ಚೆನ್ನೈ: ತಮಿಳಿನ ಸೂಪರ್‌ ಸ್ಟಾರ್‌ ರಜನಿಕಾಂತ್‌ ನಟನೆಯ ಜೈಲರ್‌ ಸಿನಿಮಾ (Jailer Movie) ಬಾಕ್ಸ್‌ ಆಫೀಸ್‌ನಲ್ಲಿ ಒಳ್ಳೆಯ ಗಳಿಕೆ ಕಾಣುತ್ತಿದೆ. ಎರಡನೇ ವಾರದಲ್ಲೂ ಭರ್ಜರಿ ಪ್ರದರ್ಶನ ಕಾಣುತ್ತಿರುವ ಸಿನಿಮಾ ಸೋಮವಾರ 550 ಕೋಟಿ ರೂ. ಗಳಿಕೆ ಮೀರಿಸುವ ಸಾಧ್ಯತೆಯಿದೆ ಎಂದು ವರದಿಯಿದೆ.
ತಮಿಳು, ತೆಲುಗು, ಹಿಂದಿ, ಮಲಯಾಳಂ ಮತ್ತು ಕನ್ನಡ ಭಾಷೆಗಳಲ್ಲಿ ಬಿಡುಗಡೆಯಾಗಿರುವ ಜೈಲರ್‌ ಸಿನಿಮಾ ಭಾನುವಾರದಂದು 18.7 ಕೋಟಿ ರೂ. ಅನ್ನು ದೇಶದಾದ್ಯಂತ ಗಳಿಸಿಕೊಂಡಿದೆ. ಆ ಮೂಲಕ ಸಿನಿಮಾ ಭಾರತದಲ್ಲಿ ಗಳಿಸಿದ ಹಣ 280.85 ಕೋಟಿ ರೂ. ಆಗಿದೆ. ಹಾಗೆಯೇ ವಿಶ್ವದಾದ್ಯಂತ ಸಿನಿಮಾ ಒಟ್ಟು 543.96 ಕೋಟಿ ರೂ. ಗಳಿಸಿಕೊಂಡಿದೆ. ಅದರಲ್ಲಿ ಭಾನುವಾರದಂದೇ 29.71 ಕೋಟಿ ರೂ. ಗಳಿಕೆಯಾಗಿದೆ ಎಂದು ವರದಿಯಿದೆ.
ಇದನ್ನೂ ಓದಿ: Viral Video : ಕಾವಾಲಯ್ಯ ಹಾಡಿಗೆ ಮುಂಬೈ ಪೊಲೀಸ್ ಅಧಿಕಾರಿಯ ಸಖತ್‌ ಸ್ಟೆಪ್ಸ್‌!
ಜೈಲರ್‌ ಸಿನಿಮಾ ಮೊದಲನೇ ವಾರದಲ್ಲಿ ವಿಶ್ವದಾದ್ಯಂತ ಒಟ್ಟು 450.80 ಕೋಟಿ ರೂ. ಗಳಿಸಿತ್ತು. ಎರಡನೇ ವಾರದ ಮೊದಲನೇ ದಿನದಂದು 19.37 ಕೋಟಿ ರೂ., ಎರಡನೇ ದಿನದಂದು 17.22 ಕೋಟಿ ರೂ., ಮೂರನೇ ದಿನದಂದು 26.86 ಕೋಟಿ ರೂ. ಹಾಗೂ ನಾಲ್ಕನೇ ದಿನದಂದು 29.71 ಕೋಟಿ ರೂ. ಗಳಿಸಿಕೊಂಡಿದೆ. ಅಲ್ಲಿಗೆ ಒಟ್ಟಾರೆ ಗಳಿಗೆ 543.96 ಕೋಟಿ ರೂ. ಆಗಿದೆ. ಸೋಮವಾರದಂದು ಸಿನಿಮಾ ಕನಿಷ್ಠ 7 ಕೋಟಿ ರೂ. ಗಳಿಸಿಕೊಳ್ಳಲಿದ್ದು, ಸಿನಿಮಾದ ಒಟ್ಟಾರೆ ಗಳಿಕೆ 550 ಕೋಟಿ ರೂ. ಅನ್ನು ದಾಟಲಿದೆ.
ಜೈಲರ್‌ ಚಿತ್ರ ತಮಿಳು ಸಿನಿಮಾಗಳಲ್ಲಿ 500 ಕೋಟಿ ರೂ. ಗಳಿಕೆ ಮಾಡಿಕೊಂಡ ಮೂರನೇ ಸಿನಿಮಾವಾಗಿದೆ. ಈ ಹಿಂದೆ ರಜನಿಕಾಂತ್‌ ಹಾಗೂ ಅಕ್ಷಯ್‌ ಕುಮಾರ್‌ ನಟನೆಯ 2.0 ಸಿನಿಮಾ ಅತಿ ವೇಗವಾಗಿ 500 ಕೋಟಿ ರೂ. ಕ್ಲಬ್‌ ಸೇರಿಕೊಂಡಿತ್ತು. ಅದಾದ ನಂತರ ಅತಿ ಬೇಗ 500 ಕೋಟಿ ರೂ. ಗಳಿಸಿಕೊಂಡ ಸಿನಿಮಾವಾಗಿ ಜೈಲರ್‌ ಸಿನಿಮಾ ಹೊರಹೊಮ್ಮಿದೆ.
ಇದನ್ನೂ ಓದಿ: Viral News: 25 ವರ್ಷದ ರೈತನನ್ನು ಒಂದೇ ಏಟಿಗೆ ನುಂಗಿದ್ದ 23 ಅಡಿ ಉದ್ದದ ಹೆಬ್ಬಾವು!
ನೆಲ್ಸನ್‌ ದಿಲೀಪ್‌ ಕುಮಾರ್‌ ನಿರ್ದೇಶನ ಮಾಡಿರುವ ಜೈಲರ್‌ ಸಿನಿಮಾದಲ್ಲಿ ತಲೈವಾ ಜತೆಯಲ್ಲಿ ನಟಿ ತಮನ್ನಾ ಭಾಟಿಯಾ, ರಮ್ಯಾ ಕೃಷ್ಣನ್, ವಸಂತ್‌ ರವಿ, ವಿನಾಯಕನ್‌ ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ಕನ್ನಡದ ಹ್ಯಾಟ್ರಿಕ್‌ ಹೀರೋ ಶಿವರಾಜ್‌ ಕುಮಾರ್‌ ಅವರೂ ಸಿನಿಮಾದಲ್ಲಿ ನಟಿಸಿದ್ದು, ಅವರ ಪಾತ್ರ ಅನೇಕರ ಮೆಚ್ಚುಗೆಗೆ ಪಾತ್ರವಾಗಿದೆ. ಅವರಲ್ಲದೆ ಸಿನಿಮಾದಲ್ಲಿ ಜಾಕಿ ಶರಾಫ್‌, ಮಲಯಾಳಂನ ನಟ ಮೋಹನ್‌ಲಾಲ್‌ ಕೂಡ ನಟಿಸಿದ್ದಾರೆ. ಸನ್‌ ಪಿಕ್ಚರ್ಸ್‌ ಬ್ಯಾನರ್‌ನಲ್ಲಿ ಸಿದ್ಧವಾಗಿರುವ ಸಿನಿಮಾಕ್ಕೆ ಅನಿರುಧ್‌ ರವಿಚಂದ್ರ ಅವರು ಸಂಗೀತ ನಿರ್ದೇಶನ ಮಾಡಿದ್ದಾರೆ.