ಬೆಂಗಳೂರು: ಸೂಪರ್‌ ಸ್ಟಾರ್‌ ರಜನಿಕಾಂತ್ ನಟನೆಯ ‘ಜೈಲರ್‘ ಸಿನಿಮಾ (Jailer Movie) ಬುಕ್ಕಿಂಗ್ ಈಗಾಗಲೇ ಶುರುವಾಗಿದೆ. ಈಗಾಗಲೇ ಬೆಂಗಳೂರಿನಲ್ಲಿ ಅಡ್ವಾನ್ಸ್ ಬುಕ್ಕಿಂಗ್ ಶುರುವಾಗಿದ್ದು ಪ್ರೇಕ್ಷಕರು ಟಿಕೆಟ್ ಕಾಯ್ದಿರಿಸಲು ಮುಗಿಬಿದ್ದಿದ್ದಾರೆ. ಕರ್ನಾಟಕದಲ್ಲಿ ಗ್ರ್ಯಾಂಡ್ ಆಗಿ ಸಿನಿಮಾ ರಿಲೀಸ್ ಆಗಲಿದೆ. ಆಗಸ್ಟ್ 10ಕ್ಕೆ ವಿಶ್ವಾದ್ಯಂತ ಥಿಯೇಟರ್‌ಗಳಲ್ಲಿ ರಜನಿಕಾಂತ್ ಆರ್ಭಟ ಶುರುವಾಗಲಿದೆ. ಜಯಣ್ಣ ಫಿಲ್ಮ್ಸ್ ಮೂಲಕ ಎವಿ ಮೀಡಿಯಾ ಕನ್ಸಲ್ಟೆನ್ಸಿ ಚಿತ್ರವನ್ನು ಕರ್ನಾಟಕದಲ್ಲಿ ರಿಲೀಸ್ ಮಾಡುತ್ತಿದೆ.
4 ದಿನ ಮೊದಲೇ ಬೆಂಗಳೂರಿನಲ್ಲಿ ‘ಜೈಲರ್’ ಅಡ್ವಾನ್ಸ್ ಟಿಕೆಟ್ ಬುಕ್ಕಿಂಗ್ ಆರಂಭವಾಗಿದೆ. ಈಗಾಗಲೇ 48 ತಮಿಳು ಹಾಗೂ 1 ಕನ್ನಡ ಶೋ ಟಿಕೆಟ್ ಬುಕ್ಕಿಂಗ್ ಓಪನ್ ಆಗಿದೆ. ಶಿವಣ್ಣ ಚಿತ್ರದಲ್ಲಿ ನಟಿಸಿರುವುದರಿಂದ ಚಿತ್ರವನ್ನು ಕನ್ನಡಕ್ಕೂ ಡಬ್ ಮಾಡಿ ರಿಲೀಸ್ ಮಾಡಲಾಗುತ್ತಿದೆ. ಟ್ರೈಲರ್ ಆಗಸ್ಟ್ 2ರಂದು ಬಿಡುಗಡೆ ಆಗಿದೆ. ಟ್ರೈಲರ್ನಲ್ಲಿ ರಜನಿಕಾಂತ್ ಎರಡು ಭಿನ್ನ ಅವತಾರಗಳನ್ನು ತೋರಿಸಲಾಗಿದೆ. ಆದರೆ ಟ್ರೈಲರ್ನಲ್ಲಿ ಸೆಂಚುರಿ ಸ್ಟಾರ್‌ ಶಿವರಾಜ್ ಕುಮಾರ್ ನಾಪತ್ತೆಯಾಗಿದ್ದಾರೆ.
ಕನ್ನಡದಲ್ಲಿ ಯಾವುದೇ ದೊಡ್ಡ ಸಿನಿಮಾಗಳು ರಿಲೀಸ್ ಆಗದೇ ಇರುವುದು ‘ಜೈಲರ್’ ಚಿತ್ರಕ್ಕೆ ಪ್ಲಸ್ ಆಗಿದೆ. ಈಗಾಗಲೇ ರಿಲೀಸ್ ಆಗಿರುವ ‘ಹಾಸ್ಟೆಲ್‌ ಹುಡುಗರು ಬೇಕಾಗಿದ್ದಾರೆ’, ‘ಕೌಸಲ್ಯ ಸುಪ್ರಜಾ ರಾಮ’ ಹಾಗೂ ‘ಆಚಾರ್‌ ಅಂಡ್ ಕೋ’ ಸಿನಿಮಾಗಳ ಆರ್ಭಟ ಕೊಂಚ ಕಮ್ಮಿ ಆಗುತ್ತಿದ್ದು, ‘ಟೋಬಿ’ ಬರುವುದಕ್ಕೂ ಮೊದಲು ‘ಜೈಲರ್’ ಬಾಕ್ಸಾಫೀಸ್ ದೋಚುವ ಸುಳಿವು ಸಿಗುತ್ತಿದೆ.
ಇದನ್ನೂ ಓದಿ: Jailer Movie: ರಜನಿಕಾಂತ್ ನಟನೆಯ ‘ಜೈಲರ್‘ ಸಿನಿಮಾ ಟ್ರೈಲರ್ ಔಟ್‌; ಶಿವಣ್ಣ ನಾಪತ್ತೆ!
ಟ್ರೈಲರ್ನಲ್ಲಿ ಶಿವಣ್ಣ ನಾಪತ್ತೆ
ಹಲವು ಸೌತ್ ಇಂಡಿಯನ್ ಸ್ಟಾರ್ಸ್‌ಗಳ ದಂಡೇ ಜೈಲರ್ ಸಿನಿಮಾದಲ್ಲಿದೆ. ಶಿವಣ್ಣ. ರಮ್ಯಾ ಕೃಷ್ಣ, ಮೋಹನ್ ಲಾಲ್ ಸುನೀಲ್ ಸೇರಿದಂತೆ ದೊಡ್ಡ ದೊಡ್ದ ತಾರೆಯರು ನಟಿಸಿದ್ದಾರೆ. ಟೀಸರ್ನಲ್ಲಿ ಶಿವರಾಜ್ ಕುಮಾರ್ ಅವರನ್ನು ಭರ್ಜರಿಯಾಗಿ ತೋರಿಸಲಾಗಿತ್ತು. ಹಾಗೆಯೇ ಟ್ರೈಲರ್ನಲ್ಲಿಯೂ ಶಿವರಾಜ್ ಕುಮಾರ್ ಕಾಣಿಸಿಕೊಳ್ಳಲಿದ್ದಾರೆ ಎಂಬ ನಿರೀಕ್ಷೆ ಇತ್ತು ಆದರೆ ಅದು ಹುಸಿಯಾಗಿದೆ. ಟ್ರೈಲರ್ ಕೇವಲ ರಜನಿಕಾಂತ್ಗೆ ಮಾತ್ರವೇ ಮೀಸಲಿಟ್ಟಂತಿದೆ. ಶಿವರಾಜ್ ಕುಮಾರ್ ಹಾಗೂ ಮೋಹನ್ಲಾಲ್ ಇಬ್ಬರೂ ಟ್ರೈಲರ್ನಲ್ಲಿ ಕಂಡು ಬಂದಿಲ್ಲ. ಟ್ರೈಲರ್ನಲ್ಲಿ ಮೊದ ಮೊದಲು ಪಾಪವೆನಿಸುವಂತೆ ಇರುವ ರಜನಿ, ಬಳಿಕ ಪೂರ್ಣವಾಗಿ ಮಾಸ್‌ ಅವತಾರ ತಾಳಿದ್ದಾರೆ.
ರಜನಿಕಾಂತ್ ಹೊರತಾಗಿ ನಟ ಸುನಿಲ್ ಟ್ರೈಲರ್ನ ಆರಂಭದಲ್ಲಿ ಸಣ್ಣ ತುಣುಕಿನಲ್ಲಿ ಕಾಣಿಸುತ್ತಾರೆ, ‘ಜೈಲರ್’ನಲ್ಲಿ ಅವರದ್ದು ಹಾಸ್ಯ ಪಾತ್ರ ಎಂಬುದು ಗೊತ್ತಾಗುತ್ತದೆ. ಬಾಲಿವುಡ್ ನಟ ಜಾಕಿ ಶ್ರಾಫ್ ವಿಲನ್ ಆಗಿ ಕಾಣಿಸಿಕೊಂಡಿದ್ದಾರೆ. ಇನ್ನು ಮಲಯಾಳಂ ನಟ ವಿನಾಯಕನ್ ಭಯಾನಕ ರೌಡಿಯಾಗಿ ಕಾಣಿಸಿಕೊಂಡಿದ್ದಾರೆ. ಟ್ರೈಲರ್ನಲ್ಲಿಯೇ ಅವರ ಅಭಿನಯ, ಪಾತ್ರದ ಅನಾವರಣವಾಗಿದೆ. ಇವುಗಳ ಹೊರತಾಗಿ ಅನಿರುದ್ಧ್ ರವಿಚಂದ್ರನ್ರ ಸಂಗೀತ, ಹಾಡಿನ ಬಿಟ್ ಗಮನ ಸೆಳೆಯುತ್ತದೆ.
ಇದನ್ನೂ ಓದಿ: Jailer Movie: ರಜನಿ- ಶಿವಣ್ಣ ಸೀನ್‌ಗೆ ಕತ್ತರಿ; 11 ಸೀನ್‌ಗಳನ್ನು ಬದಲಾಯಿಸಲು ಸೆನ್ಸಾರ್‌ ಮಂಡಳಿ ಸೂಚನೆ!
ರಜನಿಕಾಂತ್ ಮತ್ತು ಮೋಹನ್ ಲಾಲ್ ಕಾಂಬಿನೇಷನ್ ಸಿನಿಮಾ ಇದಾಗಿದ್ದು ಇದೇ ಮೊದಲ ಬಾರಿಗೆ ಇಬ್ಬರು ನಟರು ಒಟ್ಟಾಗಿ ಕಾಣಿಸಿಕೊಂಡಿದ್ದಾರೆ. ರಜನಿಕಾಂತ್ ಅವರ 169ನೇ ಚಿತ್ರ ಇದಾಗಿದೆ. ಸನ್ ಪಿಕ್ಚರ್ಸ್ ಬ್ಯಾನರ್ ಅಡಿಯಲ್ಲಿ ಕಲಾನಿಧಿ ಮಾರನ್ ನಿರ್ಮಿಸಿದ್ದಾರೆ. ಚಿತ್ರವು ಆಗಸ್ಟ್ 10 ರಂದು ಥಿಯೇಟರ್‌ಗಳಲ್ಲಿ ಬರುತ್ತಿದೆ.
ಕೇರಳದಲ್ಲಿ ಚಿತ್ರದ ವಿತರಣಾ ಹಕ್ಕುಗಳನ್ನು ಶ್ರೀ ಗೋಕುಲಂ ಮೂವೀಸ್ ಬ್ಯಾನರ್ ಅಡಿಯಲ್ಲಿ ಗೋಕುಲಂ ಗೋಪಾಲನ್ ಪಡೆದುಕೊಂಡಿದ್ದಾರೆ.