ಬೆಂಗಳೂರು: ಬಹುಭಾಷಾ ನಟಿ ಲೇಡಿ ಸೂಪರ್‌ ಸ್ಟಾರ್‌ ನಯನತಾರಾ ಮತ್ತು ನಿರ್ದೇಶಕ ವಿಘ್ನೇಶ್‌ ಶಿವನ್‌ ವಿವಾಹ ಕೊನೆಗೂ ನೆರವೇರಿದೆ. ಇವರು ಮದುವೆ ಆಗುತ್ತಾರಾ… ಇಲ್ಲವಾ ಎಂಬ ಬಗ್ಗೆ ಇದ್ದ ಏಳು ವರ್ಷಗಳ ಕುತೂಹಲಕ್ಕೆ ತೆರೆ ಬಿದ್ದಿದೆ.
ಸದ್ಯ ಮದುವೆಯ ಸಂಭ್ರಮದಲ್ಲಿ ನವಜೋಡಿಗಳು ಮುಳುಗಿದ್ದಾರೆ. ಗುರುವಾರ ಅದ್ದೂರಿಯಾಗಿ ಚೆನ್ನೈನ ಹೆಸರಾಂತ ರೆಸಾರ್ಟ್‌ನಲ್ಲಿ ಈ ಮುದ್ದಾದ ಜೋಡಿಯ ಅದ್ದೂರಿ ವಿವಾಹ ಮಹೋತ್ಸವ ನಡೆದಿತ್ತು. ಚಿತ್ರರಂಗದ ಘಟಾನುಘಟಿಗಳು ಇವರಿಬ್ಬರ ಮದುವೆಯಲ್ಲಿ ಭಾಗಿಯಾಗಿ ಅವರ ಸಂಭ್ರಮವನ್ನು ಹೆಚ್ಚಿಸಿದ್ದರು.
ನಟಿ ನಯನತಾರಾ ತನ್ನ ಪ್ರೀತಿಯ ಪತಿ ಹಾಗೂ ಅವರ ಕುಟುಂಬಸ್ಥರಿಗೆ ಮದುವೆ ಸಂದರ್ಭದಲ್ಲಿ ಭರ್ಜರಿ ಗಿಫ್ಟ್‌ ನೀಡಿದ್ದಾರೆ. ಬಹುಕಾಲದ ಪ್ರಿಯಕರ ವಿಘ್ನೇಶ್‌ಗೆ ನಯನತಾರಾ 20 ಕೋಟಿ ಮೌಲ್ಯದ ಭವ್ಯಬಂಗಲೆಯನ್ನು ಉಡುಗೂರೆಯಾಗಿ ನೀಡಿದ್ದಾರೆ. ಈಗಾಗಲೇ ಈ ಬಂಗಲೆ ಸಂಬಂಧಿಸಿದ ಎಲ್ಲಾ ರೀತಿಯ ವ್ಯವಹಾರಗಳು ಮುಕ್ತಾಯವಾಗಿದ್ದು, ವರದಿಗಳ ಪ್ರಕಾರ ಈ ಬಂಗಲೆಯನ್ನ ವಿಘ್ನೇಶ್‌ ಹೆಸರಿಗೆ ರಿಜಿಸ್ಟರ್‌ ಮಾಡಲಾಗಿದೆ. ಇದರ ಜತೆಗೆ ವಿಘ್ನೇಶ್‌ ಸಹೋದರಿ ಐಶ್ವರ್ಯಾಗೆ 30 ವಿವಿಧ ಬಗೆಯ ಚಿನ್ನಾಭರಣಗಳನ್ನ ಗಿಫ್ಟ್‌ ಆಗಿ ನೀಡಿದ್ದಾರೆ. ಅಲ್ಲದೆ ತಮ್ಮ ಹತ್ತಿರದ ಸಂಬಂಧಿಕರಿಗೆ ಸಾಕಷ್ಟು ಬೆಲೆ ಬಾಳುವ ಉಡುಗೊರೆಗಳನ್ನು ಮದುವೆಯ ನಿಮಿತ್ತ ನಯನತಾರಾ ನೀಡಿದ್ದಾರೆ.
ಇದನ್ನು ಓದಿ| Nayanthara marriage | ವಿಘ್ನೇಶ್‌ ಕೈ ಹಿಡಿದ ನಯನತಾರಾ: ಹರಸಿದ ರಜನಿ, ಶಾರುಖ್‌, ಮಣಿರತ್ನಂ
ಕೇವಲ ನಯನತಾರಾ ಮಾತ್ರವೇ ಗಿಫ್ಟ್‌ ನೀಡಿಲ್ಲ, ವಿಘ್ನೇಶ್‌ ಕೂಡ ತನ್ನ ಪ್ರೀತಿಯ ಮಡದಿಗೆ ಉಡುಗೊರೆಗಳನ್ನು ನೀಡುವ ಮೂಲಕ ತಮ್ಮ ಪ್ರೀತಿಯನ್ನ ವ್ಯಕ್ತಪಡಿಸಿದ್ದಾರೆ. ಮದುವೆಯಲ್ಲಿ ನಯನತಾರಾ ಧರಿಸಿದ್ದ ವಿಶಿಷ್ಟ ಶೈಲಿಯ ಚಿನ್ನದ ಆಭರಣಗಳನ್ನು ವಿಘ್ನೇಶ್‌ ಶಿವನ್‌ ಅವರೇ ಗಿಫ್ಟ್‌ ನೀಡಿದ್ದರಂತೆ. ಇವು ಸುಮಾರು 2.5 ರಿಂದ 3 ಕೋಟಿ ಬೆಲೆ ಬಾಳುತ್ತವೆ ಎಂದು ಅಂದಾಜಿಸಲಾಗಿದೆ. ಇದಿಷ್ಟೇ ಅಲ್ಲದೆ ನಯನತಾರಾಗೆ 5 ಕೋಟಿ ಮೌಲ್ಯದ ವಜ್ರದ ಉಂಗುರವನ್ನು ಕೂಡ ಉಡುಗೊರೆಯಾಗಿ ನೀಡಿದ್ದಾರೆ.
ಕಳೆದ ಏಳು ವರ್ಷಗಳಿಂದ ಈ ಜೋಡಿ ಹಕ್ಕಿಗಳು ಡೇಟಿಂಗ್‌ನಲ್ಲಿದ್ದರು. ಕೊನೆಗೂ ಈ ಪ್ರೇಮ ಪಕ್ಷಿಗಳು ವಿವಾಹ ಬಂಧನಕ್ಕೆ ಒಳಗಾಗಿದ್ದು, ಅದ್ದೂರಿಯಾಗಿ ಮದುವೆ ಮಾಡಿಕೊಳ್ಳುವ ಮೂಲಕ ಅಭಿಮಾನಿಗಳ ಕುತೂಹಲವನ್ನು ತಣಿಸಿದ್ದಾರೆ. ಇದಿಷ್ಟೇ ಅಲ್ಲದೆ ದಂಪತಿಗಳಿಬ್ಬರು ಈ ವಾರಾಂತ್ಯದವರೆಗೆ ಮಹಾಬಲಿಪುರಂನಲ್ಲಿರುವ 129 ಕೊಠಡಿಗಳಿರುವ ಸಂಪೂರ್ಣ ರೆಸಾರ್ಟ್‌ನ್ನು ಬುಕ್‌ ಮಾಡಿದ್ದು, ಇಲ್ಲಿಯೇ ಅದ್ದೂರಿಯಾಗಿ ಅರತಕ್ಷತೆ ಮಾಡಿಕೊಳ್ಳುವ ಪ್ಲಾನ್‌ ಮಾಡಿಕೊಂಡಿದ್ದಾರೆ.
ಇದನ್ನು ಓದಿ| ತಮಿಳುನಾಡು ಮುಖ್ಯಮಂತ್ರಿ ಭೇಟಿ: ಮದುವೆ ಯಾವಾಗ Lady Superstar ನಯನತಾರ ?
ಆರತಕ್ಷತೆ ಕಾರ್ಯಕ್ರಮದಲ್ಲಿ ಸಿನಿಮಾ ಮತ್ತು ರಾಜಕೀಯ ಕ್ಷೇತ್ರದ ಗಣ್ಯರು ಭಾಗಿಯಾಗುವ ಸಾಧ್ಯತೆ ಇದೆ. ಮದುವೆ ಸಮಾರಂಭಕ್ಕಿಂತಲೂ ಅದ್ದೂರಿಯಾಗಿ ಅರತಕ್ಷತೆ ನಡೆಯುವ ಸಾಧ್ಯತೆ ಇದ್ದು, ವಿಘ್ನೇಶ್‌ ಹಾಗೂ ನಯನತಾರಾ ಅರತಕ್ಷತೆಯಲ್ಲಿ ಹೇಗೆ ಮಿಂಚಲಿದ್ದಾರೆ ಎಂದು ನೋಡಲು ಅವರ ಅಭಿಮಾನಿಗಳು ಕುತೂಹಲದಿಂದ ಕಾಯುತ್ತಿದ್ದಾರೆ.