ಮುಂಬಯಿ: ಬಾಲಿವುಡ್ ದಿಗ್ಗಜ ಅಮಿತಾಬ್ ಬಚ್ಚನ್, ಕನ್ನಡತಿ ರಶ್ಮಿಕಾ ಮಂದಣ್ಣ, ನೀನಾ ಗುಪ್ತಾ ಮುಖ್ಯ ಭೂಮಿಕೆಯಲ್ಲಿರುವ ‘ಗುಡ್ ಬೈ (Good Bye)’ ಹಿಂದಿ ಚಿತ್ರದ ಟ್ರೇಲರ್ ಇಂದು ಬಿಡುಗಡೆಯಾಗಿದೆ. ಮುಂಬಯಿಯಲ್ಲಿ ನಡೆದ ಈ ಸಮಾರಂಭದಲ್ಲಿ ಅಮಿತಾಬ್ ಬಚ್ಚನ್ ಅವರು ವರ್ಚ್ಯುವಲ್ ಆಗಿ ಪಾಲ್ಗೊಂಡಿದ್ದರು. ರಶ್ಮಿಕಾ ಮಂದಣ್ಣ, ನೀನಾ ಗುಪ್ತಾ ಮತ್ತು ಚಿತ್ರ ನಿರ್ಮಾಪಕಿ ಏಕ್ತಾ ಕಪೂರ್ ಸಮ್ಮುಖದಲ್ಲಿ ಟ್ರೇಲರ್ ರಿಲೀಸ್ ಆಯಿತು. ಅಂದಹಾಗೇ, ಏಕ್ತಾ ಕಪೂರ್ ಇದೇ ಮೊದಲ ಬಾರಿಗೆ ಬಿಗ್ ಬಿ ಸಿನಿಮಾವೊಂದನ್ನು ಮಾಡುತ್ತಿದ್ದಾರೆ. ಅಂದರೆ ಬಾಲಾಜಿ ಮೋಷನ್ ಪಿಕ್ಟರ್ಸ್ ಸಂಸ್ಥೆ ನಿರ್ಮಿಸುತ್ತಿರುವ ಈ ಸಿನಿಮಾಕ್ಕೆ ಏಕ್ತಾ ಕಪೂರ್, ಶೋಭಾ ಕಪೂರ್ ಮತ್ತು ವಿಕಾಸ್ ಬಾಹ್ಲ್ ನಿರ್ಮಾಪಕರು.
ಟ್ರೇಲರ್ ಬಿಡುಗಡೆ ಸಮಾರಂಭದ ಬಳಿಕ ಸುದ್ದಿಗೋಷ್ಠಿ ನಡೆಸಿದ ಏಕ್ತಾ ಕಪೂರ್ ತಮ್ಮ ಸಂತೋಷವನ್ನು ಹೇಳಿಕೊಂಡಿದ್ದಾರೆ. ಅಮಿತಾಬ್ ಬಚ್ಚನ್ ಜತೆ ಕೆಲಸ ಮಾಡಬೇಕು ಎಂಬ ಬಾಲ್ಯದ ಕನಸು ಈಡೇರಿತು ಎಂದಿದ್ದಾರೆ. ‘ನಾನು ಚಿಕ್ಕವಳಿರುವಾಗಿನಿಂದಲೂ ನನಗೆ ಅಮಿತಾಬ್ ಬಚ್ಚನ್ ಜತೆ ಕೆಲಸ ಮಾಡಬೇಕು ಎಂಬ ಬಯಕೆ ಇತ್ತು. ಇವರನ್ನು ಹೊರತು ಪಡಿಸಿದರೆ ಇನ್ಯಾರೊಂದಿಗಾದರೂ ಕೆಲಸ ಮಾಡಲೇಬೇಕು ಎಂದು ಯಾವತ್ತೂ ಅನ್ನಿಸಿಲ್ಲ. ಯಾವ ಖಾನ್ಗಳ ಜತೆಗಾಗಲೀ, ಮತ್ಯಾರೊಂದಿಗಾಗಲೀ ಸಿನಿಮಾ ಮಾಡುವ ಆಸೆ ಎಂದಿಗೂ ಹೊಂದಿರಲೂ ಇಲ್ಲ’ ಎಂದು ಏಕ್ತಾ ಕಪೂರ್ ಹೇಳಿಕೊಂಡಿದ್ದಾರೆ.
ನನಗೆ ಬಿಗ್ ಬಿ ಎಂದರೆ ಯಾವಾಗಲೂ ಇಷ್ಟ. ಅವರ ಮಕ್ಕಳಾದ ಶ್ವೇತಾ ಮತ್ತು ಅಭಿಷೇಕ್ ನನಗೆ ಸ್ನೇಹಿತರು. ಅಮಿತಾಬ್ ಬಚ್ಚನ್ ಮನೆಯಲ್ಲಿ ನಡೆಯುತ್ತಿದ್ದ ಹುಟ್ಟುಹಬ್ಬದ ಪಾರ್ಟಿಗಳಿಗೆ ನಾನು ಹಾಜರಾಗುತ್ತಿದ್ದೆ. ಆಗೆಲ್ಲ ಅಮಿತ್ ಜೀ ನೋಡಲು ಸಾಧ್ಯವಾಗುತ್ತಿತ್ತು. ಯಾವಾಗಲೋ ಒಮ್ಮೆ ಅಮಿತಾಬ್ ಬಚ್ಚನ್ ಅವರು ನನ್ನ ತಂದೆ (ನಟ ಜಿತೇಂದ್ರ)ಗೆ ‘ನಿಮ್ಮ ಮಗಳು ನಮ್ಮ ಮನೆಗೆ ಬಂದಿದ್ದಳು, ಸಂಜೆ ಪೂರ್ತಿ ನನ್ನನ್ನು ನೋಡಿಯೇ ಕಾಲಕಳೆದಳು’ ಎಂದು ಹೇಳಿದ್ದರಂತೆ’ ಎಂದು ಹಳೇ ದಿನಗಳನ್ನೂ ಏಕ್ತಾ ಕಪೂರ್ ನೆನಪಿಸಿಕೊಂಡರು.
ಇತ್ತೀಚೆಗಷ್ಟೇ ಗುಡ್ ಬೈ ಚಲನಚಿತ್ರದ ಮೊದಲ ಪೋಸ್ಟರ್ ಬಿಡುಗಡೆಯಾಗಿತ್ತು. ಇಂದು ಬೆಳಗ್ಗೆ ಟ್ರೇಲರ್ ರಿಲೀಸ್ ಆಗಿದೆ. ಪ್ರೀತಿ, ಲಾಜಿಕ್, ಸಂಪ್ರದಾಯ, ಮಾನವೀಯತೆ, ದುಃಖ – ಈ ಎಲ್ಲ ಭಾವಗಳನ್ನೂ ಸಿನಿಮಾ ಒಳಗೊಂಡಿರುವುದು 2 ನಿಮಿಷ 59 ಸೆಕೆಂಡ್ಗಳ ಈ ಟ್ರೇಲರ್ನಲ್ಲೇ ಸಾಬೀತಾಗುತ್ತದೆ. ಗುಡ್ಬೈನಲ್ಲಿ ಅಮಿತಾಬ್ ಬಚ್ಚನ್ ಮಗಳಾಗಿ ರಶ್ಮಿಕಾ ಮಂದಣ್ಣ ಅಭಿನಯಿಸುತ್ತಿದ್ದಾರೆ. ಅಕ್ಟೋಬರ್ 7 ರಂದು ಚಿತ್ರ ತೆರೆಕಾಣಲಿದೆ ಎಂದು ಹೇಳಲಾಗಿದೆ. ಇಲ್ಲಿದೆ ನೋಡಿ ಟ್ರೇಲರ್..
ಇದನ್ನೂ ಓದಿ: Goodbye Movie | ಬಾಲಿವುಡ್ ಬಿಗ್ ಬಿ ಮಗಳಾಗಿ ರಶ್ಮಿಕಾ ಮಂದಣ್ಣ: ರಿಲೀಸ್ ಡೇಟ್‌ ಅನೌನ್ಸ್‌!