ಮುಂಬಯಿ: ಮಿಸ್‌ ವರ್ಲ್ಡ್ ಐಶ್ವರ್ಯಾ ರೈ ಬಚ್ಚನ್ ಅವರು ಈಗ ಸೌಂದರ್ಯ ಮತ್ತು ಫ್ಯಾಷನ್‌ನ ಗ್ಲೋಬಲ್ ಐಕಾನ್. ಕಳೆದ ಕೆಲವು ದಿನಗಳಿಂದ ಕಾನ್‌ ಫಿಲ್ಮ್‌ ಫೆಸ್ಟಿವಲ್‌ನಲ್ಲಿ ಅದ್ಧೂರಿಯಾಗಿ ಮಿಂಚುತ್ತಿದ್ದಾರೆ. ತಮ್ಮ 48ನೇ ವಯಸ್ಸಿನಲ್ಲೂ ನಾಯಕಿಯಾಗಿಯೇ ಗಮನ ಸೆಳೆಯುತ್ತಿರುವ ಇವರು ಬಾಲಿವುಡ್‌ ಮಾತ್ರವಲ್ಲ ಇಡೀ ಭಾರತೀಯ ಚಿತ್ರರಂಗ ಮತ್ತು ಹಾಲಿವುಡ್‌ನಲ್ಲೂ ಬೇಡಿಕೆ ಹೊಂದಿದ್ದಾರೆ. ಜಗತ್ತಿನ ಟಾಪ್‌ 5 ಶ್ರೀಮಂತ ನಟಿಯರಲ್ಲಿ ಒಬ್ಬರೆಂಬ ಖ್ಯಾತಿಯನ್ನೂ ಹೊಂದಿದ್ದಾರೆ. ಇಂಥ ಐಶ್ವರ್ಯ ರೈ (Aishwarya Rai) 30 ವರ್ಷಗಳ ಹಿಂದೆ ಮಾಡೆಲಿಂಗ್‌ ಕ್ಷೇತ್ರಕ್ಕೆ ಇಳಿದಾಗ ಸಿಕ್ಕಿದ ಆರಂಭಿಕ ಸಂಭಾವನೆ ಎಷ್ಟು ಗೊತ್ತೇ? ಇವತ್ತು ಒಂದು ಸಿನಿಮಾಗೆ ಕೋಟಿಗಟ್ಟಲೆ ಸಂಭಾವನೆ ಪಡೆಯುವ ಕರ್ನಾಟಕ ಕರಾವಳಿಯ ಬೆಡಗಿ ಅಂದು ಪಡೆದದ್ದು ಬರೀ 1500 ರೂ. ಮಾತ್ರ!
ಐಶ್ವರ್ಯ ರೈ (Aishwarya Rai) ಆಗಿನ್ನೂ ಲೋಕ ಮಿಸ್‌ ವರ್ಲ್ಡ್ ಆಗಿರಲಿಲ್ಲ. ಆಕೆ ಲೋಕಸುಂದರಿ ಕಿರೀಟವನ್ನು ಗೆದ್ದು ಜಗತ್ತನ್ನೇ ಸೆಳೆದಿದ್ದು 1994ರಲ್ಲಿ. ಅದಕ್ಕಿಂತ ಎರಡು-ಮೂರು ವರ್ಷ ಮೊದಲು ಅಂದರೆ 1992ರಲ್ಲಿ ಆಕೆ ಮಾಡೆಲಿಂಗ್‌ ಕ್ಷೇತ್ರಕ್ಕೆ ಕಾಲಿಟ್ಟಿದ್ದರು. ಸಣ್ಣ ವಯಸ್ಸಿನಲ್ಲೇ ಮಾಡೆಲಿಂಗ್‌ನಲ್ಲಿ ಆಸಕ್ತಿ ತೋರಿಸಿದ್ದರೂ ಮಾಡೆಲಿಂಗ್‌ ಆಕೆಯ ಕೈ ಹಿಡಿದದ್ದು 18ನೇ ವಯಸ್ಸಿನ ಹೊತ್ತಿಗೆ. ಮೊದಮೊದಲು ಸಣ್ಣಪುಟ್ಟ ಮ್ಯಾಗಜಿನ್‌ಗಳ ಫೋಟೊ ಶೂಟ್‌ನಲ್ಲಿ ಭಾಗವಹಿಸುತ್ತಿದ್ದ ಆಕೆ ನಿಧಾನಕ್ಕೆ ಜನಪ್ರಿಯ ಮಾಡೆಲ್‌ ಆಗುವತ್ತ ಹೆಜ್ಜೆ ಹಾಕಿದರು.
1500 ರೂ. ಸಂಭಾವನೆಗೆ ಸಿಕ್ಕಿತು ದಾಖಲೆ
ಬದುಕು ಯಾವತ್ತೂ ಹೂವಿನ ಹಾಸಿಗೆಯಾಗಿರುವುದಿಲ್ಲ. ಪ್ರತಿಯೊಬ್ಬರು ಕೂಡಾ ಆರಂಭಿಕ ಹಂತದಲ್ಲಿ ತುಂಬ ಕಷ್ಟಪಟ್ಟೇ ಅತ್ಯಂತ ಪರಿಶ್ರಮದಿಂದ ಮೇಲೆ ಬಂದಿರುತ್ತಾರೆ ಎನ್ನುವುದನ್ನು ಐಶ್ವರ್ಯ ರೈ (Aishwarya Rai) ಬದುಕು ಕೂಡಾ ಹೇಳುತ್ತದೆ. ಕೃಷಾ ಕ್ರಿಯೇಷನ್ಸ್‌ ಎಂಬ ಸಂಸ್ಥೆಯಲ್ಲಿ ಒಂದು ದಿನದ ಫೋಟೋ ಶೂಟ್‌ಗೆ ಮಾಡೆಲ್‌ ಆಗಿ ಭಾಗವಹಿಸಲು ಐಶ್ವರ್ಯ ರೈ ಒಪ್ಪಿದ್ದರು. ಅದಕ್ಕೆ ಸಂಬಂಧಿಸಿದ ಒಂದು ಅಗ್ರಿಮೆಂಟ್‌ ಈಗ ಜಾಲತಾಣಗಳಲ್ಲಿ ವೈರಲ್‌ ಆಗಿದೆ. 1992ರ ಮೇ 23ರಂದು ಮಾಡಿಕೊಳ್ಳಲಾದ ಈ ಅಗ್ರಿಮೆಂಟ್‌ನಲ್ಲಿ ಆಗ ಐಶ್ವರ್ಯ ರೈ ಅವರಿಗೆ ಸುಮಾರು 18 ವರ್ಷ ಆಗಿತ್ತು ಎಂದು ಉಲ್ಲೇಖಿಸಲಾಗಿದೆ. ಬಿಲ್‌ ಕಂ ಅಗ್ರಿಮೆಂಟ್‌ಗೆ ಐಶ್ವರ್ಯ ರೈ ಅವರೂ ಸಹಿ ಹಾಕಿದ್ದಾರೆ. ಆಗ ಅವರ ಮನೆ ವಿಳಾಸ ಮುಂಬಯಿ ಖಾರ್‌ ಪ್ರದೇಶದ ರಾಮಲಕ್ಷ್ಮೀ ನಿವಾಸ ಎಂದು ಉಲ್ಲೇಖಿಸಲಾಗಿದೆ.
ಒಪ್ಪಂದ ಪತ್ರದಲ್ಲಿ ಈ ಫೋಟೊಗಳ ಮೇಲೆ ತನಗಾಗಲೀ, ತನ್ನ ಕುಟುಂಬಕ್ಕಾಗಲೀ ಯಾವುದೇ ಹಕ್ಕಿರುವುದಿಲ್ಲ. ಆದರೆ, ಕಂಪನಿ ಇದರ ಸರ್ವ ರೀತಿಯ ಬಳಕೆಗೆ ಸ್ವತಂತ್ರವಾಗಿರುತ್ತದೆ ಎಂಬಿತ್ಯಾದಿ ಷರತ್ತುಗಳನ್ನು ಉಲ್ಲೇಖಿಸಲಾಗಿದೆ. ಇದನ್ನು ಒಪ್ಪಿಯೇ ಐಶ್ವರ್ಯ ಸಹಿ ಮಾಡಿದ್ದಾರೆ.
ರಿವೀಲ್‌ ಮಾಡಿದ್ದು ಯಾರು?
SBGSR MAHARASHTRA ಎಂಬ ಟ್ವಿಟರ್‌ ಹ್ಯಾಂಡಲ್‌ನಲ್ಲಿ ಈ ಬಿಲ್‌ ಮತ್ತು ಆವತ್ತಿನ ಕ್ಯಾಟಲಾಗ್‌ನ ವಿವರಗಳನ್ನು ರಿವೀಲ್‌ ಮಾಡಲಾಗಿದೆ. ʻʻನಾನು ಪ್ರಕಟಿಸಿದ ಫ್ಯಾಷನ್‌ ಕ್ಯಾಟಲಾಗ್‌ನ ಮೂವತ್ತನೇ ವರ್ಷವನ್ನು ಆಚರಿಸುತ್ತಿದ್ದೇನೆ. ಈ ಕ್ಯಾಟಲಾಗ್‌ಗೆ ಐಶ್ವರ್ಯ ರೈ, ಸೊನಾಲಿ ಬೇಂದ್ರೆ, ನಿಕಿ ಅನೇಜಾ, ತೇಜಸ್ವಿನಿ ಕೊಲ್ಲಾಪುರೆ ಮೊದಲಾದವರು ಆವತ್ತು ಕ್ಯಾಟಲಾಗ್‌ನ ಫೋಟೊಗಳಿಗಾಗಿ ಪೋಸ್‌ ಕೊಟ್ಟಿದ್ದರು ಎಂದು ಹೇಳಿಕೊಂಡಿದ್ದಾರೆ.
ಹೇಗಿದ್ದರು ಆಗ ಐಶ್ವರ್ಯ ರೈ?
ಐಶ್ವರ್ಯ ರೈ ಅವರನ್ನು ಇತ್ತೀಚೆಗೆ ನೋಡುತ್ತಿರುವವರಿಗೆ 30 ವರ್ಷದ ಹಿಂದಿನ ಕ್ಯಾಟಲಾಗ್‌ನಲ್ಲಿರುವ ಐಶ್ವರ್ಯ ರೈ ಅವರನ್ನು ಗುರುತಿಸುವುದಕ್ಕೆ ಸ್ವಲ್ಪ ಕಷ್ಟ ಆಗಬಹುದು. ಯಾಕೆಂದರೆ, ಆವತ್ತು ಉದ್ದನೆಯ ಗುಂಗುರು ಕೂದಲಿನ ಒಡತಿಯಾಗಿದ್ದ ಐಶ್ವರ್ಯ ಈಗ ಸಂಪೂರ್ಣ ಬದಲಾಗಿದೆ. ಗುಂಗುರು ಕೂದಲಿನ ನಡುವೆ ಮುಖ ದುಂಡಗಾಗಿ ಕಾಣುತ್ತದೆ. ಈಗ ಬಾಚಿ ಕಟ್ಟಿದ ಕೂದಲಿನಲ್ಲಿ ಒಂದಿಷ್ಟು ಉದ್ದನೆಯ ಚೆಲುವು. ಆದರೆ, ಆ ಕಾಡುವ ಬೆಕ್ಕಿನ ಕಣ್ಣುಗಳು ಮಾತ್ರ ಇವತ್ತಿಗೂ ಅದೇ, ಆವತ್ತಿಗೂ ಅದೇ!
ಹೆಜ್ಜೆ ಮೇಲೆ ಹೆಜ್ಜೆ ಇಟ್ಟು….
1994ರಲ್ಲಿ ಮಿಸ್‌ವರ್ಲ್ಡ್‌ ಆಗಿ ಗಮನ ಸೆಳೆದ ಆಕೆ ಯಾವುದಕ್ಕೂ ಅವಸರ ಪಡಲೇ ಇಲ್ಲ. ಬಾಲಿವುಡ್‌ ಕೈ ಬೀಸಿ ಕರೆಯುತ್ತಿದ್ದರೂ ಆಕೆ ಮೊದಲ ಬಾರಿ ನಟಿಸಿದ್ದು 1997ರಲ್ಲಿ. ಮಣಿರತ್ನಂ ಅವರ ಇರುವರ್‌ ಸಿನಿಮಾದಲ್ಲಿ. ಅಲ್ಲಿಂದಾಚೆಗೆ ಜೀನ್ಸ್‌ನಲ್ಲಿ ಮತ್ತೊಮ್ಮೆ ಗಮನ ಸೆಳೆದ ಆಕೆ ನಟಿಯಾಗಿಯೂ ಮಾಗುತ್ತಾ ಸಾಗಿದರು. 1999ರಲ್ಲಿ ಬಿಡುಗಡೆಯಾದ ಹಮ್‌ ದಿಲ್‌ ದೇ ಚುಕೇ ಸನಮ್‌, 2002ರಲ್ಲಿ ತೆರೆಕಂಡ ದೇವದಾಸ್‌ ಅವರನ್ನು ಅತ್ಯುತ್ತಮ ನಟಿ ಎಂಬ ಅಭಿದಾನಕ್ಕೆ ಪಾತ್ರವಾಗುವಂತೆ ಮಾಡಿತು. ಅತ್ಯಂತ ಕಾಳಜಿಯಿಂದ ಸಿನಿಮಾಗಳನ್ನು ಆಯ್ಕೆ ಮಾಡಿಕೊಂಡ ಫಲವಾಗಿಯೇ ಇವತ್ತಿಗೂ ಬೇಡಿಕೆ ಉಳಿಸಿಕೊಂಡಿರುವ ಆಕೆ 2007ರ ಬಳಿಕ ಅಮಿತಾಭ್‌ ಬಚ್ಚನ್ ಕುಟುಂಬದ ಮುದ್ದಿನ ಸೊಸೆ. ಪುಟಾಣಿ ಆರಾಧ್ಯಳ ಪ್ರೀತಿಯ ಅಮ್ಮ. ಕುಟುಂಬದ ಗೌರವಗಳನ್ನು ಉಳಿಸುತ್ತಲೇ ತನ್ನ ಗೌರವವನ್ನೂ ಹೆಚ್ಚಿಸಿಕೊಂಡಿರುವ ಐಶ್ವರ್ಯ ರೈ ಭಾರತೀಯ ಫ್ಯಾಷನ್‌, ಚಿತ್ರರಂಗದಲ್ಲಿ ಬೆಳೆಯಬಹುದಾದ ದಾರಿಗೆ ಒಂದು ಮಾದರಿ.
ಇದನ್ನೂ ಓದಿ | Explainer: Cannes Film Festival ಮಿಂಚುತ್ತಿರುವ ಭಾರತ, ಏನಿದರ ವಿಶೇಷತೆ?