ಮುಂಬೈ: ನಟಿ ರಶ್ಮಿಕಾ ಮಂದಣ್ಣ (Rashmika Mandanna) ಸೋಮವಾರ ಮುಂಬೈನಲ್ಲಿ ಕಾಣಿಸಿಕೊಂಡಿದ್ದಾರೆ. ಅವರನ್ನು ಹಿಂಬಾಲಿಸಿದ ಬಾಲಿವುಡ್‌ ಫೋಟೋಗ್ರಾಫರ್‌ ಒಬ್ಬರು ನಡು ರಸ್ತೆಯಲ್ಲೇ ರಶ್ಮಿಕಾ ಅವರನ್ನು ಅಡ್ಡಗಟ್ಟಿ ಫೋಟೋ ತೆಗೆಯಲು ಯತ್ನಿಸಿದ್ದಾರೆ. ಈ ಬಗ್ಗೆ ನಟಿ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದೆ.
ನಟಿ ಸೋಮವಾರ ಮುಂಬೈ ಏರ್‌ಪೋರ್ಟ್‌ನಲ್ಲಿ ಇಳಿದು ಬಾಲಿವುಡ್‌ ಫೋಟೋಗ್ರಾಫರ್‌ಗೆ ಪೋಸ್‌ ಕೊಟ್ಟಿದ್ದರು. ಅದಾದ ಮೇಲೆ ನಟಿ ಕೆಲಸದ ನಿಮಿತ್ತ ಬಾಂದ್ರಾಕ್ಕೆ ಹೋಗಿದ್ದರು. ಬಾಂದ್ರಾದಿಂದ ವಾಪಸು ಬರುವಾಗ ಕೆಲವು ಫೋಟೋಗ್ರಾಫರ್‌ಗಳು ಅವರನ್ನು ಹಿಂಬಾಲಿಸಿದ್ದಾರೆ. ಟ್ರಾಫಿಕ್‌ನಲ್ಲಿ ರಶ್ಮಿಕಾ ಅವರ ಕಾರು ನಿಂತಾಗ ಅದರ ಬಳಿ ಹೋಗಿ, “ರಶ್ಮಿಕಾ ಜೀ, ರಶ್ಮಿಕಾ ಜೀ” ಎಂದು ಕರೆದಿದ್ದಾರೆ.
ಇದನ್ನೂ ಓದಿ: Viral Video: ಮೆಟ್ರೋದಲ್ಲಿ ವಿಚಿತ್ರವಾಗಿ ಡಾನ್ಸ್‌ ಮಾಡಿದ ಯುವತಿ; ನೋಡದಿರೋದೇ ವಾಸಿ ಎಂದ ಜನ
ಆಗ ನಟಿ ಕಾರಿನ ಕಿಟಕಿ ಗಾಜನ್ನು ಇಳಿಸಿ, “ಇನ್ನೂ ಎಷ್ಟು ಫೋಟೋ, ವಿಡಿಯೊಗಳನ್ನು ತೆಗೆಯಬೇಕು?” ಎಂದು ಅಸಮಾಧಾನದಿಂದ ಪ್ರಶ್ನಿಸಿದ್ದಾರೆ. ಅದಕ್ಕೆ ಫೋಟೋಗ್ರಾಫರ್‌ ನಾನು ನಿಮ್ಮನ್ನು ಬಾಂದ್ರಾದಿಂದ ಹಿಂಬಾಲಿಸಿಕೊಂಡು ಬಂದಿದ್ದೇನೆ ಎಂದು ಉತ್ತರಿಸಿದ್ದಾರೆ. ಆಗ ನಟಿ, “ಅದಿರಲಿ, ಆದರೆ ನಾವೀಗ ಟ್ರಾಫಿಕ್‌ ಮಧ್ಯದಲ್ಲಿದ್ದೇವೆ” ಎಂದು ಹೇಳಿದ್ದಾರೆ. ಫೋಟೋಗ್ರಾಫರ್‌ “ಸರಿ, ಆಯಿತು” ಎಂದು ಹೇಳಿದ ಮೇಲೆ ನಟಿ ಕಿಟಕಿ ಗಾಜನ್ನು ಏರಿಸಿಕೊಂಡಿದ್ದು, ಕಾರು ಮುಂದೆ ಚಲಿಸಿದೆ.
ಈ ವಿಡಿಯೊವನ್ನು ಯೂಟ್ಯೂಬ್‌ನಲ್ಲಿ ಹಂಚಿಕೊಳ್ಳಲಾಗಿದ್ದು, ವಿಡಿಯೊ ಭಾರೀ ಸದ್ದು ಮಾಡುತ್ತಿದೆ. ಹಲವರು ಈ ಬಾಲಿವುಡ್‌ ಫೋಟೋಗ್ರಾಫರ್‌ಗಳ ಬಗ್ಗೆ ಅಸಮಾಧಾನವನ್ನು ವ್ಯಕ್ತಪಡಿಸುತ್ತಿದ್ದಾರೆ.
ರಶ್ಮಿಕಾ ಅವರಿಗೆ ಸೋಮವಾರ ಬಿಡುವಿಲ್ಲದ ದಿನವಾಗಿತ್ತು. ಅವರು ಹಲವು ಡ್ರೆಸ್‌ಗಳನ್ನು ತೊಟ್ಟು ಚಿತ್ರೀಕರಣದಲ್ಲಿ ತೊಡಗಿಸಿಕೊಂಡಿದ್ದು ಕಂಡುಬಂದಿದೆ. ಆ ಕೆಲಸ ಮುಗಿದ ನಂತರ ನಟಿ ಮುಂಬೈ ವಿಮಾನ ನಿಲ್ದಾಣಕ್ಕೆ ವಾಪಸಾಗಿದ್ದು, ಅಲ್ಲಿಂದ ಹೈದರಾಬಾದ್‌ಗೆ ತೆರಳಿದ್ದಾರೆ. ಅಲ್ಲಿ ವಿಮಾನ ನಿಲ್ದಾಣದಲ್ಲಿ ಕಾಣಿಸಿಕೊಂಡ ಅವರು ಅಲ್ಲಿಂದ ಮನೆಗೆ ತೆರಳಿದ್ದಾರೆ.
ಇದನ್ನೂ ಓದಿ: Viral News: ಸಾಯುವ ಮುನ್ನ 33 ವರ್ಷದ ಗರ್ಲ್‌ಫ್ರೆಂಡ್‌ಗೆ 900 ಕೋಟಿ ರೂ. ಆಸ್ತಿ ಬರೆದಿಟ್ಟ ಮಾಜಿ ಪ್ರಧಾನಿ!
ರಶ್ಮಿಕಾ ಮಂದಣ್ಣ ಅವರು ತೆಲುಗು ನಟ ವಿಜಯ್‌ ದೇವರಕೊಂಡ ಅವರೊಂದಿಗೆ ಪ್ರೀತಿಯಲ್ಲಿದ್ದಾರೆ ಎಂದು ಸುದ್ದಿಗಳಿದ್ದವು. ಹಲವು ಕಡೆ ಅವರಿಬ್ಬರು ಜತೆಯಾಗಿ ಕಾಣಿಸಿಕೊಂಡಿದ್ದರು ಕೂಡ. ಆದರೆ ಕೆಲವು ದಿನಗಳಿಂದ ಅವರಿಬ್ಬರ ಪ್ರೀತಿ ಮುರಿದುಬಿದ್ದಿದೆ ಎಂದು ಸುದ್ದಿಯಾಗುತ್ತಿದೆ. ಇತ್ತೀಚೆಗೆ ನಟಿ ಸ್ಫೂರ್ತಿದಾಯಕ ವಾಕ್ಯಗಳನ್ನು ಸ್ಟೇಟಸ್‌ ಹಾಕಿಕೊಂಡಿದ್ದು, ಅವರ ಪ್ರೀತಿ ಮುರಿದು ಮತ್ತೆ ಗಟ್ಟಿಯಾಗುವುದಕ್ಕಾಗಿ ನಟಿ ಹಾಗೆ ಹಾಕಿಕೊಂಡಿದ್ದಾರೆ ಎಂದು ಅಭಿಮಾನಿಗಳು ಊಹಿಸಿದ್ದರು ಕೂಡ.