ಚೆನ್ನೈ: ರಜನಿಕಾಂತ್‌ (Rajinikanth) ಅವರ ಬಹುನಿರೀಕ್ಷಿತ ಸಿನಿಮಾ ಜೈಲರ್‌ ಈ ಗುರುವಾರ ಬಿಡುಗಡೆಯಾಗುತ್ತಿದೆ. ಸಿನಿಮಾಗಾಗಿ ರಜನಿಕಾಂತ್‌ ಅವರ ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ. ಆದರೆ ರಜನಿಕಾಂತ್‌ ಅವರು ಮಾತ್ರ ಸಿನಿಮಾ ಬಿಡುಗಡೆ ದಿನದಂದು ತಾಯ್ನಾಡಿನಲ್ಲಿ ಇರುವ ಮನಸ್ಸು ಮಾಡದೆ ತಮ್ಮ ಆಲ್‌ ಟೈಮ್‌ ಫೇವರಿಟ್‌ ಸ್ಥಳಕ್ಕೆ ಪ್ರವಾಸಕ್ಕೆ ತೆರಳಿದ್ದಾರೆ. ಸಿನಿಮಾ ಬಿಡುಗಡೆಯಾಗಿ ವಾರದ ನಂತರ ಅವರು ವಾಪಸು ತಮಿಳುನಾಡಿಗೆ ಮರಳಲಿದ್ದಾರೆ ಎಂದು ವರದಿಯಾಗಿದೆ.
ಹೌದು. ರಜನಿಕಾಂತ್‌ ಅವರು ಮಂಗಳವಾರ ಬೆಳಗ್ಗೆಯೇ ಹಿಮಾಲಯಕ್ಕೆ ತೆರಳಿದ್ದಾರೆ. ಅಲ್ಲಿ ಅವರು ಒಂದು ವಾರದ ಕಾಲ ಪ್ರವಾಸ ಕೈಗೊಳ್ಳಲಿದ್ದಾರೆ ಎಂದು ವರದಿಯಿದೆ. ಜೈಲರ್‌ ಸಿನಿಮಾ ಒಳ್ಳೆಯ ಗಳಿಕೆ ಕಾಣುತ್ತಿರುವ ಸಮಯದಲ್ಲಿ ಅವರು ತಮಿಳುನಾಡಿಗೆ ವಾಪಸು ಬರುವ ಯೋಜನೆ ಹಾಕಿಕೊಂಡಿದ್ದಾರೆ ಎಂದು ಹೇಳಲಾಗಿದೆ.
ಇದನ್ನೂ ಓದಿ: Viral Video: ಟ್ರಾಫಿಕ್‌ ಸಿಗ್ನಲ್‌ ವೇಳೆ ಬ್ಯಾಗ್‌ಗೆ ಕೈಹಾಕಿ ತಿಂಡಿ ತಿಂದ ಡೆಲಿವರಿ ಬಾಯ್; ಆರ್ಡರ್‌ ಮಾಡಿದವನ ಬಗ್ಗೆ ಮರುಕ
ರಜನಿಕಾಂತ್‌ ಅವರಿಗೆ ಹಿಮಾಲಯ ಅತಿ ಇಷ್ಟದ ಸ್ಥಳ. ಈ ಹಿಂದೆ 2002ರಲ್ಲಿ ಅವರು ಬಾಬಾ ಹೆಸರಿನ ಸಿನಿಮಾದಲ್ಲಿ ಹಿಮಾಲಯದಲ್ಲಿನ ಸನ್ಯಾಸಿ ಪಾತ್ರದಲ್ಲಿ ನಟಿಸಿದ್ದರು. ಅವರೇ ಬರೆದಿದ್ದ ಕಥೆಯಾಗಿದ್ದ ಆ ಸಿನಿಮಾವನ್ನು ಸುರೇಶ್‌ ಕೃಷ್ಣ ಅವರು ನಿರ್ದೇಶನ ಮಾಡಿದ್ದರು. ಆ ಸಿನಿಮಾದಲ್ಲಿ ರಜನಿಕಾಂತ್‌ ಅವರಿಗೆ ಹಿಮಾಲಯದೊಂದಿಗೆ ಇರುವ ಪ್ರೀತಿಯನ್ನು ಕಾಣಬಹುದಾಗಿತ್ತು. ಸಿನಿಮಾದಲ್ಲಿ ರಜನಿಕಾಂತ್‌ ಅವರು ಹೆಚ್ಚಾಗಿ ಆಧ್ಯಾತ್ಮಿಕವಾಗಿ ಕಾಣಿಸಿಕೊಂಡಿದ್ದರು. ಆದರೆ ತಲೈವಾರನ್ನು ಮಾಸ್‌ ಹೀರೋ ಆಗಿ ನೋಡಿದ್ದ ಅಭಿಮಾನಿಗಳಿಗೆ ರಜನಿ ಅವರ ಈ ಹೊಸ ವೇಷ ಇಷ್ಟವಾಗಿರಲಿಲ್ಲ. ಹಾಗಾಗಿ ಬಾಬಾ ಸಿನಿಮಾ ಹಿಟ್‌ ಆಗುವಲ್ಲಿ ಯಶಸ್ವಿಯಾಗಲಿಲ್ಲ.
ರಜನಿಕಾಂತ್‌ ಅವರು ಈ ಸಿನಿಮಾ ಮಾತ್ರವಲ್ಲ, ಈ ಹಿಂದೆ ಪ್ರತಿ ಸಿನಿಮಾ ಕೆಲಸ ಮುಗಿಸಿದ ತಕ್ಷಣ ಹಿಮಾಲಯಕ್ಕೆ ಪ್ರವಾಸ ಹೋಗುತ್ತಿದ್ದರಂತೆ. ಆದರೆ ಬರುಬರುತ್ತಾ ಅವರ ಆರೋಗ್ಯ ಹದಗೆಟ್ಟಿದ್ದರಿಂದಾಗಿ 2010ರಿಂದ ಈ ಪ್ರವಾಸದ ಅಭ್ಯಾಸವನ್ನು ಕೈಬಿಟ್ಟಿದ್ದರಂತೆ. 2018ರಲ್ಲಿ ಅವರ 2.0 ಸಿನಿಮಾ ಯಶಸ್ಸು ಕಂಡ ನಂತರ ಮತ್ತೆ ತಮ್ಮ ಪ್ರವಾಸದ ಅಭ್ಯಾಸವನ್ನು ಆರಂಭಿಸಿದ್ದರು. ಆದರೆ ಆ ವೇಳೆಗೆ ಕೊರೊನಾ ಸಾಂಕ್ರಾಮಿಕ ರೋಗ ಬಂದಿದ್ದರಿಂದಾಗಿ ಅವರ ಪ್ರವಾಸಕ್ಕೆ ಮತ್ತೊಮ್ಮೆ ಬ್ರೇಕ್‌ ಬಿದ್ದಂತಾಗಿತ್ತು. ಇದೀಗ ಎಲ್ಲ ಸಮಸ್ಯೆಗಳು ದೂರವಾಗಿರುವುದರಿಂದಾಗಿ ರಜನಿಕಾಂತ್‌ ಅವರು ಮತ್ತೊಮ್ಮೆ ಹಿಮಾಲಯ ಪ್ರವಾಸಕ್ಕೆ ತೆರಳಿದ್ದಾರೆ.
ಇದನ್ನೂ ಓದಿ: Viral Video : ಆಗಸದಲ್ಲಿ ಹಾರುವ ಮಹಿಳೆ! ಭಯವೇ ಇಲ್ಲದ ಇವರ ನೆಗೆತ ನೋಡಿ…
ರಜನಿಕಾಂತ್‌ ನಟನೆಯ ಜೈಲರ್‌ ಸಿನಿಮಾವನ್ನು ನೆಲ್ಸನ್‌ ದಿಲೀಪ್‌ಕುಮಾರ್‌ ಅವರು ನಿರ್ದೇಶನ ಮಾಡಿದ್ದಾರೆ. ಈ ಸಿನಿಮಾದಲ್ಲಿ ರಜನಿಕಾಂತ್‌ ಅವರು ನಿವೃತ್ತ ಪೊಲೀಸ್‌ ಅಧಿಕಾರಿ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿದೆ. ಸಿನಿಮಾದಲ್ಲಿ ಕನ್ನಡದ ಹ್ಯಾಟ್ರಿಕ್‌ ಹೀರೋ ಶಿವರಾಜ್‌ ಕುಮಾರ್‌, ಮಲಯಾಳಂ ನಟ ಮೋಹನ್‌ ಲಾಲ್‌, ಬಾಲಿವುಡ್‌ನ ಜಾಕಿ ಶ್ರಾಫ್, ತಮನ್ನಾ ಭಾಟಿಯಾ ಸೇರಿದಂತೆ ಅನೇಕ ನಟ ನಟಿಯರು ನಟಿಸಿದ್ದಾರೆ. ಸಿನಿಮಾದ ಟಿಕೆಟ್‌ಗಳ ಮುಂಗಡ ಬುಕ್ಕಿಂಗ್‌ ಈಗಾಗಲೇ ಆರಂಭವಾಗಿದೆ. ಅಮೆರಿಕದಲ್ಲಿ ಸಿನಿಮಾದ ಮುಂಗಡ ಬುಕ್ಕಿಂಗ್‌ನಲ್ಲೇ ದಾಖಲೆ ನಿರ್ಮಾಣವಾಗಿದೆ.