ಮುಂಬೈ: ಬಾಲಿವುಡ್‌ ಹಿರಿಯ ನಟ ಅನಿಲ್‌ ಕಪೂರ್‌ (Anil Kapoor) ಇಂದಿಗೂ ಯಂಗ್‌ ಆಂಡ್‌ ಎನರ್ಜಿಟಿಕ್‌ ಕಲಾವಿದ. ಹಲವಾರು ಸಿನಿಮಾಗಳಲ್ಲಿ ವಿಭಿನ್ನ ಪಾತ್ರಗಳ ಮೂಲಕ ಜನರನ್ನು ರಂಜಿಸಿರುವ ಅನಿಲ್‌ ಅವರು ಬಾಲಿವುಡ್‌ಗೆ ಕಾಲಿಟ್ಟು 40 ವರ್ಷಗಳು ಕಳೆದಿವೆ. ಈ ಸಂತಸವನ್ನು ಸ್ವತಃ ಅವರೇ ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಪೋಸ್ಟ್‌ ಮೂಲಕ ಹಂಚಿಕೊಂಡಿದ್ದಾರೆ.
ಅನಿಲ್‌ ಕಪೂರ್‌ 1983ರಲ್ಲಿ ಬಿಡುಗಡೆಯಾದ ʼವೋ 7 ದಿನ್‌ʼ ಸಿನಿಮಾ ಮೂಲಕ ಸಿನಿ ಪ್ರಪಂಚಕ್ಕೆ ಕಾಲಿಟ್ಟವರು. ವಿಶೇಷ ಅಂದರೆ ಅನಿಲ್‌ ಕಪೂರ್‌ ಅವರು ಕನ್ನಡದ ʼಪಲ್ಲವಿ ಅನುಪಲ್ಲವಿʼ ಚಿತ್ರದಲ್ಲಿ ಅದೇ ವರ್ಷ ನಟಿಸಿದ್ದರು. ಇದು ಖ್ಯಾತ ನಿರ್ದೇಶಕ ಮಣಿರತ್ನಂ ಅವರ ಮೊದಲ ಚಿತ್ರ ಎನ್ನುವುದು ಮತ್ತೊಂದು ವಿಶೇಷ. ವೋ 7 ದಿನ್‌ ಸಿನಿಮಾದಲ್ಲಿ ತಾವು ಹಾಡು ಹಾಡುವ ವಿಡಿಯೊವೊಂದನ್ನು ಹಂಚಿಕೊಂಡಿರುವ ಅನಿಲ್‌, ತಮ್ಮ ಮೇಲೆ ನಂಬಿಕೆ ಇಟ್ಟು ಸಿನಿಮಾ ಪ್ರಪಂಚಕ್ಕೆ ಕರೆತಂದ ತಂದೆ ಸುರೀಂದರ್‌ ಕಪೂರ್‌ ಮತ್ತು ಅಣ್ಣ ಬೋನಿ ಕಪೂರ್‌ಗೆ ಧನ್ಯವಾದ ತಿಳಿಸಿದ್ದಾರೆ. ಹಾಗೆಯೇ ಸಿನಿಮಾದಲ್ಲಿ ತಮ್ಮೊಂದಿಗೆ ನಟಿಸಿದ ನಾಸಿರುದ್ದೀನ್ ಷಾ ಮತ್ತು ಪದ್ಮಿನಿ ಕೊಲ್ಹಾಪುರೆ ಅವರಿಗೂ ಧನ್ಯವಾದ ತಿಳಿಸಿದ್ದಾರೆ.
ಇದನ್ನೂ ಓದಿ: Video Viral: ಕಳ್ಳಿಯ ʼಶಕ್ತಿʼ ಪ್ರದರ್ಶನ; ಮಾಂಗಲ್ಯ ಕದ್ದು ನಾನವಳಲ್ಲ ಎಂದವಳ ಜುಟ್ಟು ಹಿಡಿದಳು!
“40 ವರ್ಷಗಳ ಕಾಲ ನನ್ನನ್ನು ಸ್ವೀಕರಿಸಿ, ಪ್ರೀತಿಸಿದ ಹಾಗೆಯೇ ಆಶೀರ್ವಾದ ನೀಡಿದ ಪ್ರೇಕ್ಷಕರಿಗೂ ವಂದನೆಗಳು. ನಾಲ್ಕು ದಶಕ ಕಣ್ಣು ಮಿಟುಕಿಸುವಂತೆ ದಾಟಿ ಹೋಯಿತು. ಜೀವನದಲ್ಲಿ ಈ ಹಂತಕ್ಕೆ ಬರಲು ಹಲವರು ನನಗೆ ಸಹಾಯ ಮಾಡಿದ್ದಾರೆ. ಎಲ್ಲರಿಂದ ನಾನು ಪಡೆದ ಪ್ರೀತಿ ಮತ್ತು ಸಹಾಯಕ್ಕೆ ನಾನಿಂದು ಋಣಿಯಾಗಿದ್ದೇನೆ” ಎಂದು ಅವರು ಹೇಳಿಕೊಂಡಿದ್ದಾರೆ.
ಹಾಗೆಯೇ ತಮ್ಮ ಮುಂಬರುವ ಸಿನಿಮಾಗಳ ಬಗ್ಗೆಯೂ ನಟ ಹೇಳಿಕೊಂಡಿದ್ದಾರೆ. ತಾವು ʼದಿ ನೈಟ್‌ ಮ್ಯಾನೇಜರ್‌ ಪಾರ್ಟ್‌ 2ʼ ಮತ್ತು ʼಅನಿಮಲ್‌ʼ ಸಿನಿಮಾದಲ್ಲಿ ನಟಿಸುತ್ತಿರುವುದಾಗಿ ಅವರು ಮಾಹಿತಿ ನೀಡಿದ್ದಾರೆ.
ಅನಿಲ್‌ ಅವರ ಪೋಸ್ಟ್‌ಗೆ ಸಹೋದರ ಬೋನಿ ಕಪೂರ್‌ ಅವರು ಸೇರಿ ಅನೇಕ ಸೆಲೆಬ್ರಿಟಿಗಳು ಕಮೆಂಟ್‌ಗಳನ್ನು ಮಾಡಿದ್ದಾರೆ. “ನೀನು ನನಗೆ, ರೀನಾ ಮತ್ತು ಸಂಜಯ್‌ಗೆ ಎಂದಿಗೂ ಉತ್ತಮ ಸಹೋದರನಾಗಿದ್ದೀಯ. ಹಾಗೆಯೇ ಹೆತ್ತವರಿಗೆ ಅತ್ಯುತ್ತಮ ಮಗನಾಗಿದ್ದೀಯ. ಸುನಿತಾಗೆ ಒಳ್ಳೆಯ ಪತಿ, ಸೋನಂ, ರಿಯಾ, ಹರ್ಷ್‌ ಮತ್ತು ಆನಂದ್‌ಗೆ ಒಳ್ಳೆಯ ತಂದೆಯಾಗಿದ್ದೀಯ. ಇದೀಗ ವಾಯುವಿಗೆ ಒಳ್ಳೆಯ ಅಜ್ಜನಾಗಿದ್ದೀಯ ಕೂಡ. ಭವಿಷ್ಯದಲ್ಲಿ ನಾಲ್ಕನೇ ಪೀಳಿಗೆಗೆ ಒಳ್ಳೆಯ ಮುತ್ತಜ್ಜನಾಗಿರುವಂತಾಗಲಿ ಎಂದು ದೇವರಲ್ಲಿ ಪ್ರಾರ್ಥಿಸುತ್ತೇನೆ. ಕಠಿಣ ಪರಿಶ್ರಮ, ಪ್ರತಿಭೆ ಮತ್ತು ಪ್ರಾಮಾಣಿಕತೆಯಿಂದಲೇ ನೀನು ಈ 40 ವರ್ಷಗಳಲ್ಲಿ ಒಳ್ಳೆಯ ನಟನಾಗಿ ಮಿಂಚಿದ್ದೀಯ. ನಿನ್ನ ಖ್ಯಾತಿ ಇನ್ನೂ ಕನಿಷ್ಠ ನೂರು ವರ್ಷಗಳ ಕಾಲ ಉಳಿಯುತ್ತದೆ ಎಂದು ನನಗೆ ಖಾತ್ರಿಯಿದೆ” ಎಂದು ಬರೆದಿದ್ದಾರೆ.