ಮುಂಬೈ: ಅಕ್ಷಯ್ ಕುಮಾರ್ (Akshay Kumar) ಅವರ ಓಎಂಜಿ: ಓ ಮೈ ಗಾಡ್‌ ಸಿನಿಮಾ ದೊಡ್ಡ ಯಶಸ್ಸನ್ನು ಕಂಡಿತ್ತು. 2012ರಲ್ಲಿ ಬಿಡುಗಡೆಯಾದ ಆ ಸಿನಿಮಾದ ಎರಡನೇ ಭಾಗವಾಗಿ ಓಎಂಜಿ 2 ಇದೀಗ ಬಿಡುಗಡೆಗೆ ಸಜ್ಜಾಗಿದೆ. ಈ ಸಿನಿಮಾದ ಟೀಸರ್ ಅನ್ನು ಬಿಡುಗಡೆ ಮಾಡಲಾಗಿದೆ. ಟೀಸರ್ ಅಕ್ಷಯ್ ಅಭಿಮಾನಿಗಳ ಮನಸ್ಸು ಗೆಲ್ಲುತ್ತಿದ್ದರೆ, ಇನ್ನೊಂದತ್ತ ಕೆಲವು ಟ್ರೋಲರ್ಸ್‌ ಅಕ್ಷಯ್ ಅವರ ಹಳೆಯ ಹೇಳಿಕೆಯನ್ನು ಕೆದಕಲಾರಂಭಿಸಿದ್ದಾರೆ.
ಓಂಎಂಜಿ 2 ಸಿನಿಮಾದಲ್ಲಿ ಅಕ್ಷಯ್ ಅವರ ಎಂಟ್ರಿ, ದೇವರನ್ನು ಪೂಜಿಸಿದಾಗ ಅವರಿಗೆ ಸಿಗುವ ಪೂಜೆ ಎಲ್ಲವನ್ನೂ ತೋರಿಸಲಾಗಿದೆ. ಅದರಲ್ಲಿ ದೇವರಿಗೆ ಅಭಿಷೇಕ ಮಾಡುವುದನ್ನೂ ತೋರಿಸಲಾಗಿದೆ. ಇದೇ ವಿಚಾರ ಇಟ್ಟುಕೊಂಡು ನೆಟ್ಟಿಗರು ಅಕ್ಷಯ್ ಅವರ ಕಾಲೆಳೆಯುತ್ತಿದ್ದಾರೆ.
ಇದನ್ನೂ ಓದಿ: OMG 2 Teaser: ಶಿವನ ಅವತಾರ ಎತ್ತಿದ ಖಿಲಾಡಿ; ಅಕ್ಷಯ್ ಕುಮಾರ್ ಹೊಸ ಸಿನಿಮಾ ಟೀಸರ್ ಔಟ್
ಈ ಹಿಂದೆ ಅಕ್ಷಯ್ ಕುಮಾರ್ ಅವರು ದೇವರ ಬಗ್ಗೆ ಮಾತನಾಡುತ್ತ, “ದೇವರಿಗೆ ಹಾಲು ಮತ್ತು ಎಣ್ಣೆಯ ಅಭಿಷೇಕ ಮಾಡಿ ಅದನ್ನು ವೇಸ್ಟ್‌ ಏಕೆ ಮಾಡುತ್ತೀರಿ? ದೇವರೆಲ್ಲಾದರೂ ಹೇಳಿದ್ದಾನಾ ನನಗೆ ಹಾಲು ಕೊಡಿ ಎಂದು, ಹನುಮಂತ ಎಲ್ಲಾದರೂ ತನಗೆ ಎಣ್ಣೆ ಸ್ನಾನ ಮಾಡಿಸಿ ಎಂದಿದ್ದಾನಾ? ಜನರು ಅದಕ್ಕಾಗಿ ಏಕೆ ಖರ್ಚು ಮಾಡುತ್ತಾರೆನ್ನುವುದೇ ನನಗೆ ಅರ್ಥವಾಗುವುದಿಲ್ಲ. ಎಷ್ಟೋ ರೈತರು ಊಟವಿಲ್ಲದೆ, ಹಣವಿಲ್ಲದೆ ಸಾಯುತ್ತಿದ್ದಾರೆ. ಅಭಿಷೇಕ ಮಾಡುವ ಖರ್ಚನ್ನು ಅವರಿಗೇ ಕೊಟ್ಟರೆ ಅವರಾದರೂ ಹೊಟ್ಟೆ ತುಂಬಿಸಿಕೊಳ್ಳುತ್ತಾರಲ್ಲವೇ?” ಎಂದು ಹೇಳಿದ್ದರು. ಇದೇ ವಿಡಿಯೊವನ್ನು ಇದೀಗ ಅನೇಕರು ಹಂಚಿಕೊಳ್ಳಲಾರಂಭಿಸಿದ್ದಾರೆ.
ಅಕ್ಷಯ್ ಕುಮಾರ್ ಅವರ ಓಎಂಜಿ 2 ಸಿನಿಮಾ ಆಗಸ್ಟ್‌ 11ರಂದು ಬಿಡುಗಡೆಯಾಗಲಿದೆ. ಅದೇ ದಿನದಂದು ಸನ್ನಿ ಡಿಯೋಲ್‌ ಅವರ ಗದರ್‌ 2 ಸಿನಿಮಾ ಕೂಡ ತೆರೆ ಕಾಣಲಿದೆ. ಹಾಗೆಯೇ ಸೂಪರ್‌ ಸ್ಟಾರ್‌ ರಜನಿಕಾಂತ್‌ ಅಭಿನಯದ ಜೈಲರ್‌ ಸಿನಿಮಾ ಕೂಡ ಆ ಸಮಯದಲ್ಲೇ ಬಿಡುಗಡೆಯಾಗುತ್ತಿದೆ. ರಣಬೀರ್‌ ಕಪೂರ್‌ ಅವರ ಅನಿಮಲ್‌ ಸಿನಿಮಾವನ್ನೂ ಅದೇ ಸಮಯದಲ್ಲಿ ಬಿಡುಗಡೆ ಮಾಡಲು ಚಿತ್ರತಂಡ ನಿರ್ಧರಿಸಿತ್ತು. ಆದರೆ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸ ಹೆಚ್ಚಿರುವುದರಿಂದಾಗಿ ಸಿನಿಮಾವನ್ನು ಡಿಸೆಂಬರ್‌ನಲ್ಲಿ ಬಿಡುಗಡೆ ಮಾಡುವುದಾಗಿ ತಿಳಿಸಲಾಗಿದೆ.