ಮುಂಬೈ: ಅಮಿತಾಭ್‌ ಬಚ್ಚನ್‌ ನಟನೆಯ ಶೋಲೆ ಸಿನಿಮಾ ಪೂರ್ತಿ ಭಾರತದಲ್ಲಿ ದೊಡ್ಡ ಹೆಸರು ಮಾಡಿದಂತಹ ಸಿನಿಮಾ. ಇಂದಿಗೂ ಅನೇಕರಿಗೆ ಫೇವರಿಟ್‌ ಸಿನಿಮಾಗಳ ಪಟ್ಟಿಯಲ್ಲಿ ಶೋಲೆ ಸಿನಿಮಾವಿದೆ. ಆದರೆ ನಟ ಕಮಲ ಹಾಸನ್‌ (Kamal Haasan) ಅವರಿಗೆ ಆ ಸಿನಿಮಾ ಇಷ್ಟವಾಗಿರಲಿಲ್ಲವಂತೆ. ಅವರು ಸಿನಿಮಾ ನೋಡಿದ ದಿನ ರಾತ್ರಿ ನಿದ್ರೆಯನ್ನೇ ಮಾಡಿರಲಿಲ್ಲವಂತೆ.
ಹೌದು. ಈ ಮಾತನ್ನು ಸ್ವತಃ ಕಮಲ ಹಾಸನ್‌ ಅವರೇ ಹೇಳಿಕೊಂಡಿದ್ದಾರೆ. ಸ್ಯಾನ್ ಡಿಯಾಗೋ ಕಾಮಿಕ್-ಕಾನ್ ಕಾರ್ಯಕ್ರಮದಲ್ಲಿ ಶುಕ್ರವಾರದಂದು ಕಮಲ ಹಾಸನ್‌ ಅವರು ನಿರ್ದೇಶಕ ನಾಗ್‌ ಅಶ್ವಿನ್‌ ಅವರೊಂದಿಗೆ ತಾವು ಮಾಡುತ್ತಿರುವ ಹೊಸ ಸಿನಿಮಾ ಕಲ್ಕಿ 2998 ಎಡಿ ಸಿನಿಮಾವನ್ನು ಘೋಷಿಸಿದ್ದಾರೆ. ಈ ಸಿನಿಮಾದಲ್ಲಿ ನಟ ಪ್ರಭಾಸ್‌, ರಾಣಾ ದಗ್ಗುಬಾಟಿ ಕೂಡ ನಟಿಸುತ್ತಿದ್ದು, ಅವರು ಕೂಡ ಈ ಕಾರ್ಯಕ್ರಮದಲ್ಲಿ ಹಾಜರಾಗಿದ್ದರು. ಬಾಲಿವುಡ್‌ನ ಅಮಿತಾಭ್‌ ಮತ್ತು ದೀಪಿಕಾ ಪಡುಕೋಣೆ ಕೂಡ ಈ ಸಿನಿಮಾದಲ್ಲಿ ಮುಖ್ಯ ಪಾತ್ರದಲ್ಲಿದ್ದಾರಾದರೂ ಅವರು ಕಾರ್ಯಕ್ರಮದಲ್ಲಿ ಹಾಜರಾಗಿರಲಿಲ್ಲ.
ಇದನ್ನೂ ಓದಿ: Viral News : ಮಕ್ಕಳ ಕೈಗೆ ಕಾರಿನ ಕೀ ಕೊಟ್ಟರೆ ಅನಾಹುತ ಖಾತರಿ; ಇಲ್ಲಿದೆ ನೋಡಿ ಒಂದು ಘಟನೆ
ಸಿನಿಮಾ ಬಗ್ಗೆ ಮಾತನಾಡುವಾಗ ಕಮಲ ಹಾಸನ್‌ ಅವರು ಅಮಿತಾಭ್‌ ಅವರನ್ನು ಹೊಗಳಿದ್ದಾರೆ. ಹಾಗೆಯೇ ಅಮಿತಾಭ್‌ ಕೂಡ ವಿಡಿಯೊ ಕಾಲ್‌ ಮೂಲಕ ಸಂಪರ್ಕಕ್ಕೆ ಬಂದಿದ್ದು, “ನೀವು ನಮ್ಮನ್ನು ಹೊಗಳಬೇಡಿ. ನೀವು ನಮ್ಮೆಲ್ಲರಿಗಿಂತ ದೊಡ್ಡವರು. ನೀವು ಮಾಡಿರುವ ಸಾಧನೆಯ ಕೆಲಸವನ್ನು ನಾವು ಮಾಡುವುದು ತುಂಬಾ ಕಷ್ಟ. ನಿಮ್ಮ ಪ್ರತಿಯೊಂದು ಚಿತ್ರವು ನೈಜತೆ ಮತ್ತು ಶ್ರಮದಿಂದ ತುಂಬಿದೆ” ಎಂದು ಹೇಳಿದ್ದಾರೆ.
ಅದಕ್ಕೆ ಪ್ರತಿಯಾಗಿ ಮಾತನಾಡಿದ ನಟ ಕಮಲ ಹಾಸನ್‌, “ಅಮಿತಾಭ್‌ ಅವರ ಪ್ರಸಿದ್ಧ ಶೋಲೆ ಸಿನಿಮಾ ನಿಮಗೆಲ್ಲರಿಗೂ ನೆನಪಿರಬಹುದು. ಆ ಸಿನಿಮಾಕ್ಕೆ ನಾನು ಸಹಾಯಕ ನಿರ್ದೇಶಕನಾಗಿ ಕೆಲಸ ಮಾಡಿದ್ದೆ. ಸಿನಿಮಾ ಬಿಡುಗಡೆಯಾದಾಗ ನಾನು ಆ ಸಿನಿಮಾವನ್ನು ಇಷ್ಟಪಟ್ಟಿರಲಿಲ್ಲ. ಅದರಲ್ಲೂ ಅದರ ನಿರ್ದೇಶಕರನ್ನಂತೂ ತೀರಾ ದ್ವೇಷಿಸಿದ್ದೆ. ಆದರೆ ಅಂತಹ ಮಹಾನ್‌ ನಿರ್ದೇಶಕರೊಂದಿಗೆ ನನಗೆ ಕೆಲಸ ಮಾಡಲು ಅವಕಾಶ ಸಿಕ್ಕಿತ್ತು. ಒಬ್ಬ ಸಿನಿಮಾ ಕೆಲಸಗಾರನಾಗಿ ಆ ಸಿನಿಮಾವನ್ನು ತೆರೆ ಮೇಲೆ ನೋಡಿದಾಗ ನನಗೆ ಆ ರಾತ್ರಿ ನಿದ್ರೆಯೂ ಬಂದಿರಲಿಲ್ಲ. ಆ ಸಿನಿಮಾ ಅಷ್ಟೊಂದು ಅದ್ಭುತವಾಗಿತ್ತು. ಅಮಿತ್‌ ಜೀ ಅಷ್ಟೊಂದು ಒಳ್ಳೆಯ ಸಿನಿಮಾಗಳನ್ನು ಮಾಡಿದ್ದಾರೆ. ಅವರು ನನ್ನ ಸಿನಿಮಾಗಳ ಬಗ್ಗೆ ಒಳ್ಳೆಯ ಮಾತನಾಡುತ್ತಾರೆ ಎಂದು ಆಗ ಸಹಾಯಕ ನಿರ್ದೇಶಕನಾಗಿದ್ದ ನಾನು ಎಂದಿಗೂ ಊಹಿಸಿರಲಿಲ್ಲ” ಎಂದು ಹೇಳಿದ್ದಾರೆ.
ಇದನ್ನೂ ಓದಿ: Viral news: ಭೂಮಿಗೆ ಇನ್ನೊಂದು ಭಾರೀ ತೂತು ಕೊರೆಯಲಿದೆ ಚೀನಾ!
ಶೋಲೆ ಸಿನಿಮಾ ನಂತರ ಅಮಿತಾಭ್‌ ಮತ್ತು ಕಮಲ ಹಾಸನ್‌ ಅವರು 1985ರ ಗೆರಾಫ್ತಾರ್‌ ಸಿನಿಮಾದಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದರು. ಆ ಸಿನಿಮಾದಲ್ಲಿ ಸೂಪರ್‌ ಸ್ಟಾರ್‌ ರಜನಿಕಾಂತ್‌ ಕೂಡ ಇದ್ದರು. ಇದೀಗ ನಾಗ್‌ ಅಶ್ವಿನ್‌ ಅವರ ಸಿನಿಮಾ ಮೂಲಕ ಕಮಲ ಹಾಸನ್‌ ಮತ್ತು ಅಮಿತಾಭ್‌ ಮತ್ತೆ ಒಟ್ಟಿಗೆ ಕೆಲಸ ಮಾಡುವಂತಾಗಿದೆ.ಈ ಸಿನಿಮಾವನ್ನು ವೈಜಯಂತಿ ಮೂವೀಸ್‌ ಬ್ಯಾನರ್‌ನಲ್ಲಿ ನಿರ್ಮಿಸಲಾಗುತ್ತಿದೆ. ಸಿನಿಮಾದಲ್ಲಿ ದಿಶಾ ಪಟಾನಿ ಕೂಡ ನಟಿಸುವ ಸಾಧ್ಯತೆಯಿದೆ. ಈ ಸಿನಿಮಾ 2024ರ ಜನವರಿ 12ರಂದು ಬಿಡುಗಡೆಯಾಗಲಿದೆ.