ಬೆಂಗಳೂರು : ಕಾಂತಾರ ಸಿನಿಮಾ (Kantara Movie) ಇನ್ನೂ ಹಲವೆಡೆ ಹೌಸ್‌ಫುಲ್‌ ಪ್ರದರ್ಶನಗಳು ಕಾಣುತ್ತಿವೆ. ಹದಿನಾರು ಕೋಟಿ ಬಜೆಟ್‌ನಲ್ಲಿ ತಯಾರಾದ ಈ ಚಿತ್ರ ಇದೀಗ 400 ಕೋಟಿ ರೂ. ಕ್ಲಬ್ ಸೇರುವತ್ತ ದಾಪುಗಾಲು ಇಟ್ಟಿದೆ. ಕನ್ನಡದಲ್ಲಿ ಭರ್ಜರಿ ರೆಸ್ಪಾನ್ಸ್ ಪಡೆದಿರುವ ಸಿನಿಮಾ ತೆಲುಗು, ಹಿಂದಿ, ತಮಿಳು ಹಾಗೂ ಮಲಯಾಳಂ ಬಾಕ್ಸ್ ಆಫೀಸ್‌ನಲ್ಲೂ ಸದ್ದು ಮಾಡುತ್ತಿದೆ. ಇತ್ತೀಚೆಗಷ್ಟೇ ದಕ್ಷಿಣ ಭಾರತದ ಸೂಪರ್ ಸ್ಟಾರ್ ರಜನಿಕಾಂತ್ ಕೂಡ ಚಿತ್ರವನ್ನು ನೋಡಿ ಹಾಡಿ ಹೊಗಳಿದ್ದರು. ಇವೆಲ್ಲದರ ನಡುವೆ ಮಾಲಿವುಡ್‌ ನಟಿ ಮಂಜು ಪಾತ್ರೋಜ್‌ ಚಿತ್ರದ ಬಾಡಿ ಶೇಮಿಂಗ್‌ ಕುರಿತಾಗಿ ಮಾತನಾಡಿದ್ದಾರೆ. ಇನ್‌ಸ್ಟಾಗ್ರಾಮ್‌ನಲ್ಲಿ ಈ ಕುರಿತು ನಟಿ ಪೋಸ್ಟ್‌ ಮಾಡಿಕೊಂಡಿದ್ದಾರೆ.
ʻʻಎರಡು ದಿನಗಳ ಹಿಂದೆ ಕಾಂತಾರ ಸಿನಿಮಾ ನೋಡಿದ್ದೆ. ಸಿನಿಮಾ ತುಂಬಾ ಇಷ್ಟವಾಯಿತು. ಆದರೆ ನಾನು ನೋಡಿದ ಒಂದು ದೃಶ್ಯದಲ್ಲಿ ಒಂದು ಪಾತ್ರವನ್ನು ಬಾಡಿ ಶೇಮಿಂಗ್‌ಗೆ ಒಳಪಡಿಸಲಾಗಿದೆʼʼ ಎಂದು ನಟಿ ಮಂಜು ಪಾತ್ರೋಜ್‌ ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ | Kantara Movie | ಕಾಂತಾರ ಸಿನಿಮಾ ನನ್ನದೇ: ರಾಕಿಂಗ್‌ ಸ್ಟಾರ್ ಯಶ್‌!
ʻʻಕಾಂತಾರ ಚಿತ್ರವನ್ನು ಎರಡು ದಿನಗಳ ಹಿಂದೆ ನೋಡಿದ್ದೆ. ರಿಷಬ್ ಶೆಟ್ಟಿ ‘ಶಿವ’ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಪ್ರತಿಯೊಬ್ಬರೂ ತಮ್ಮ ಪಾತ್ರವನ್ನು ಅತ್ಯಂತ ಸುಂದರವಾಗಿ ನಿರ್ವಹಿಸಿದ್ದಾರೆ. ಕೊನೆಯಲ್ಲಿ ಶಿವನಾಗಿ ಬಂದ ರಿಷಬ್ ಅವರು ಅದ್ಭುತವಾಗಿ ನಟನೆ ಮಾಡಿದ್ದಾರೆ. ಚಿತ್ರದ ಛಾಯಾಗ್ರಹಣ, ನಿರ್ದೇಶನ ಮತ್ತು ಪಾತ್ರಗಳ ಅಭಿನಯ ಎಲ್ಲವೂ ಇಷ್ಟವಾಯಿತು. ಆದರೆ ಸಿನಿಮಾದಲ್ಲಿ ಒಂದು ದೃಶ್ಯ ಮಾತ್ರ ನನಗೆ ತುಂಬಾ ಬೇಸರವಾಯ್ತು. ಅದರ ಬಗ್ಗೆ ಬರೆಯಬೇಕು ಎಂದು ತುಂಬಾ ಸಲ ಅಂದುಕೊಂಡಿದ್ದೆ. ಚಿತ್ರದ ಮೊದಲ ಭಾಗದಲ್ಲಿ ಗೆಳೆಯರಿಬ್ಬರು ನಡೆದುಕೊಂಡು ಹೋಗುವ ದೃಶ್ಯವಿದೆ. ಅವರೊಬ್ಬರು ಸುಂದರ ಎಂಬ ಹೆಸರಿರುವವರು. ಮಾತಿನ ಮಧ್ಯೆ ಸುಂದನ ಗೆಳೆಯ, ಈ ಸಂಜೆ ನಿನ್ನ ಹೆಂಡತಿಯನ್ನು ತಂದು ಹೊಡೆಯೋಣ ಎಂದು ವ್ಯಂಗ್ಯವಾಡುತ್ತಾನೆ. ಆಗ ಸುಂದರನ ಮುಖದಲ್ಲಿ ಅಸೂಯೆ ಎದ್ದು ಕಾಣಿಸುತ್ತದೆ. ಇನ್ನೊಂದು ಕಡೆಯಿಂದ ಆತನ ಪತ್ನಿ ನಗುತ್ತಾಳೆ. ಈ ವೇಳೆ ಆಕೆಯ ಚಾಚಿರುವ ಹಲ್ಲನ್ನು ಎಮ್ಮೆಯ ಹಲ್ಲುಗಳಿಗೆ ಹೋಲಿಸಿ ತೋರಿಸಲಾಗುತ್ತದೆ. ಇದನ್ನು ನೋಡಿದ ಪ್ರೇಕ್ಷಕರು ಥಿಯೇಟರ್‌ನಲ್ಲಿ ಬಿದ್ದು ಬಿದ್ದು ನಗುತ್ತಾರೆ. ಅವರು ಯಾಕೆ ನಗುತ್ತಿದ್ದಾರೆ ಎಂಬುದೇ ಅರ್ಥವಾಗದ ವಿಷಯ. ಅಷ್ಟೊಂದು ಸುಂದರವಾದ ಸಿನಿಮಾದಲ್ಲಿ ಬಾಡಿ ಶೇಮ್ ಮಾಡುವ ಅಗತ್ಯವೇನಿತ್ತು. ಅದರಿಂದ ಸಿಗುವ ಲಾಭವೇನು? ಇದೊಂದು ಸಣ್ಣ ದೃಶ್ಯ. ಆದರೆ ಸಣ್ಣ ವಿಷಯವಲ್ಲ. ದೇಹವು ಹಾಸ್ಯದ ವಸ್ತುವಲ್ಲ. ಅದನ್ನು ನೋಡಿ ನಗಲು ಗೇಲಿ ಮಾಡುವ ಹಕ್ಕು ಯಾರಿಗೂ ಇಲ್ಲ. ಒಬ್ಬ ವ್ಯಕ್ತಿಯ ಆತ್ಮವಿಶ್ವಾಸವನ್ನು ಸೋಲಿಸುವ ಹಕ್ಕು ಯಾರಿಗೂ ಇಲ್ಲ ಸ್ನೇಹಿತರೇʼʼ ಎಂದು ಬರೆದುಕೊಂಡಿದ್ದಾರೆ.
ಇದನ್ನೂ ಓದಿ | Kantara Movie | ಪುನೀತ್‌ ಈಗ ದೈವನರ್ತಕ : ವೈರಲ್‌ ಆಗ್ತಿದೆ ಪೋಸ್ಟರ್‌!