ಮುಂಬೈ: ಮಿಲ್ಕಿ ಬ್ಯೂಟಿ ತಮನ್ನಾ ಭಾಟಿಯಾ (Tamannaah Bhatia) ದೊಡ್ಡ ಅಭಿಮಾನಿ ಬಳಗವನ್ನೇ ಹೊಂದಿದ್ದಾರೆ. ಅವರ ಮೇಲಿನ ಪ್ರೀತಿಯಿಂದ ಏನೇನೋ ಮಾಡುವಂತಹ ಅಭಿಮಾನಿಗಳೂ ಅವರಿಗಿದ್ದಾರೆ. ಅದೇ ರೀತಿಯಲ್ಲಿ ಫ್ಯಾನ್‌ ಒಬ್ಬರು ತಮ್ಮ ಮೇಲಿಟ್ಟಿರುವ ಪ್ರೀತಿಯನ್ನು ಕಂಡ ತಮನ್ನಾ ಭಾವುಕರಾದ ಘಟನೆ ಇತ್ತೀಚೆಗೆ ನಡೆದಿದೆ.
ತಮನ್ನಾ ಮುಂಬೈನ ವಿಮಾನ ನಿಲ್ದಾಣದಲ್ಲಿ ಸೋಮವಾರ ಕಾಣಿಸಿಕೊಂಡಿದ್ದರು. ಆಗ ಅವರನ್ನು ಕಂಡ ಅಭಿಮಾನಿಯೊಬ್ಬರು ಹೂವಿನ ಬೊಕ್ಕೆಯೊಂದಿಗೆ ಅವರ ಬಳಿ ಓಡಿ ಬಂದಿದ್ದಾರೆ. ಬೊಕ್ಕೆ ಕೊಟ್ಟ ನಂತರ ತಮ್ಮ ಎಡಗೈ ಮೇಲೆ ತಮನ್ನಾ ಅವರ ಮುಖವನ್ನು ಹಚ್ಚೆ ಹಾಕಿಸಿಕೊಂಡಿರುವುದನ್ನು ಅವರಿಗೆ ತೋರಿಸಿದ್ದಾರೆ. ಹಚ್ಚೆಯ ಜತೆ ಐ ಲವ್ ಯು ತಮನ್ನಾ ಎಂದೂ ಬರೆಯಲಾಗಿತ್ತು.
ಇದನ್ನೂ ಓದಿ: Viral Video: ಪ್ರೀತಿಯಲ್ಲಿ ಬಿದ್ದ ಮಗಳಿಗೆ ಬಾಸುಂಡೆ ಬರುವಂತೆ ಬಾರಿಸಿದ ಅಮ್ಮ! ಇದು ಲವ್ ಸೈಡ್ ಎಫೆೆಕ್ಟ್
ಇದನ್ನು ಕಂಡೊಡನೆ ತಮನ್ನಾ ಭಾವುಕರಾಗಿದ್ದಾರೆ. ಕೆಲ ಕಾಲ ಆ ಅಭಿಮಾನಿಯೊಂದಿಗೆ ಮಾತನಾಡಿದ್ದು, ಅವರನ್ನು ತಬ್ಬಿಕೊಂಡಿದ್ದಾರೆ. ಖುಷಿಯಿಂದ ಆ ಅಭಿಮಾನಿ ತಮನ್ನಾ ಅವರ ಕಾಲನ್ನು ಮುಟ್ಟಿ ನಮಸ್ಕಾರ ಮಾಡಿದ್ದಾರೆ ಕೂಡ. ತಮ್ಮ ಕಾರಿನ ಬಳಿ ಹೋಗುವುದಕ್ಕೆ ಮೊದಲು ತಮನ್ನಾ ಆ ಅಭಿಮಾನಿಯೊಂದಿಗೆ ಅಲ್ಲಿದ್ದ ಫೋಟೊಗ್ರಾಫರ್‌ಗಳಿಗೆ ಫೋಸ್‌ ಕೊಟ್ಟು ನಂತರ ಕಾರಿನೆಡೆಗೆ ನಡೆದಿದ್ದಾರೆ.
ಈ ವಿಡಿಯೊ ಸಾಮಾಜಿಕ ಜಾಲತಾಣಗಳ ತುಂಬೆಲ್ಲ ಹರಿದಾಡಿದೆ. ತಮನ್ನಾ ಅವರ ಅಭಿಮಾನಿಯ ಬಗ್ಗೆ ಬಹಳಷ್ಟು ಮಂದಿ ಮೆಚ್ಚುಗೆಯನ್ನು ವ್ಯಕ್ತಪಡಿಸುತ್ತಿದ್ದಾರೆ. ಅದಷ್ಟೇ ಅಲ್ಲದೆ ನಟಿ ಅಭಿಮಾನಿಯನ್ನು ಅಪ್ಪಿಕೊಂಡು ಮಾತನಾಡಿದ್ದರ ಬಗ್ಗೆಯೂ ಸಾಕಷ್ಟು ಚರ್ಚೆಗಳು ನಡೆಯುತ್ತಿವೆ.
ಇದನ್ನೂ ಓದಿ: Viral Video: ಕಾಟ ಕೊಟ್ಟ ಪುಂಡನನ್ನು ಕೆಡವಿ ಹೊಡೆದು ಹಾಕಿದ್ರು! ಅಕ್ಕ-ತಂಗಿಯ ವಿಡಿಯೊ ಸಕತ್‌ ವೈರಲ್‌
ತಮನ್ನಾ ಅವರು ಸದ್ಯ ತಮ್ಮ ಲಸ್ಟ್‌ ಸ್ಟೋರಿಸ್‌ 2 ಪ್ರಚಾರ ಕೆಲಸದಲ್ಲಿ ಬಿಜಿಯಾಗಿದ್ದಾರೆ. ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾಗಲಿರುವ ಈ ಸೀರಿಸ್‌ನಲ್ಲಿ ನಟಿ ನಟ ವಿಜಯ್‌ ವರ್ಮಾ ಅವರ ಜತೆ ಸೆಕ್ಸಿಯಾಗಿ ಕಾಣಿಸಿಕೊಂಡಿದ್ದಾರೆ. ಅಂದ ಹಾಗೆ ನಟಿ ಇತ್ತೀಚೆಗಷ್ಟೇ ತಾವು ವಿಜಯ್‌ ವರ್ಮಾ ಅವರೊಂದಿಗೆ ಪ್ರೀತಿಯಲ್ಲಿರುವ ವಿಚಾರವನ್ನು ಬಹಿರಂಗವಾಗಿ ಹೇಳಿಕೊಂಡಿದ್ದರು.