ಮುಂಬೈ: ಬಾಲಿವುಡ್‌ ಸೂಪರ್‌ ಸ್ಟಾರ್‌ ರಣಬೀರ್‌ ಕಪೂರ್‌ (Ranbir Kapoor) ಮತ್ತು ಕನ್ನಡತಿ ರಶ್ಮಿಕಾ ಮಂದಣ್ಣ (Rashmika Mandanna) ಅಭಿನಯದ ಪ್ಯಾನ್‌ ಇಂಡಿಯಾ ಚಿತ್ರ ʼಅನಿಮಲ್‌ʼ (Animal) ತೆರೆಗೆ ಬರಲು ಸಜ್ಜಾಗಿದೆ. ಇದು ಹಿಂದಿಯ ಜತೆಗೆ ಕನ್ನಡ, ತಮಿಳು, ತೆಲುಗು ಮತ್ತು ಮಲೆಯಾಳಂನಲ್ಲೂ ತೆರೆಗೆ ಬರಲಿದೆ. ಮೊದಲ ಬಾರಿ ರಣಬೀರ್‌ ಮತ್ತು ರಶ್ಮಿಕಾ ತೆರೆ ಹಂಚಿಕೊಳ್ಳುತ್ತಿದ್ದು, ಕುತೂಹಲ ಮೂಡಿಸಿದೆ. ಚಿತ್ರದ ಪ್ರಮೋಷನ್‌ ವೇಳೆ ರಶ್ಮಿಕಾ ರಣಬೀರ್‌ಗೆ ಕನ್ನಡ ಮತ್ತು ತೆಲುಗು ಹೇಳಿಕೊಟ್ಟು ದಕ್ಷಿಣ ಭಾರತ ಚಿತ್ರರಂಗದ ಗಮನ ಸೆಳೆದಿದ್ದಾರೆ.
ಟೀಸರ್‌ ಮತ್ತು ಹಾಡುಗಳಿಂದಲೇ ಗಮನ ಸೆಳೆದಿರುವ ʼಅನಿಮಲ್‌ʼ ಚಿತ್ರಕ್ಕೆ ಟಾಲಿವುಡ್‌ ಜನಪ್ರಿಯ ನಿರ್ದೇಶಕ ಸಂದೀಪ್‌ ವಂಗಾ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಚಿತ್ರ ಡಿಸೆಂಬರ್‌ 1ರಂದು ಬಿಡುಗಡೆಯಾಗಲಿದ್ದು ಈ ಹಿನ್ನಲೆಯಲ್ಲಿ ಚಿತ್ರತಂಡ ಭರ್ಜರಿಯಾಗಿ ಪ್ರಚಾರ ನಡೆಸುತ್ತಿದೆ. ಇದರ ಭಾಗವಾಗಿ ರಣಬೀರ್‌ ಮತ್ತು ರಶ್ಮಿಕಾ ಖಾಸಗಿ ವಾಹಿನಿಯ ರಿಯಾಲಿಟಿ ಶೋ ‘ಇಂಡಿಯನ್‌ ಐಡಿಯಲ್‌-14’ರಲ್ಲಿ ಭಾಗವಹಿಸಲು ತೆರಳುತ್ತಿದ್ದಾಗ ಈ ಘಟನೆ ನಡೆಯಿತು. ಈ ವೇಳೆ ಕರ್ನಾಟಕ ಮೂಲದ ಪತ್ರಕರ್ತರೊಬ್ಬರು ಕನ್ನಡದಲ್ಲಿ ಏನಾದರೂ ಮಾತನಾಡಿ ಎಂದು ಹೇಳಿದ್ದಾರೆ. ಆಗ ರಶ್ಮಿಕಾ ”ಎಲ್ಲರಿಗೂ ನಮಸ್ಕಾರ” ಎಂದರು. ಬಳಿಕ ರಣಬೀರ್‌ ಕಪೂರ್‌ಗೆ ”ಹೇಗಿದ್ದೀರಾ? ಎಲ್ಲರಿಗೂ ನಮಸ್ಕಾರ” ಎಂದು ಹೇಳುವುದನ್ನು ಕಲಿಸಿಕೊಟ್ಟಿದ್ದಾರೆ. ಇದಕ್ಕೆ ಕನ್ನಡ ಪತ್ರಕರ್ತನೂ ಸಾಥ್‌ ನೀಡಿದ್ದಾನೆ. ಸದ್ಯ ಈ ವಿಡಿಯೊ ವೈರಲ್‌ ಆಗಿದೆ.
ತೆಲುಗು ಕೂಡ ಹೇಳಿಕೊಟ್ಟ ರಶ್ಮಿಕಾ
ಇದೇ ವೇಳೆ ತೆಲುಗು ಮೂಲದ ಪತ್ರಕರ್ತನ ಕೋರಿಕೆಯಂತೆ ರಣಬೀರ್‌ ಕಪೂರ್‌ ತೆಲುಗಿನಲ್ಲೂ ಮಾತನಾಡಿದರು. ”ಅಂದರಿಕಿ ನಮಸ್ಕಾರಂ”(ಎಲ್ಲರಿಗೂ ನಮಸ್ಕಾರ) ಎಂದು ರಣಬೀರ್‌ ಹೇಳಿದರು. ಬಳಿಕ ರಶ್ಮಿಕಾ ”ನೇನು ಭಾಗುನ್ನಾನು, ಮೀರು ಬಾಗುನ್ನಾರಾ?” (ನಾನು ಚೆನ್ನಾಗಿದ್ದೇನೆ. ನೀವು ಹೇಗಿದ್ದೀರಾ?) ಎಂದು ತೆಲುಗಿನಲ್ಲಿ ಹೇಳಿವುದನ್ನು ತಿಳಿಸಿಕೊಟ್ಟರು. ಸದ್ಯ ಈ ವಿಡಿಯೊ ಕೂಡ ಗಮನ ಸೆಳೆದಿದೆ. ಇತ್ತೀಚೆಗೆ ಟಾಲಿವುಡ್‌ ನಟ ಬಾಲಕೃಷ್ಣ ಅವರ ಅನ್‌ ಸ್ಟಾಪೆಬಲ್‌ (Unstoppable) ಶೋದಲ್ಲಿಯೂ ‘ಅನಿಮಲ್‌’ ಚಿತ್ರತಂಡ ಭಾಗವಹಿಸಿತ್ತು. ಅಲ್ಲಿಯೂ ರಣಬೀರ್‌ ತೆಲುಗು ಡೈಲಾಗ್‌ ಹೊಡೆದಿದ್ದರು.
‘ಅರ್ಜುನ್‌ ರೆಡ್ಡಿ’ ಮತ್ತು ‘ಕಬೀರ್‌ ಸಿಂಗ್‌’ನಂತಹ ಸೂಪರ್‌ ಹಿಟ್‌ ಚಿತ್ರಗಳ ನಂತರ ಸಂದೀಪ್‌ ರೆಡ್ಡಿ ವಂಗ ಈ ಸಿನಿಮಾ ಕೈಗೆತ್ತಿಕೊಂಡಿದ್ದಾರೆ. ಅನಿಲ್‌ ಕಪೂರ್‌ ಮತ್ತು ಬಾಬ್ಬಿ ಡಿಯೋಲ್‌ ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ. ಚಿತ್ರದ ಟ್ರೇಲರ್‌ ನವೆಂಬರ್‌ 23ರಂದು ಬಿಡುಗಡೆಯಾಗಲಿದೆ. ಇತ್ತೀಚೆಗೆ ಸಿನಿಮಾದ ಹಾಡುಗಳು ಹೊರ ಬಂದಿದ್ದವು. ಅದರಲ್ಲಿ ರಣಬೀರ್‌ ಮತ್ತು ರಶ್ಮಿಕಾ ಲಿಪ್‌ಲಾಕ್‌ ಮಾಡಿಕೊಳ್ಳುವ ದೃಶ್ಯಗಳಿದ್ದು, ಆ ಕಾರಣದಿಂದ ಸಾಕಷ್ಟು ಸುದ್ದಿ ಮಾಡಿದೆ.
ಇದನ್ನೂ ಓದಿ: Rashmika Mandanna: ಕತ್ತಿನಲ್ಲಿ ತಾಳಿ, ಕೆಂಪು ಬಾರ್ಡರ್‌ ಸೀರೆಯುಟ್ಟು ಫಸ್ಟ್‌ ಲುಕ್‌ನಲ್ಲೇ ನಾಚಿ ನೀರಾದ ರಶ್ಮಿಕಾ!
ʼಅನಿಮಲ್‌ʼ ಚಿತ್ರದ ಬಳಿಕ ರಣಬೀರ್‌ ಕಪೂರ್‌ ಸುಮಾರು 5-6 ತಿಂಗಳು ಬ್ರೇಕ್‌ ತೆಗೆದುಕೊಳ್ಳುತ್ತಾರೆ ಎನ್ನಲಾಗಿದೆ. ಅದಕ್ಕಾಗಿ ಸದ್ಯ ಅವರು ಯಾವುದೇ ಚಿತ್ರಗಳನ್ನು ಒಪ್ಪಿಕೊಂಡಿಲ್ಲ. ಇತ್ತ ರಶ್ಮಿಕಾ ಬಹು ನಿರೀಕ್ಷಿತ ʼಪುಷ್ಪಾ 2ʼ, ʼರೈನ್‌ ಬೋʼ, ʼದಿ ಗರ್ಲ್‌ ಫ್ರೆಂಡ್‌ʼ ಮುಂತಾದ ಚಿತ್ರಗಳಲ್ಲಿ ನಟಿಸುತ್ತಿದ್ದಾರೆ. ಜತೆಗೆ ಒಂದಷ್ಟು ಹಿಂದಿ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನುವ ಸುದ್ದಿಯೂ ಹರಿದಾಡುತ್ತಿದೆ.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಮೆಂಟ್ ಮೂಲಕ ತಿಳಿಸಿ