮಾಚಾರಿಯಲ್ಲಿ (BBK Season 10) ನಟಿಸಿದ್ದ ಅವಳಿ ನಟಿಯರು ಅದ್ವಿತಿ ಮತ್ತು ಅಶ್ವಿತಿಯ (ashvithi shetty) ತಂದೆ ಕೆಲವು ದಿನಗಳ ಹಿಂದೆ ನಿಧನರಾಗಿದ್ದರು. ಯಶ್- ರಾಧಿಕಾ ಪಂಡಿತ್ (Radhika Pandit) ನಟನೆಯ ‘ಮಿಸ್ಟರ್ & ಮಿಸೆಸ್ ರಾಮಾಚಾರಿ’ (Mr & Mrs Ramachari) ಸಿನಿಮಾದಲ್ಲಿ ಅದ್ವಿತಿ ಶೆಟ್ಟಿ ರಾಧಿಕಾ ಸ್ನೇಹಿತೆಯರಾಗಿ ಪಾತ್ರದಲ್ಲಿ ಮಿಂಚಿದ್ದರು. ಅದ್ವಿತಿ ಐರಾವನ್ ಚಿತ್ರದಲ್ಲಿ ಕೂಡ ನಟಿಸಿದ್ದರು. ಇದೀಗ ಈ ಅವಳಿ ಸಹೋದರಿಯರಿಗೆ ಬಿಗ್ ಬಾಸ್‌ ಆಫರ್‌ ಬಂದಿದ್ದು, ಅದ್ವಿತಿ ಶೆಟ್ಟಿ ಮತ್ತು ಅಶ್ವಿತಿ ಶೆಟ್ಟಿ ತಿರಸ್ಕರಿಸಿದ್ದಾರೆ. ಈ ಬಗ್ಗೆ ನಟಿ ಸೋಷಿಯಲ್‌ ಮೀಡಿಯಾ ಮೂಲಕ ಕಾರಣವನ್ನೂ ತಿಳಿಸಿದ್ದಾರೆ.
ನಟಿ ಈ ಬಗ್ಗೆ ಪೋಸ್ಟ್‌ನಲ್ಲಿ ನಟಿ ʻʻಎಲ್ಲರಿಗೂ ನಮಸ್ಕಾರ. ನಾನು ಈ ವರ್ಷ ಬಿಗ್ ಬಾಸ್‌ಗೆ ಹೋಗುತ್ತಿದ್ದೇನೆ ಎಂದು ಸುದ್ದಿಗಳು ಹಬ್ಬಿದ್ದವು ಎಲ್ಲರೂ ನನಗೆ ಮೆಸೇಜ್‌ ಮೂಲಕ ಇದು ನಿಜವೇ? ಎಂದು ಕೇಳಿದ್ದರು. ಸಾಕಷ್ಟು ಮೆಸೇಜ್‌ಗಳು ಬಂದ ಕಾರಣ ಈ ಬಗ್ಗೆ ಸ್ಪಷ್ಟಪಡಿಸಲು ಬಯಸುತ್ತೇನೆ. ನನಗೆ ಮತ್ತು ಅಶ್ವಿತಿ ಇಬ್ಬರಿಗೂ ಕರೆ ಬಂದಿದ್ದು ನಿಜ. ಆದರೆ ನಾವು ಬಿಗ್ ಬಾಸ್‌ ವೇದಿಕೆಯನ್ನು ಗೌರವಿಸುತ್ತೇವೆ. ಯಾವುದೇ ತಯಾರಿ ಇಲ್ಲದೇ ಹೋಗಲು ಬಯಸುವುದಿಲ್ಲ. ಇಂತಹ ವೇದಿಕೆಗೆ ಮಾನಸಿಕವಾಗಿ ಮತ್ತು ದೈಹಿಕವಾಗಿ ಸಿದ್ಧರಾಗಿರುವುದು ತುಂಬ ಮುಖ್ಯ. ಆದರೆ ಕೆಲವು ತಿಂಗಳಿಂದ ಮಾನಸಿಕವಾಗಿ ಮತ್ತು ದೈಹಿಕವಾಗಿ ನಾವು ಸುಸ್ತಾಗಿದ್ದೇವೆ. ನಾವು ನಮ್ಮ ಆರೋಗ್ಯದ ಬಗ್ಗೆ ಗಮನ ಹರಿಸಿಲ್ಲ. ನಮ್ಮ ಏಕೈಕ ಕಾಳಜಿ ನಮ್ಮ ತಂದೆಯ ಆರೋಗ್ಯವಾಗಿತ್ತು. ಆದರೆ ಈಗ ಅವರು ನಮ್ಮೊಂದಿಗೆ ಇಲ್ಲ. ಆ ನೋವು ಇನ್ನೂ ಇದೆ,” ಎಂದು ಅದ್ವಿತಿ ಪೋಸ್ಟ್‌ ಹಂಚಿಕೊಂಡಿದ್ದಾರೆ.
“ಅಮ್ಮನನ್ನು ಬಿಟ್ಟು ಬಿಗ್ ಬಾಸ್‌ಗೆ ಹೋಗುವುದು ನಮಗೆ ಕಠಿಣ ನಿರ್ಧಾರ. ಆದ್ದರಿಂದ ನಾವಿಬ್ಬರು ಈ ಆಫರ್‌ವನ್ನು ಒಪ್ಪಿಕೊಂಡಿಲ್ಲ. ನಮ್ಮ ಈ ನಿರ್ಧಾರಕ್ಕೆ ಬಹಳಷ್ಟು ಮಂದಿ ನಿರಾಸೆಗೊಂಡಿರುವುದು ಗೊತ್ತಿದೆ. ಆದರೆ ನಮ್ಮ ಪರಿಸ್ಥಿತಿ ನೀವೆಲ್ಲರೂ ಅರ್ಥಮಾಡಿಕೊಂಡು ಬೆಂಬಲಿಸುತ್ತೀರಿ ಎಂದು ನಾನು ಭಾವಿಸುತ್ತೇನೆ. ನಾವು ಮಾಡುವ ಎಲ್ಲ ಕೆಲಸಗಳನ್ನು ತಂದೆಗೆ ಅರ್ಪಿಸುತ್ತೇವೆ. ಯಾವುದೇ ಸಮಯದಲ್ಲಿ ನಾವು ಬಿಗ್ ಬಾಸ್‌ಗೆ ಹೋದರೂ, ಅದು ಮೇಲಿನಿಂದ ನಮ್ಮನ್ನ ನೋಡುತ್ತಿರುವ ನಮ್ಮ ತಂದೆಗಾಗಿʼʼಎಂದು ಸುದೀರ್ಘವಾಗಿ ಬರೆದುಕೊಂಡಿದ್ದಾರೆ.
ಅದ್ವಿತಿ ಶೆಟ್ಟಿ (Adhvithi Shetty) ಅವರ ತಂದೆ ಕೆಲ ದಿನಗಳಿಂದ ಅನಾರೋಗ್ಯ ಸಮಸ್ಯೆಯಿಂದ ಬಳಲಿ ಚಿಕಿತ್ಸೆ ಫಲಕಾರಿಯಾಗದೇ ವಿಧಿವಶರಾಗಿದ್ದರು.
ಇದನ್ನೂ ಓದಿ: Adhvithi Shetty: ಮಿಸ್ಟರ್ & ಮಿಸೆಸ್ ರಾಮಾಚಾರಿ ಖ್ಯಾತಿಯ ಅವಳಿ ನಟಿಯರಾದ ಅದ್ವಿತಿ-ಅಶ್ವಿತಿ ತಂದೆ ನಿಧನ!
ಯಾರು ಈ ಅವಳಿ ಸಹೋದರಿಯರು?
ಮಿಸ್ಟರ್ & ಮಿಸೆಸ್ ರಾಮಾಚಾರಿ ಚಿತ್ರವನ್ನು ನೋಡಿದ ಯಾರೇ ಆದರೂ ಅದ್ವಿತಿ ಮತ್ತು ಅಶ್ವಿತಿಯನ್ನು ಮರೆಯಲು ಸಾಧ್ಯವೇ ಇಲ್ಲ. ಅದರಲ್ಲಿ ರಾಧಿಕಾ ಪಂಡಿತ್ ಸ್ನೇಹಿತೆಯರಾಗಿ ನಟಿಸಿದ್ದ ಇವರದ್ದು ಡಬಲ್ ರೋಲ್ ಎಂದು ಬಹುತೇಕರು ಅಂದುಕೊಂಡಿದ್ದರೆ ಅದರಲ್ಲಿ ಅಚ್ಚರಿಯಾಗುವಂಥಾದ್ದೇನೂ ಇಲ್ಲ. ಹೀಗೆ ಸಿನಿಮಾ, ಸಾಮಾಜಿಕ ಕಾರ್ಯಗಳ ಮೂಲಕ ಹೆಸರಾಗಿರುವ ಈ ಅವಳಿ ಸೋದರಿಯರು ಸಾಗಿ ಬಂದ ಹಾದಿಯೇ ಭಿನ್ನವಾಗಿದೆ.
ಪಿ.ಎಚ್ ವಿಶ್ವನಾಥ್ ನಿರ್ದೇಶನದ ಸುಳಿ ಎಂಬ ಕಲಾತ್ಮಕ ಚಿತ್ರದಲ್ಲಿ ಅದ್ವಿತಿ ಮತ್ತು ಅಶ್ವಿತಿ ಪ್ರಧಾನ ಪಾತ್ರಗಳಲ್ಲಿ ನಟಿಸಿದ್ದರು. ಅದು ಅವರ ಪಾಲಿಗೆ ಎರಡನೇ ಚಿತ್ರ. ಅದಾದ ನಂತರ ಅದ್ವಿತಿ ದೊಡ್ಮನೆ ಹುಡುಗ ಸೇರಿದಂತೆ ಕೆಲ ಚಿತ್ರಗಳಲ್ಲಿ ಪಾತ್ರ ನಿರ್ವಹಿಸಿದ್ದರು. ಸೀರಿಯಲ್‍ನಲ್ಲಿಯೂ ಕಾಣಿಸಿಕೊಂಡಿದ್ದರು. ಮಹಾನ್ ಹುತಾತ್ಮ ಎಂಬ ಶಾರ್ಟ್ ಮೂವಿ ಅದ್ವಿತಿ ಪಾಲಿಗೆ ರಾಷ್ಟ್ರಪ್ರಶಸ್ತಿಯನ್ನೂ ತಂದುಕೊಟ್ಟಿದೆ.