ಬೆಂಗಳೂರು: ಶಾರುಖ್ ಖಾನ್ ಅವರ ʻಜವಾನ್ʼ ಸಿನಿಮಾ (Jawan Box Office Day 1) ಬಿಡುಗಡೆಗೆ ಕ್ಷಣಗಣನೆ ಪ್ರಾರಂಭವಾಗಿದೆ. ಅಭಿಮಾನಿಗಳು ತಮ್ಮ ಪ್ರೀತಿಯ ತಾರೆಯನ್ನು ಪರದೆಯ ಮೇಲೆ ನೋಡಲು ಕಾತುರದಿಂದ ಕಾಯುತ್ತಿದ್ದಾರೆ. ಈಗಾಗಲೇ ಜವಾನ್ ಟ್ರೈಲರ್‌ ಬಿಡುಗಡೆಗೊಂಡಿದೆ. ಹಲವು ಅವತಾರದಲ್ಲಿ ಶಾರುಖ್ ಕಂಡಿದ್ದಾರೆ. ಸಖತ್‌ ಥ್ರಿಲ್ ಆಗಿದೆ ಎಂದು ಪ್ರೇಕ್ಷಕರು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ವಿಶೇಷವಾಗಿ ಶಾರುಖ್ ಅವರ ʻಪಠಾಣ್ʼ ಸಿನಿಮಾ ಬ್ಲಾಕ್‌ಬಸ್ಟರ್ ಯಶಸ್ಸಿನ ನಂತರ ಜವಾನ್ ಸಿನಿಮಾ ಹೇಗಿರಬಹುದು ಎಂಬ ಕುತೂಹಲ ಅಭಿಮಾನಿಗಳಲ್ಲಿ ಹೆಚ್ಚಾಗಿದೆ. ಪಠಾಣ್ ಜಾಗತಿಕ ಬಾಕ್ಸ್ ಆಫೀಸ್‌ನಲ್ಲಿ 1050 ರೂ. ಕೋಟಿಗಿಂತ ಹೆಚ್ಚು ಗಳಿಕೆ ಕಂಡಿತ್ತು. ದೇಶೀಯ ನಿವ್ವಳ ಬಾಕ್ಸ್ ಆಫೀಸ್‌ನಲ್ಲಿ 524 ಕೋಟಿ ರೂ. ಕಲೆಕ್ಷನ್ ಮಾಡಿತ್ತು. ಇದೀಗ ವರದಿಗಳ ಪ್ರಕಾರ ʻಜವಾನ್ʼ ಸಿನಿಮಾ ಮೊದಲ ದಿನದ ಒಟ್ಟು ಎಲ್ಲಾ ಭಾಷೆಗಳಲ್ಲಿ 85 ಕೋಟಿ ರೂ ಕಲೆಕ್ಷನ್ ಮಾಡಲಿದೆ ಎಂದು ಟ್ರೇಡ್ ವಿಶ್ಲೇಷಕ ತರಣ್ ಆದರ್ಶ್ ಹೇಳಿಕೆ ನೀಡಿದ್ದಾರೆ.
ಆಗಸ್ಟ್‌ 30ರಂದು ಶಾರುಖ್ ಖಾನ್ ಮತ್ತು ವಿಜಯ್ ಸೇತುಪತಿ ಸೇರಿದಂತೆ ಚಿತ್ರದ ನಿರ್ಮಾಪಕರು ಚೆನ್ನೈನಲ್ಲಿ ನಡೆದ ಆಡಿಯೊ ಲಾಂಚ್‌ ಬಿಡುಗಡೆ ಸಮಾರಂಭದಲ್ಲಿ ಭಾಗವಹಿಸಿದ್ದರು. ಈ ಬಾರಿಯೂ ಸಹ, ಪ್ರಿ-ರಿಲೀಸ್ ಹೈಪ್ ಹೆಚ್ಚಾಗಿದೆ. ಇದೀಗ ಟ್ರೇಡ್ ವಿಶ್ಲೇಷಕರು ಶಾರುಖ್ ಅವರ ಜವಾನ್ ಸಿನಿಮಾ ಮೊದಲ ದಿನದ ಕಲೆಕ್ಷನ್ ಹಿಂದಿನ ಎಲ್ಲ ದಾಖಲೆಗಳನ್ನು ಮುರಿಯಲಿದೆ. ಹಾಗೂ ಹೊಸ ದಾಖಲೆಗಳನ್ನು ನಿರ್ಮಿಸಲಿದೆ ಎಂದು ಹೇಳಿಕೆ ನೀಡಿದ್ದಾರೆ.
ಟ್ರೇಡ್ ವಿಶ್ಲೇಷಕ ತರಣ್ ಆದರ್ಶ್ ಅವರ ಪ್ರಕಾರ್‌ ʻʻಜವಾನ್ ಸುನಾಮಿ ಇದ್ದಂತೆ. ಹೆಚ್ಚಿನ ಬೇಡಿಕೆಯ ಸಿನಿಮಾ. ಹಿಂದಿ ಭಾಷೆಯಲ್ಲಿ ಜವಾನ್ ಸಿನಿಮಾ ಮೊದಲ ದಿನ 60-65 ಕೋಟಿ ರೂ. ಸುಲಭವಾಗಿ ಕಲೆಕ್ಷನ್ ಮಾಡುತ್ತದೆ. ಇದಲ್ಲದೇ ಈ ಚಿತ್ರವನ್ನು ಅಟ್ಲೀ ನಿರ್ದೇಶಿಸಿರುವುದರಿಂದ ಮತ್ತು ವಿಜಯ್ ಸೇತುಪತಿ ಮತ್ತು ನಯನತಾರಾ ಸೇರಿದಂತೆ ತಮಿಳು ಇಂಡಸ್ಟ್ರಿಯ ಕೆಲವು ಮುಖ್ಯ ಕಲಾವಿದರು ಇರುವುದರಿಂದ ದಕ್ಷಿಣ ಭಾರತದಲ್ಲಿ ಬಜ್ ಹೆಚ್ಚಾಗಲಿದೆ. ಮೊದಲ ದಿನದ ಎಲ್ಲಾ ಭಾಷೆಗಳಲ್ಲಿ ಸೇರಿ ಜವಾನ್ 85 ಕೋಟಿ ರೂ. ಕಲೆಕ್ಷನ್ ಮಾಡಲಿದೆʼʼಎಂದು ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: Jawan Movie: ಶಾರುಖ್ ಖಾನ್ ʻಜವಾನ್ʼ ಚಿತ್ರಕ್ಕೆ ಯಶ್‌, ಪೃಥ್ವಿರಾಜ್ ಸುಕುಮಾರನ್ ಸಾಥ್‌!
ಆಡಿಯೊ ಲಾಂಚ್‌ ಸಮಾರಂಭದಲ್ಲಿ ಉಪಸ್ಥಿತರಿದ್ದ ಟ್ರೇಡ್ ಗುರು ರಮೇಶ್ ಬಾಲಾ ಈ ಬಗ್ಗೆ ಮಾತನಾಡಿ ʻʻಶಾರುಖ್ ಜನಪ್ರಿಯತೆ ಯಾವುದೇ ತಮಿಳು ಸೂಪರ್‌ಸ್ಟಾರ್‌ಗಿಂತ ಕಡಿಮೆಯಿಲ್ಲ. ಪಠಾಣ್ ಮೊದಲ ದಿನದಲ್ಲಿ ಭಾರತದಲ್ಲಿ 57 ಕೋಟಿ ರೂ. ಸಂಗ್ರಹಿಸಿದೆ, ಅದರಲ್ಲಿ 55 ಕೋಟಿ ರೂಪಾಯಿ ಹಿಂದಿ ಆವೃತ್ತಿಯಿಂದ ಮತ್ತು ಉಳಿದ 2 ಕೋಟಿ ರೂಪಾಯಿಗಳನ್ನು ತಮಿಳು ಮತ್ತು ತೆಲುಗು ಆವೃತ್ತಿಗಳಿಂದ. ಜವಾನ್ ಡಬ್ಬಿಂಗ್ ಆವೃತ್ತಿಗಳಲ್ಲಿ ಕನಿಷ್ಠ 20 ಕೋಟಿ ರೂ. ಹೆಚ್ಚು ಸಂಗ್ರಹಿಸುತ್ತದೆ ಎಂಬುದು ನನಗೆ ಖಾತ್ರಿಯಿದೆʼʼಎಂದು ಹೇಳಿಕೊಂಡಿದ್ದಾರೆ.
ಟ್ರೇಡ್ ವಿಶ್ಲೇಷಕ ಆದರ್ಶ್ ಈ ಬಗ್ಗೆ ಮಾತನಾಡಿ, “ಜವಾನ್ ಕ್ರೇಜ್ ಅಭೂತಪೂರ್ವವಾಗಿದೆ. ದಕ್ಷಿಣ ಭಾರತದ ಮಾರುಕಟ್ಟೆಯಲ್ಲೂ ಪ್ರಾಬಲ್ಯ ಸಾಧಿಸುವ ನಿರೀಕ್ಷೆಯಿದೆ. ಸೌತ್ ಬಾಕ್ಸ್ ಆಫೀಸ್‌ನಲ್ಲಿ ಮಾತ್ರ 100 ಕೋಟಿ ದಾಟಿದ ಮೊದಲ ಬಾಲಿವುಡ್ ನಟನಾಗಿ ಹೊರಹೊಮ್ಮಲಿದ್ದಾರೆʼʼಎಂದರು.
ಭಾರತದಲ್ಲಿ ಇದುವರೆಗೂ ಬುಕಿಂಗ್ ಶುರುವಾಗದಿದ್ದರೂ ಅಮೆರಿಕಾ ಮತ್ತು ಕೆನಡಾದಲ್ಲಿ ಬುಕಿಂಗ್‌ಗಳು ಶುರುವಾಗಿವೆ. ಅಮೆರಿಕದಲ್ಲಿ 450 ಸ್ಥಳಗಳಲ್ಲಿ ಪ್ರಿ ಬುಕ್ಕಿಂಗ್‌ನಲ್ಲಿ 2 ಕೋಟಿ ರೂ. ಗಳಿಸಿದೆ. ಮಾರಾಟವಾದ ಒಟ್ಟು ಟಿಕೆಟ್‌ಗಳ ಸಂಖ್ಯೆ 13,750 ಆಗಿದೆ.
ಇದನ್ನೂ ಓದಿ: Jawan Movie: ಬುರ್ಜ್ ಖಲೀಫಾದಲ್ಲಿ `ಜವಾನ್ ಟ್ರೈಲರ್‌’ ಲಾಂಚ್‌; ಕೆಂಪು ಬಟ್ಟೆ ಧರಿಸಿ ಬನ್ನಿ ಎಂದ ಶಾರುಖ್!
ಈ ಚಿತ್ರದಲ್ಲಿ ಶಾರುಖ್ ದ್ವಿಪಾತ್ರದಲ್ಲಿ ನಟಿಸುತ್ತಿದ್ದಾರೆ ಎಂದು ವರದಿಯಾಗಿತ್ತು. ಟೈಮ್ಸ್ ನೌ ಪ್ರಕಾರ ಕಿಂಗ್ ಖಾನ್ ಚಿತ್ರದಲ್ಲಿ ಫೈಟರ್ (ತಂದೆ) ಮತ್ತು ಜೈಲರ್ (ಮಗ) ಪಾತ್ರವನ್ನು ನಿರ್ವಹಿಸಲಿದ್ದಾರೆ. ಎಸ್‌ಆರ್‌ಕೆ ಆರು ವಿಭಿನ್ನ ಲುಕ್‌ಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗಿದೆ. ಜವಾನ್‌ನಲ್ಲಿ ಶಾರುಖ್ ಖಾನ್ ಅವರ ಜೈಲರ್ ಪಾತ್ರಕ್ಕೆ ಆಜಾದ್ ಎಂದು ಹೆಸರಿಡಲಾಗಿದೆ.‘ಜವಾನ್’ ಚಿತ್ರವನ್ನು ರೆಡ್ ಚಿಲ್ಲೀಸ್ ಎಂಟರ್‌ಟೇನ್‌ಮೆಂಟ್ ಸಂಸ್ಥೆಯಡಿ ಗೌರಿ ಖಾನ್ ನಿರ್ಮಿಸುತ್ತಿದ್ದು, ಅಟ್ಲಿಯವರ ನಿರ್ದೇಶನದಲ್ಲಿ ಮೂಡಿಬಂದಿದೆ. ಚಿತ್ರದ ಮ್ಯೂಸಿಕ್‌ ರೈಟ್ಸ್‌ ಈಗಾಗಲೇ 36 ಕೋಟಿ ರೂ.ಗೆ ಮಾರಾಟವಾಗಿದೆ ಎಂದು ವರದಿಯಾಗಿದೆ.