ಪಾನ್‌ ಇಂಡಿಯಾ ಸ್ಟಾರ್‌ ಯಶ್‌ ಅಭಿನಯದ ಬಹು ನಿರೀಕ್ಷಿತ ಕೆಜಿಎಫ್‌-2 ಚಿತ್ರದ ಟ್ರೇಲರ್‌ ಯೂಟ್ಯೂಬ್‌ನಲ್ಲಿ ಧೂಳೆಬ್ಬಿಸುತ್ತಿದೆ. ಪಂಚ ಭಾಷೆಗಳಲ್ಲಿ ಬಿಡುಗಡೆಯಾಗಿರುವ ಚಿತ್ರದ ಟ್ರೇಲರ್‌ 109 ಮಿಲಿಯನ್ ವೀವ್ಸ್‌ ಪಡೆದು ಹೊಸ ದಾಖಲೆ ಬರೆದಿದೆ.
ನಿರ್ದೇಶಕ ಪ್ರಶಾಂತ್‌ ನೀಲ್‌ ಹಾಗೂ ರಾಕಿಂಗ್‌ ಸ್ಟಾರ್‌ ಯಶ್‌ ಕಾಂಬಿನೇಷನ್‌ನಲ್ಲಿ ಮೂಡಿಬಂದಿರುವ ಕೆಜಿಎಫ್‌-2 ಚಿತ್ರದ ಟ್ರೇಲರ್‌ ಭಾನುವಾರವಷ್ಟೇ ರಿಲೀಸ್‌ ಆಗಿತ್ತು. ರಿಲೀಸ್‌ ಆದ ಮೂರೇ ದಿನದಲ್ಲಿ 109 ಮಿಲಿಯನ್ ವೀವ್ಸ್‌ ಪಡೆಯುವ ಮೂಲಕ ರಾಕಿಭಾಯ್‌ ಹಳೆ ದಾಖಲೆಗಳನ್ನು ಸರಿಗಟ್ಟಿ ಹೊಸ ರೆಕಾರ್ಡ್‌ ಕ್ರಿಯೆಟ್‌ ಮಾಡಿದ್ದಾನೆ.
ಕೆಜಿಎಫ್‌-2 ಚಿತ್ರದ ಟ್ರೇಲರ್‌ ಕನ್ನಡದಲ್ಲಿ 18 ಮಿಲಿಯನ್ ವೀವ್ಸ್‌ ಪಡೆದಿದ್ದರೆ ತೆಲುಗಿನಲ್ಲಿ 20 ಮಿಲಿಯನ್, ಹಿಂದಿಯಲ್ಲಿ 51 ಮಿಲಿಯನ್, ತಮಿಳಿನಲ್ಲಿ 12 ಮಿಲಿಯನ್ ಹಾಗೂ ಮಲಯಾಳಂನಲ್ಲಿ 8 ಮಿಲಿಯನ್ ವೀವ್ಸ್‌ ಪಡೆದುಕೊಂಡಿದೆ.
ಈ ಬಗ್ಗೆ ಟ್ವೀಟ್‌ ಮಾಡಿರುವ ಹೊಂಬಾಳೆ ಫಿಲ್ಮ್ಸ್‌ ʻರೆಕಾರ್ಡ್‌.. ರೆಕಾರ್ಡ್‌.. ರೆಕಾರ್ಡ್‌.. ರಾಕಿಗೆ ಇದು ಇಷ್ಟವಿಲ್ಲ, ಅದರಿಂದ ತಪ್ಪಿಸಿಕೊಳ್ಳುತ್ತಾನೆ. ಆದರೆ ರೆಕಾರ್ಡ್ಸ್‌ ರಾಕಿಯನ್ನು ಇಷ್ಟ ಪಡುತ್ತವೆ. ಹೀಗಾಗಿಯೇ ಅದರಿಂದ ರಾಕಿ ತಪ್ಪಿಸಿಕೊಳ್ಳಲು ಆಗುವುದಿಲ್ಲʼ ಎಂದು ಸಂತಸ ಹಂಚಿಕೊಂಡಿದೆ.