ಬೆಂಗಳೂರು : ಕರಾವಳಿ ಕರ್ನಾಟಕದ ಸಾಂಸ್ಕೃತಿಕ ವೈಶಿಷ್ಟ್ಯವನ್ನು ಅನಾವರಣಗೊಳಿಸಿದ ಕಾಂತಾರ ಸಿನಿಮಾ ದಿನಕ್ಕೊಂದು ದಾಖಲೆಗಳನ್ನು ಸೃಷ್ಟಿಸುತ್ತಿದೆ. ಭಾರತದಾದ್ಯಂತ ಬಾಕ್ಸ್‌ ಆಫೀಸ್‌ನಲ್ಲಿ ಧೂಳೆಬ್ಬಿಸಿರುವ ಈ ಚಲನಚಿತ್ರ ಕರ್ನಾಟಕದಲ್ಲಿ ಅತಿ ಹೆಚ್ಚು ಗಳಿಕೆ ಮಾಡಿರುವ ಸಿನಿಮಾ ಎಂಬ ಖ್ಯಾತಿ ಪಡೆದುಕೊಂಡಿದ್ದು, ಈ ದಾಖಲೆ ಹೊಂದಿದ್ದ ಕೆ.ಜಿ.ಎಫ್‌ ಅನ್ನು ಹಿಂದಿಕ್ಕಿದೆ. ಕೆಜಿಎಫ್‌ ಸಿನಿಮಾವನ್ನು ಕೂಡ ಕಾಂತಾರ ಸಿನಿಮಾವನ್ನು ನಿರ್ಮಾಣ ಮಾಡಿರುವ ಹೊಂಬಾಳೆ ಫಿಲ್ಸ್ಮ್‌ ನಿರ್ಮಾಣ ಮಾಡಿತ್ತು.
ಮೂರನೇ ವಾರದ ೧೪ ಕೋಟಿ ರೂಪಾಯಿ ಸಂಗ್ರಹ ಸೇರಿದಂತೆ ಕರ್ನಾಟದಲ್ಲಿ ಕಾಂತಾರ ಒಟ್ಟಾರೆ ೧೧೧ ಕೋಟಿ ರೂಪಾಯಿ ಗಳಿಸಿದೆ. ಕೆಜಿಎಫ್‌ ಸಿನಿಮಾ ನಾಲ್ಕನೇ ವಾರದಲ್ಲಿ ಈ ಮೊತ್ತಕ್ಕಿಂತ ಅರ್ಧ ಮೊತ್ತವನ್ನು ಮಾತ್ರ ಪಡೆದುಕೊಂಡಿತ್ತು. ಈ ಮೂಲಕ ಇದುವರೆಗಿನ ಎಲ್ಲ ದಾಖಲೆಗಳನ್ನು ಕಾಂತಾರ ಮುರಿದಿದೆ.
ದೀಪಾವಳಿ ಹಬ್ಬದ ಹಿನ್ನೆಲೆಯಲ್ಲಿ ಸಿನಿಮಾ ಮಂದಿರಗಳು ಮತ್ತೆ ತುಂಬಿ ತುಳುಕುತ್ತಿದ್ದು, ಕಾಂತಾರದ ನಾಗಾಲೋಟ ಮುಂದುವರಿದಿದೆ. ಈ ಮೂಲಕ ದೇಶಾದ್ಯಂತ ೧೭೦ ಕೋಟಿ ರೂಪಾಯಿ ತನಕ ಕಲೆಕ್ಷನ್ ಮಾಡಿದೆ. ಹಬ್ಬ ಮುಕ್ತಾಯದ ವೇಳೆಗೆ ಸಂಗ್ರಹ ೨೦೦ ಕೋಟಿ ರೂಪಾಯಿ ಗಳಿಸಬಹುದು ಎಂದು ಅಂದಾಜಿಸಲಾಗಿದೆ. ಕಾಂತಾರ ಸಿನಿಮಾ ವಿದೇಶದಲ್ಲೂ ೧೮ ಕೋಟಿ ರುಪಾಯಿ ಸಂಗ್ರಹ ಮಾಡಿದೆ.
ಇದನ್ನೂ ಓದಿ | Kantara Movie | ಕಾಂತಾರದ ವರಾಹ ರೂಪಂ ಹಾಡು ನವರಸಂ ಹಾಡಿನ ಕಾಪಿ? ಕಾನೂನು ಕ್ರಮದ ಎಚ್ಚರಿಕೆ ಕೊಟ್ಟ ಮಲಯಾಳಂ ಸಂಗೀತ ತಂಡ