ಹೊಸದಿಲ್ಲಿ: ಸೂಪರ್ಸ್ಟಾರ್ ರಜನಿಕಾಂತ್ (Actor Rajinikanth) ಅವರು ಮಲೇಷ್ಯಾ ಪ್ರಧಾನಿ ಅನ್ವರ್ ಇಬ್ರಾಹಿಂ ಅವರನ್ನು ಭೇಟಿಯಾಗಿರುವ ವಿಡಿಯೋ ದೃಶ್ಯಗಳು ಇದೀಗ ವೈರಲ್ (Viral video) ಆಗುತ್ತಿದೆ. ʼಜೈಲರ್ʼ (Jailer Movie) ಸ್ಟಾರ್ ಅನ್ನು ಮಲೇಷ್ಯಾ ಪ್ರಧಾನಿ ಸ್ವತಃ ರಜನಿ ಸ್ಟೈಲ್‌ನಲ್ಲೇ ಸ್ವಾಗತಿಸುತ್ತಿರುವುದು, ಅದಕ್ಕೆ ರಜನಿ ನಗುತ್ತಿರುವ ಕ್ಷಣಗಳು ಈ ವಿಡಿಯೋದಲ್ಲಿ ದಾಖಲಾಗಿದೆ.
ಇತ್ತೀಚೆಗೆ ತಲೈವಾ (Thalaiva) ರಜನಿಕಾಂತ್ ಅವರು ಮಲೇಷ್ಯಾ ಪ್ರಧಾನಿ ಅನ್ವರ್ ಇಬ್ರಾಹಿಂ ಅವರನ್ನು ಭೇಟಿಯಾದರು. ಈ ಸಂದರ್ಭದಲ್ಲಿ ಶೇಕ್‌ಹ್ಯಾಂಡ್‌ ಕೊಡುವ ಸಂದರ್ಭದಲ್ಲಿ ಮಲೇಷ್ಯಾ ಪ್ರಧಾನಿ ಜೈಲರ್ ಫಿಲಂನಲ್ಲಿ ರಜನಿ ಪಿಸ್ತೂಲ್‌ ತಿರುಗಿಸುವ ರೀತಿಯಲ್ಲಿ ಕೈಯಲ್ಲಿ ಅಭಿನಯಿಸಿ, ನಗುತ್ತ ಸ್ವಾಗತಿಸಿದರು. ನಂತರ ರಜನಿಕಾಂತ್ ಅವರನ್ನು ಆತ್ಮೀಯವಾಗಿ ಅಪ್ಪಿಕೊಂಡರು. ಇಬ್ರಾಹಿಂ ಮತ್ತು ರಜನಿಕಾಂತ್ ಒಟ್ಟಿಗೆ ಕುಳಿತು ಹರಟೆ ಹೊಡೆಯುತ್ತರುವ, ಈ ಸಂದರ್ಭದಲ್ಲಿ ಇಬ್ರಾಹಿಂ ಅವರು ರಜನಿಕಾಂತ್ ಅವರ ಹಲವು ಭಂಗಿಗಳನ್ನು ಅನುಕರಿಸಿ ಜೋಕ್‌ ಮಾಡುತ್ತಿರುವ, ಅದಕ್ಕೆ ರಜನಿ ಹೃದ್ಯವಾಗಿ ನಗುತ್ತಿರುವ ದೃಶ್ಯಗಳು ವಿಡಿಯೋದಲ್ಲಿ ಕಂಡುಬಂದವು.
Define MASS.
— Manobala Vijayabalan (@ManobalaV) September 11, 2023
Prime minister of Malaysia greets Superstar #Rajinikanth.
||#Thalaivar171||pic.twitter.com/1iAaNYhvTr
ರಜನಿ ಈ ಸಂದರ್ಭದಲ್ಲಿ ಸಂಪೂರ್ಣ ಬಿಳಿಯ ದಿರಸು ಧರಿಸಿದ್ದರು. ಗರಿಗರಿಯಾದ ಬಿಳಿ ಶರ್ಟ್ ಜೊತೆಗೆ ಬಿಳಿ ಪಂಚೆ ಧರಿಸಿದ್ದರು. ಮತ್ತೊಂದೆಡೆ ಅನ್ವರ್ ಇಬ್ರಾಹಿಂ ಔಪಚಾರಿಕ ಕಪ್ಪು ಸೂಟ್ ಧರಿಸಿದ್ದರು. ಇವರಿಬ್ಬರ ಭೇಟಿಯ ವೀಡಿಯೊವನ್ನು ಹಲವಾರು ಸಾಮಾಜಿಕ ಮಾಧ್ಯಮ ಖಾತೆಗಳಿಂದ ಹಂಚಿಕೊಳ್ಳಲಾಗಿದೆ.
ಜೈಲರ್ ಚಿತ್ರದ ಯಶಸ್ಸಿನಿಂದ ರಜನಿಕಾಂತ್ ಮತ್ತೆ ಎಲ್ಲ ಚಿತ್ರರಸಿಕರ ಕಣ್ಮಣಿಯಾಗಿದ್ದಾರೆ. ಆಗಸ್ಟ್‌ನಲ್ಲಿ ಬಿಡುಗಡೆಯಾದ ಚಿತ್ರ ಹಲವಾರು ಬಾಕ್ಸ್ ಆಫೀಸ್ ದಾಖಲೆಗಳನ್ನು ಮುರಿದಿದೆ. ವಿಶ್ವದಾದ್ಯಂತ ಬಾಕ್ಸ್ ಆಫೀಸ್‌ನಲ್ಲಿ ಸಂಗ್ರಹ 600 ಕೋಟಿ ರೂಪಾಯಿ ದಾಟಿದೆ ಎನ್ನಲಾಗಿದೆ. ಈ ನಡುವೆ, ರಜನಿಕಾಂತ್ ಅವರು ಲೋಕೇಶ್ ಕನಕರಾಜ್ ಅವರ ಹೊಸ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ಸನ್ ಪಿಕ್ಚರ್ಸ್ ಘೋಷಿಸಿದೆ. ಕಲಾನಿಧಿ ಮಾರನ್ ಪ್ರಸ್ತುತಪಡಿಸುತ್ತಿರುವ ಈ ಚಿತ್ರಕ್ಕೆ ತಾತ್ಕಾಲಿಕವಾಗಿ ʼತಲೈವರ್ 171ʼ ಎಂದು ಹೆಸರಿಸಲಾಗಿದೆ. ಇದು ನಟನಾಗಿ ರಜನಿಕಾಂತ್ ಅವರ 171 ಚಲನಚಿತ್ರವನ್ನು ಗುರುತಿಸುತ್ತದೆ.
ಇದನ್ನೂ ಓದಿ: Actor Rajinikanth: ಲೋಕೇಶ್ ಕನಕರಾಜ್ ಜತೆ ರಜನಿ ಸಿನಿಮಾ ಪಕ್ಕಾ; ʻಲಿಯೋʼ ಕಥೆ ಎನು?