ಹೈದರಾಬಾದ್‌ : ʼಮೆಗಾ ಪವರ್‌ ಸ್ಟಾರ್‌ʼ ಖ್ಯಾತಿಯ ಟಾಲಿವುಡ್‌ ನಟ ರಾಮಚರಣ್‌ ಹಾಗೂ ಅವರ ಪತ್ನಿ ಉಪಾಸನಾ ಹೈದರಾಬಾದ್‌ ಏರ್‌ಪೋರ್ಟ್‌ನಲ್ಲಿ ಕಾಣಿಸಿಕೊಂಡಿದ್ದು, ರಜೆಯ ಮಜಾ ಅನುಭವಿಸಲು ಅವರು ನಗರ ದಿಂದ ಬೇರೆಲ್ಲಿಗೋ ಹಾರಿದ್ದಾರೆ.
ಏರ್‌ಪೋರ್ಟ್‌ನಲ್ಲಿ ರಾಮಚರಣ್‌ ರೆಟ್ರೋ ಲುಕ್‌ನಲ್ಲಿ ಕಾಣಿಸಿಕೊಂಡಿರುವುದು ಟಾಲಿವುಡ್‌ನಲ್ಲಿ ದೊಡ್ಡ ಸುದ್ದಿಯಾಗಿದೆ. 80 ಹಾಗೂ 90 ರ ದಶಕದಲ್ಲಿ ʼಮೆಗಾಸ್ಟಾರ್‌ʼ ಚಿರಂಜೀವಿ ಅವರು ಚಿತ್ರದಲ್ಲಿ ಕಾಣಿಸಿಕೊಂಡಿರುವಂತೆ ರೆಟ್ರೋ ಉಡುಪಿನಲ್ಲಿ ರಾಮಚರಣ್‌ ಸಹ ಕಾಣಿಸಿಕೊಂಡಿರುವುದು ವಿಶೇಷವೆಂದು ಬಣ್ಣಿಸಲಾಗುತ್ತಿದೆ.
ಈ ಹಿಂದೆ ಚಿರಂಜೀವಿ ಧರಿಸುತ್ತಿದ್ದ ಬ್ಯಾಗಿ ಪ್ಯಾಂಟ್‌, ಸ್ನೀಕರ್ಸ್‌, ಉಬರ್‌ ಕೂಲ್‌ ಜಾಕೆಟ್‌, ನುಣುಪಾದ ಹೇರ್‌ಸ್ಟೈಲ್‌ ಮತ್ತು ಸನ್‌ಗ್ಲಾಸ್‌ ಜತೆ ಫಿಟ್‌ ಟೀ-ಶರ್ಟ್‌ನೊಂದಿಗೆ ರೆಟ್ರೋ ಲುಕ್‌ನಲ್ಲಿ ರಾಮ್‌ಚರಣ್‌ ಮಿಂಚಿದ್ದಾರೆ.
ರಾಮಚರಣ್‌ರ ಹೊಸ ಲುಕ್‌ನ ಈ ಫೋಟೊಗಳು ವೈರಲ್‌ ಆಗುತ್ತಿದ್ದಂತೆಯೇ ಅವರ ಅಭಿಮಾನಿಗಳು, “ರಾಮ್‌ಚರಣ್‌ ಅವರು ತಂದೆಯ ಕ್ಲಾಸಿಕ್‌ ಶೈಲಿಗೆ ಗೌರವ ನೀಡಲು ಈ ಉಡುಪು ತೊಟ್ಟಂತೆ ಕಾಣುತ್ತಿದೆʼʼ ಎಂದು ಕಮೆಂಟ್‌ ಮೂಲಕ ಮೆಚ್ಚುಗೆ ವ್ತಕ್ತಪಡಿಸುತ್ತಿದ್ದಾರೆ.
ಇದನ್ನೂ ಓದಿ | ನೆಚ್ಚಿನ ನಟನನ್ನು ಭೇಟಿಯಾಗಲು 400 ಕಿ.ಮೀ ಕಾಲ್ನಡಿಗೆಯಲ್ಲಿ ಹೊರಟ ಅಭಿಮಾನಿ!
ಸೋತ ಅಪ್ಪ, ಮಗನ ಆಚಾರ್ಯ
ಕಳೆದ ಏಪ್ರಿಲ್‌ನಲ್ಲಿ ತೆರೆ ಕಂಡಿದ್ದ ಚಿರಂಜೀವಿ ಹಾಗೂ ರಾಮ್‌ ಚರಣ್‌ ನಟನೆಯ ‘ಆಚಾರ್ಯ’ (Acharya) ಹೀನಾಯವಾಗಿ ಸೋತಿತ್ತು. ಬಹಳ ನಿರೀಕ್ಷೆ ಇಟ್ಟುಕೊಂಡಿದ್ದ ಅಪ್ಪ-ಮಗನ ಅಭಿಮಾನಿಗಳು ಈ ಚಿತ್ರ ನೋಡಿ ನಿರಾಸೆ ವ್ಯಕ್ತಪಡಿಸಿದ್ದರು. ಈಗ ಅಪ್ಪನ ರೆಟ್ರೋ ಲುಕ್‌ನಲ್ಲಿ ಕಾಣಿಸುವ ಮೂಲಕ ರಾಮ್‌ ಚರಣ್‌ ಬೇರೇನೋ ಹೇಳಲು ಹೊರಟಿದ್ದಾರೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಆಚಾರ್ಯ ಸಿನಿಮಾಕ್ಕೆ ಹೂಡಿದ ಬಂಡವಾಳದಲ್ಲಿ ಕೇವಲ ಶೇ.25 ರಷ್ಟು ಹಿಂದಿರುಗಿದೆ. ಕೊರಟಾಲ ಶಿವ ನಿರ್ದೇಶನದ ಈ ಸಿನಿಮಾಕ್ಕೆ ತಾವು ಪಡೆದ ಒಟ್ಟು ಸಂಭಾವನೆಯಲ್ಲಿ 10 ಕೋಟಿ ರೂಪಾಯಿಯನ್ನು ಚಿರಂಜೀವಿ ಹಿಂದಿರುಗಿಸಿದ್ದು, ಇದನ್ನು ವಿತರಕರ ನಷ್ಟ ಭರಿಸಲು ಬಳಕೆ ಮಾಡುವಂತೆ ಸೂಚನೆ ನೀಡಿದ್ದರು.
ಆಚಾರ್ಯ ಸಿನಿಮಾ ತೆರೆಕಂಡ ಬಳಿಕ ಮೇ ಮೊದಲ ವಾರದಲ್ಲಿ ಚಿರಂಜೀವಿ ಅವರು ಪತ್ನಿ ಜತೆ ಅಮೆರಿಕಕ್ಕೆ ಬೇಸಿಗೆ ರಜೆ ಕಳೆಯಲು ತೆರಳಿದ್ದರು. ಈಗ ಮಗನ ಸರದಿ. ಆದರೆ ರಾಮ್‌ಚರಣ್‌ ಯಾವ ದೇಶಕ್ಕೆ ಹೋಗಿದ್ದಾರೆ ಎಂಬುದು ಸ್ಪಷ್ಟವಾಗಿಲ್ಲ.
ರಾಮ್‌ಚರಣ್‌ ಅವರ ಇತ್ತೀಚಿನ ಚಿತ್ರವೆಂದರೆ ರಾಜಮೌಳಿ ನಿರ್ದೇಶನದ ಆರ್‌ಆರ್‌ಆರ್‌ (RRR). ಈ ಚಿತ್ರದಲ್ಲಿ ಜ್ಯೂನಿಯರ್‌ ಎನ್‌ಟಿಆರ್ ಅವರೊಂದಿಗೆ ನಟಿಸಿದ್ದರು. ಬಾಕ್ಸ್‌ ಆಫೀಸ್‌ನಲ್ಲಿ ಈ ಚಿತ್ರ ಹೊಸ ದಾಖಲೆ ಬರೆದಿತ್ತು. ಪ್ಯಾನ್‌ ಇಂಡಿಯಾ ಸಿನಿಮಾವಾದ ಆರ್‌ಆರ್‌ಆರ್‌ ಓಟಿಟಿ ಯಲ್ಲಿಯೂ ರಿಲೀಸ್‌ ಆಗಿ ವಿಶ್ವದಾದ್ಯಂತ ಜನರ ಮೆಚ್ಚುಗೆ ಪಡೆದಿತ್ತು.
ಸದ್ಯ ರಾಮ್‌ಚರಣ್‌ ನಿರ್ದೇಶಕ ಶಂಕರ್‌ ಅವರ RC 15 ಎಂಬ ಚಿತ್ರದಲ್ಲಿ ನಟಿ ಕಿಯಾರಾ ಅಡ್ವಾಣಿ ಅವರೊಂದಿಗೆ ನಟಿಸುತ್ತಿದ್ದಾರೆ. ಮಲ್ಲಿರಾವ ಮತ್ತು ಜರ್ಸಿ ಖ್ಯಾತಿಯ ನಿರ್ದೇಶಕ ಗೌತಮ್‌ ತಿನ್ನನೂರಿ ಅವರೊಂದಿಗೆ ಚಿತ್ರವನ್ನು ಮಾಡಲಿದ್ದಾರೆ. ಸ್ಯಾಂಡಲ್‌ವುಡ್‌ನ ಪ್ರಶಾಂತ್‌ ನೀಲ್‌ ರ ಸಿನಿಮಾದಲ್ಲಿ ಕೂಡ ರಾಮ್‌ ಚರಣ್‌ ನಟಿಸಲಿದ್ದಾರೆ ಎಂಬ ಸುದ್ದಿ ಇದೆ.
ಇದನ್ನೂ ಓದಿ | RRR ಒಟಿಟಿಯಲ್ಲಿ ಬರ್ತಾ ಇದೆ! ಮೇ 20ರಿಂದ ಝೀ 5ನಲ್ಲಿ ನೋಡಿ