ಮುಂಬೈ: ನಟ ಅಕ್ಷಯ್ ಕುಮಾರ್ (Akshay Kumar) ಭಾರತದಲ್ಲಿ ಇದ್ದಾರಾದರೂ ಅವರು ಭಾರತೀಯ ನಾಗರಿಕತೆ ಹೊಂದಿಲ್ಲವೆನ್ನುವ ವಿಚಾರ ಹಲವು ವರ್ಷಗಳಿಂದ ಅನೇಕರ ಆಕ್ರೋಶಕ್ಕೆ ಕಾರಣವಾಗಿತ್ತು. ಆದರೆ ಇದೀಗ ಖುಷಿಯ ವಿಚಾರವೊಂದನ್ನು ಅಕ್ಷಯ್ ಕುಮಾರ್ ಹಂಚಿಕೊಂಡಿದ್ದಾರೆ. ಭಾರತವು ಸ್ವಾತಂತ್ರ್ಯ ದಿನದ ಸಂಭ್ರಮಲ್ಲಿರುವಾಗಲೇ ತಮಗೆ ಭಾರತೀಯ ನಾಗರಿಕತೆ ಸಿಕ್ಕಿರುವುದಾಗಿ ಅವರು ಸಾಮಾಜಿಕ ಜಾಲತಾಣಗಳಲ್ಲಿ ಹೇಳಿಕೊಂಡಿದ್ದಾರೆ. ಈ ವಿಚಾರ ಅವರ ಅಭಿಮಾನಿಗಳಲ್ಲಿ ಸಂತಸ ತಂದಿದೆ.
ಈ ವಿಚಾರವಾಗಿ ಟ್ವಿಟರ್‌ನಲ್ಲಿ ಟ್ವೀಟ್‌ ಮಾಡಿರುವ ಅಕ್ಷಯ್ ಕುಮಾರ್ ಅವರ ಭಾರತದ ನಾಗರಿಕತೆ ಪಡೆದಿರುವ ದಾಖಲೆಯನ್ನು ಹಂಚಿಕೊಂಡಿದ್ದಾರೆ. “ಈಗ ಹೃದಯ ಮತ್ತು ನಾಗರಿಕತೆ ಎರಡೂ ಹಿಂದೂಸ್ಥಾನಿ” ಎಂದು ಬರೆದುಕೊಂಡಿದ್ದಾರೆ. ಹಾಗೆಯೇ ಎಲ್ಲರಿಗೂ ಸ್ವಾತಂತ್ರ್ಯ ದಿನದ ಶುಭಾಶಯ ಕೋರಿದ್ದು, ಜಯ ಹಿಂದ್‌ ಎಂದು ಹೇಳಿದ್ದಾರೆ. ದಾಖಲೆಯಲ್ಲಿ ಅಕ್ಷಯ್ ಕುಮಾರ್ ಅವರ ಹೆಸರನ್ನು ಅಕ್ಷಯ್ ಹರಿಓಂ ಭಾಟಿಯಾ ಎಂದು ನಮೂದಿಸಲಾಗಿದೆ.
Dil aur citizenship, dono Hindustani.
— Akshay Kumar (@akshaykumar) August 15, 2023
Happy Independence Day!
Jai Hind! 🇮🇳 pic.twitter.com/DLH0DtbGxk
2019ರಲ್ಲಿ ಖಾಸಗಿ ಮಾಧ್ಯಮ ಸಂಸ್ಥೆಯೊಂದರ ಶೃಂಗಸಭೆಯಲ್ಲಿ ಮಾತನಾಡಿದ್ದ ಅಕ್ಷಯ್ ಅವರು ಭಾರತದ ನಾಗರಿಕತೆ ಹಾಗೂ ಪಾಸ್‌ಪೋರ್ಟ್‌ ಪಡೆಯಲು ಪ್ರಯತ್ನ ಮಾಡುತ್ತಿದ್ದು, ಶೀಘ್ರವೇ ಭಾರತದವರಾಗುವುದಾಗಿ ಹೇಳಿದ್ದರು. “ಕೆನಡಾದ ಪಾಸ್‌ಪೋರ್ಟ್‌ ಹೊಂದಿದ್ದೇನೆ ಎನ್ನುವ ಮಾತ್ರಕ್ಕೆ ನಾನೇನು ಭಾರತದವನಲ್ಲ ಎಂದರ್ಥಲ್ಲ. ನಾನು ನಿಜವಾಗಿಯೂ ಭಾರತೀಯನೇ. ಈ ದೇಶದಲ್ಲಿ 9 ವರ್ಷಗಳಿಂದ ಜೀವಿಸುತ್ತಿದ್ದೇನೆ. ನಾನು ಭಾರತದವನಲ್ಲ ಎನ್ನುವ ಕಾರಣಕ್ಕೆ ಸಿನಿಮಾ ಯಶಸ್ಸು ಕಾಣುತ್ತಿಲ್ಲ ಎನ್ನುವುದನ್ನೆಲ್ಲ ಮಾತನಾಡುತ್ತಾರೆ. ಅದಕ್ಕೆಲ್ಲ ನಾನು ತಲೆ ಕಡೆಸಿಕೊಳ್ಳುವುದಿಲ್ಲ” ಎಂದು ಅವರು ಹೇಳಿದ್ದರು.
ಇದನ್ನೂ ಓದಿ: Viral Video: ರೇಸರ್ಗಳಂತೆ ರಾಂಚಿಯಲ್ಲಿ ಬೈಕ್ ಓಡಿಸಿದ ಧೋನಿ; ಬೈಕ್ ಬೆಲೆ ಎಷ್ಟು?
ಇತ್ತೀಚೆಗೆ ಅದರ ಬಗ್ಗೆ ಮತ್ತೆ ಮಾತನಾಡಿದ್ದ ಅವರು, 2019ರಲ್ಲಿ ನಾಗರಿಕತೆಗಾಗಿ ಪ್ರಯತ್ನ ಪಡುತ್ತಿದ್ದೇನೆ. ಆದರೆ ಕೊರೊನಾದಿಂದಾಗಿ ನನಗೆ ಅದು ಸಾಧ್ಯವಾಗಿಲ್ಲ. ಹಾಗಾಗಿ ಇಷ್ಟು ಕಾಯಬೇಕಾಗಿ ಬಂತು ಎಂದು ಹೇಳಿದ್ದರು.
ಅಕ್ಷಯ್ ಕುಮಾರ್ ನಟನೆಯ ಓಎಂಜಿ 2 ಸಿನಿಮಾ ಕಳೆದ ಶುಕ್ರವಾರ ಬಿಡುಗಡೆಯಾಗಿದೆ. ಗದರ್‌ 2 ಸಿನಿಮಾ ಜತೆಯಲ್ಲಿಯೇ ಈ ಸಿನಿಮಾ ಬಿಡುಗಡೆಯಾಗಿದ್ದು, ಎರಡೂ ಸಿನಿಮಾ ಗಳಿಕೆ ವಿಚಾರದಲ್ಲಿ ಸ್ಪರ್ಧೆಗಿಳಿದಿವೆ. ಹಾಗೆಯೇ ಅವರು ಸೂರರೈ ಪೊಟ್ರು ಸಿನಿಮಾದ ಹಿಂದಿ ರಿಮೇಕ್‌ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಈ ಸಿನಿಮಾ ಸೆಪ್ಟೆಂಬರ್‌ 1ರಂದು ತೆರೆ ಕಾಣಲಿದೆ. ಈ ಸಿನಿಮಾದಲ್ಲಿ ರಾಧಿಕ ಮದನ್‌ ಮತ್ತು ಪರೇಶ್‌ ರಾವಲ್‌ ಅವರು ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ. ಹಾಗೆಯೇ ಅವರು ಥ್ರಿಲ್ಲರ್‌ ಸಿನಿಮಾ ಬಡೆ ಮೈಯಾನ್‌ ಛೋಟೆ ಮೈಯಾನ್‌ ಸಿನಿಮಾದಲ್ಲಿ ಟೈಗರ್‌ ಶಾರ್ಫ್‌ ಅವರೊಂದಿಗೆ ನಟಿಸುತ್ತಿದ್ದಾರೆ. ಈ ಸಿನಿಮಾ 2024ರ ಈದ್‌ ಹಬ್ಬಕ್ಕೆ ಬಿಡುಗಡೆಯಾಗಲಿದೆ. ಹಾಗೆಯೇ ಹೌಸ್‌ಫುಲ್‌ ಸಿನಿಮಾದ ಸೀಕ್ವೆಲ್‌ನಲ್ಲಿ ರಿತೇಶ್‌ ದೇಶ್‌ಮುಖ್‌ ಅವರೊಂದಿಗೆ ನಟಿಸಲಿದ್ದಾರೆ.