ಮುಂಬೈ: ಹೃತಿಕ್‌ ರೋಷನ್‌ ಮತ್ತು ಪ್ರೀತಿ ಜಿಂಟಾ ನಟನೆಯ ʼಕೋಯಿ ಮಿಲ್‌ ಗಯಾʼ ಸಿನಿಮಾ (Koi Mil Gaya Movie) ನಿಮಗೆ ನೆನಪಿರಬಹುದು. ಅನ್ಯಗ್ರಹ ಜೀವಿಯೊಂದು ಭೂಮಿಗೆ ಬಂದು ಮಾನವರೊಡನೆ ಬದುಕುವ ವಿಶೇಷ ಕಥೆಯುಳ್ಳ ಸಿನಿಮಾ ಅದಾಗಿತ್ತು. ಅಂದ ಹಾಗೆ ಈ ಸಿನಿಮಾ ಬಿಡುಗಡೆಯಾಗಿ ಈ ಆಗಸ್ಟ್‌ 8ಕ್ಕೆ ಬರೋಬ್ಬರಿ 20 ವರ್ಷಗಳು ಪೂರ್ಣವಾಗಲಿವೆ. ಅದೇ ಸಂಭ್ರಮದ ಹಿನ್ನೆಲೆಯಲ್ಲಿ ಸಿನಿಮಾ ತಂಡ ಕೊಯಿ ಮಿಲ್‌ ಗಯಾ ಸಿನಿಮಾವನ್ನು ಮರು ಬಿಡುಗಡೆ ಮಾಡಲು ನಿರ್ಧರಿಸಿದೆ.
ಹೌದು. ʼಕೋಯಿ ಮಿಲ್‌ ಗಯಾʼ ಸಿನಿಮಾ ಮರುಬಿಡುಗಡೆಯಾಗುತ್ತಿದೆ. ಈ ತಿಂಗಳ 4ನೇ ತಾರೀಖಿನಂದು ದೇಶದ 30 ಪ್ರಮುಖ ನಗರಗಳಲ್ಲಿ ಸಿನಿಮಾವನ್ನು ಮರುಬಿಡುಗಡೆ ಮಾಡಲು ತೀರ್ಮಾನಿಸಲಾಗಿದೆ. ಈ ಸಿನಿಮಾವನ್ನು ಪ್ರಸಿದ್ಧ ನಿರ್ದೇಶಕ, ಹೃತಿಕ್‌ ರೋಷನ್‌ ಅವರ ತಂದೆ ರಾಕೇಶ್‌ ರೋಷನ್‌ ಅವರು ನಿರ್ದೇಶನ ಮಾಡಿದ್ದರು.
ಇದನ್ನೂ ಓದಿ: Viral Video : ಫೇರ್‌ವೆಲ್‌ ದಿನದಂದು ಸೀರೆಯುಟ್ಟು ಹುಚ್ಚೆಬ್ಬಿಸುವಂತೆ ಕುಣಿದ ಯುವತಿಯರು!
ಈ ಬಗ್ಗೆ ಸಿನಿಮಾ ವಿಶ್ಲೇಷಕರಾಗಿರುವ ತರಣ್‌ ಆದರ್ಶ್‌ ಅವರು ಟ್ವಿಟರ್‌ನಲ್ಲಿ ಮಾಹಿತಿ ನೀಡಿದ್ದಾರೆ. ” ಕೋಯಿ ಮಿಲ್‌ ಗಯಾʼ ಸಿನಿಮಾ 20ನೇ ವರ್ಷದ ವಾರ್ಷಿಕೋತ್ಸವವನ್ನು 30 ನಗರಗಳಲ್ಲಿ ಮರು ಬಿಡುಗಡೆಯೊಂದಿಗೆ ಆಚರಿಸುತ್ತಿದೆ. ಈ ಸಿನಿಮಾ ಅದ್ಭುತವಾದ ಮನರಂಜನೆ, ಶಕ್ತಿಯುತ ಕಥೆ ಮತ್ತು ಹೃತಿಕ್‌ ಅವರ ಅದ್ಭುತ ನಟನೆಯಿಂದಾಗಿ ಇಂದಿಗೂ ಎಲ್ಲರ ನೆನಪಿನಲ್ಲಿದೆ” ಎಂದು ಬರೆದುಕೊಂಡಿದ್ದಾರೆ.
RAKESH ROSHAN – HRITHIK ROSHAN: ‘KOI MIL GAYA’ CELEBRATES 20TH ANNIVERSARY WITH RE-RELEASE ACROSS 30 CITIES… On the occasion of 20 years of #KoiMilGaya, the much-loved and hugely successful film is set to re-release at #PVR #INOX cinemas across 30 cities in #India from 4 Aug… pic.twitter.com/9vXIRm2NjT
— taran adarsh (@taran_adarsh) August 2, 2023
ಈ ಬಗ್ಗೆ ಸಿನಿಮಾದ ನಿರ್ದೇಶಕ ರಾಕೇಶ್‌ ರೋಷನ್‌ ಅವರು ಮಾತನಾಡಿದ್ದು, “ಪಿವಿಆರ್‌ ಐನಾಕ್ಸ್‌ ತಂಡವು ನಮ್ಮ ಸಿನಿಮಾದ 20 ವರ್ಷದ ಆಚರಣೆಯಾಗಿ ಸಿನಿಮಾವನ್ನು ಮರುಬಿಡುಗಡೆ ಮಾಡಲು ಸಿದ್ಧವಾಗಿವೆ. ಆಗಸ್ಟ್‌ 4ರಂದು 30 ನಗರಗಳಲ್ಲಿ ಸಿನಿಮಾ ಮರುಬಿಡುಗಡೆಯಾಗಲಿದೆ. ಈಗಿನ ಪೋಷಕರು ತಮ್ಮ ಮಕ್ಕಳನ್ನು ಸಿನಿಮಾ ಹಾಲ್‌ಗೆ ಕರೆದೊಯ್ದು ಈ ಸಿನಿಮಾವನ್ನು ತೋರಿಸಲಿ. ಮಕ್ಕಳಿಗೆ ಇದು ತುಂಬಾ ಇಷ್ಟವಾಗುವ ಸಿನಿಮಾವಾಗಿದೆ” ಎಂದು ಹೇಳಿದ್ದಾರೆ.
“ನಾವು ಕೊಯಿ ಮಿಲ್‌ ಗಯಾ ಸಿನಿಮಾವನ್ನು ಮಕ್ಕಳ ಚಿತ್ರವನ್ನಾಗಿ ಮಾಡಲು ಹೊರಟಿದ್ದೆವು. ಮಕ್ಕಳಿಗೆ ಇದು ಒಳ್ಳೆಯ ಮನರಂಜನೆಯಾಗಲಿದೆ ಎಂದು ಸಿನಿಮಾ ಮಾಡಿದೆವು. ಸಿನಿಮಾ ನಿರ್ದೇಶಕನಾಗಿ ಅನ್ಯಗ್ರಹದ ಜೀವಿಯೊಂದಿಗೆ ಸಿನಿಮಾ ಮಾಡುವುದೆಂದರೆ ಅದು ಕಲ್ಪನೆಗಳನ್ನು ಮೀರಿದ್ದಾಗಿತ್ತು. ಆದರೆ ಪ್ರೇಕ್ಷಕರು ನನ್ನ ಊಹೆಗೆ ಮೀರಿದ ಫಲಿತಾಂಶವನ್ನು ತಂದುಕೊಟ್ಟರು. ಮಕ್ಕಳು ಮಾತ್ರವಲ್ಲದೆ ಎಲ್ಲ ವಯಸ್ಸಿನವರು ಕೂಡ ಸಿನಿಮಾವನ್ನು ಹೆಚ್ಚು ಇಷ್ಟಪಟ್ಟು ನೋಡಿದರು. ಈ ಸಿನಿಮಾ ನನ್ನನ್ನು ನಿರ್ದೇಶಕನಾಗಿ ಮುಂದುವರಿಯಲು ಪ್ರೇರೇಪಿಸಿತು” ಎಂದೂ ಅವರು ಸಿನಿಮಾ ಬಗೆಗಿನ ನೆನಪುಗಳನ್ನು ಮೆಲುಕು ಹಾಕಿದ್ದಾರೆ.
ಇದನ್ನೂ ಓದಿ: Viral News : ವಿಶ್ವದ ಅತ್ಯಂತ ಹಿರಿಯ ವ್ಯಕ್ತಿ ಇನ್ನಿಲ್ಲ; ಅಬ್ಬಾ! ಎಷ್ಟೊಂದು ವರ್ಷ ಬದುಕಿದ್ದರು!
ʼಕೋಯಿ ಮಿಲ್‌ ಗಯಾʼ ಸಿನಿಮಾದಲ್ಲಿ ಹೃತಿಕ್‌ ಹಾಗೂ ಪ್ರೀತಿ ಅವರ ಜತೆಯಲ್ಲಿ ರೇಖಾ, ಜಾನಿ ಲಿವರ್, ರಜತ್ ಬೇಡಿ, ಪ್ರೇಮ್ ಚೋಪ್ರಾ ಮತ್ತು ಬಾಲ ಕಲಾವಿದರಾದ ಹಂಸಿಕಾ ಮೋಟ್ವಾನಿ, ಅನುಜ್ ಪಂಡಿತ್ ಶರ್ಮಾ ಪ್ರಮುಖ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದರು.