ಬೆಂಗಳೂರು: ಬಿಗ್‌ ಬಾಸ್‌ ಕನ್ನಡ ಸೀಸನ್‌ 10 (BBK Season 10) ಶುರುವಾಗಲು ಇನ್ನು ಕೇವಲ 3 ದಿನಗಳು ಬಾಕಿ ಇವೆ. ಒಂದು ಕಡೆ ಪ್ರೇಕ್ಷಕರು ಬಿಗ್‌ ಬಾಸ್‌ ಗೆ ಕಾಯುತ್ತಿದ್ದರೆ ಇನ್ನೊಂದೆಡೆ ಧಾರಾವಾಹಿಗಳು ಅಂತ್ಯ ಹಾಡಲಿವೆ ಎಂಬ ಬೇಸರವೂ ನೋಡುಗರಿಗಿದೆ. ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರ ಆಗುತ್ತಿರುವ ಎರಡು ಧಾರಾವಾಹಿಗಳು ಇದೀಗ ಮುಗಿಯುವ ಹಂತದಲ್ಲಿ ಇದೆ ಎನ್ನಲಾಗುತ್ತಿದೆ. ಪೂರಕವೆಂಬಂತೆ ಲಕ್ಷಣ ಧಾರಾವಾಹಿ ನಟಿ ಸುಕೃತಾ ನಾಗ್ ಶೂಟಿಂಗ್ ಜರ್ನಿ ಹೇಗಿತ್ತು ಎಂಬುದನ್ನು ವಿಡಿಯೊ ಮೂಲಕ ನೆನಪಿಸಿಕೊಂಡಿದ್ದಾರೆ. ಇದಲ್ಲದೇ ʻಗೀತಾ’ ಹಾಗೂ ‘ಲಕ್ಷಣ’, ‘ಪುಣ್ಯವತಿ’, ‘ತ್ರಿಪುರ ಸುಂದರಿ’ ಧಾರಾವಾಹಿ ಕತೆಗಳನ್ನು ನೋಡಿದರೆ ಇವುಗಳು ತಮ್ಮ ಪ್ರಸಾರವನ್ನು ಅಂತ್ಯ ಮಾಡುತ್ತವೆ ಎಂಬಂತೆ ಕಾಣುತ್ತದೆ.
ʻಅಗ್ನಿ ಸಾಕ್ಷಿʼ ಧಾರಾವಾಹಿ ಮೂಲಕ ಖ್ಯಾತಿ ಪಡೆದಿರುವ ಸುಕೃತಾ ನಾಗ್ (Sukrutha Nag) ಸದ್ಯ ಲಕ್ಷಣ ಧಾರಾವಾಹಿಯಲ್ಲಿ ಕೆಡಿ ಶ್ವೇತಾರಾಗಿ ಮಿಂಚುತ್ತಿದ್ದಾರೆ. ಕಾದಂಬರಿ ಧಾರಾವಾಹಿ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟ ಸುಕೃತಾ ‘ಶಿವಲೀಲಾಮೃತ’, ‘ಮಹಾಭಾರತ’, ‘ಪಡುವಾರಳ್ಳಿ ಕಥೆಗಳು’, ‘ಪುರುಷೋತ್ತಮ’, ‘ಸರಸ್ವತಿ’ ಸೇರಿದಂತೆ ಸಾಕಷ್ಟು ಧಾರಾವಾಹಿಗಳಲ್ಲಿ ನಟಿಸಿದ್ದಾರೆ. ಇಲ್ಲಿಯವರೆಗೆ 26 ಸೀರಿಯಲ್‌ಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದಾರೆ. ಇದೀಗ ಸುಕೃತಾ ಅವರು ಲಕ್ಷಣ ಧಾರಾವಾಹಿಯಲ್ಲಿಯ ಸೆಟ್‌ನಲ್ಲಿ ನಡೆದ ತಮಾಷೆ, ಹಾಗೂ ಇಷ್ಟೂ ದಿನದ ಜರ್ನಿಯನ್ನು ಇನ್‌ಸ್ಟಾದಲ್ಲಿ ಶೇರ್‌ ಮಾಡಿಕೊಂಡಿದ್ದಾರೆ.
ಈ ಧಾರಾವಾಹಿಯಲ್ಲಿ ಜಗನ್ ಸಿ, ವಿಜಯಲಕ್ಷ್ಮಿ ಮೊದಲಾದವರು ನಟಿಸಿದ್ದಾರೆ. ಈ ಧಾರಾವಾಹಿ ಕ್ಲೈಮ್ಯಾಕ್ಸ್ ಹಂತಕ್ಕೆ ಬಂದಿದೆ ಎನ್ನಲಾಗುತ್ತಿದೆ. ‘ಕೆಲವು ಸುಂದರ ವ್ಯಕ್ತಿಗಳೊಂದಿಗೆ ಒಂದು ಸುಂದರ ಪ್ರಯಾಣ’ ಎಂದು ಈ ವಿಡಿಯೋಗೆ ಅವರು ಕ್ಯಾಪ್ಶನ್ ನೀಡಿದ್ದಾರೆ. ‘ಲಕ್ಷಣ’ ಧಾರಾವಾಹಿ ಆರಂಭ ಆಗಿದ್ದು 2021ರ ಆಗಸ್ಟ್ ತಿಂಗಳಲ್ಲಿ. ಎರಡು ವರ್ಷಗಳಿಗೂ ಅಧಿಕ ಕಾಲ ಈ ಧಾರಾವಾಹಿ ಪ್ರಸಾರ ಕಂಡಿತು. ವಿಡಿಯೊಗೆ ನೋಡುಗರು ʻʻಧಾರಾವಾಹಿ ನಿಲ್ಲಸಬೇಡಿ, ಸಮಯ ಆದರೂ ಚೇಂಜ್‌ ಮಾಡಿʼʼಎಂದು ಕಮೆಂಟ್‌ ಮಾಡಿದ್ದಾರೆ. ಇನ್ನೊಬ್ಬರು ʻʻಲಕ್ಷಣ ತಂಡವನ್ನು ತುಂಬ ಮಿಸ್‌ ಮಾಡಿಕೊಳ್ಳುತ್ತೇವೆʼʼಎಂದು ಕಮೆಂಟ್‌ ಮಾಡಿದ್ದಾರೆ. ಇದರ ಬೆನ್ನಲ್ಲೇ ಸುಕೃತಾ ನಾಗ್ ಕೂಡ ಈ ಬಾರಿಯ ಬಿಗ್‌ ಬಾಸ್‌ ಮೆನೆಗೆ ಎಂಟ್ರಿ ಕೊಡುತ್ತಾರೆ ಎನ್ನುವ ಚರ್ಚೆಗಳು ಶುರುವಾಗಿವೆ.
ಇದನ್ನೂ ಓದಿ: Sukrutha Nag: ವೈವಾಹಿಕ ಜೀವನಕ್ಕೆ ಕಾಲಿಡುತ್ತಿದ್ದಾರಾ ಸುಕೃತಾ ನಾಗ್? ಅಸಲಿ ಸತ್ಯವೇನು?
ಸುಕೃತಾ ನಾಗ್ ವಿಡಿಯೊ
ಲಕ್ಷಣ ಧಾರಾವಾಹಿ ಮಾತ್ರವಲ್ಲ ಕಲರ್ಸ್ ಕನ್ನಡದ ಗೀತಾ ಧಾರಾವಾಹಿ ಕೂಡ ಕೊನೆಯ ಘಟ್ಟದಲ್ಲಿದೆ. ವಿಜಯ್‌ಗೆ ಭಾನುಮತಿಯೇ ಇಷ್ಟೂ ದಿನಗಳ ಅವಾಂತರಕ್ಕೆ ಕಾರಣ ಎಂಬವ ಸತ್ಯ ಕೆಲವೇ ದಿನಗಳಲ್ಲಿ ಬಹಿರಂಗವಾಗಲಿದೆ.
ಬಿಗ್‌ ಬಾಸ್‌ ಹತ್ತನೇ (Bigg Boss Kannada 10) ಸೀಸನ್‌ ಗ್ರ್ಯಾಂಡ್‌ ಪ್ರೀಮಿಯರ್‌ ಅಕ್ಟೋಬರ್ 8ರ ಸಂಜೆ 6ಕ್ಕೆ ನಡೆಯಲಿದೆ. 100 ದಿನದ ಬಿಗ್‌ ಬಾಸ್‌ ಹತ್ತನೇ ಸೀಸನ್‌ ಆಟವು ಅ.9ರಿಂದ ಪ್ರತಿ ರಾತ್ರಿ 9:30ಕ್ಕೆ ನಡೆಯಲಿದೆ. ಈ ಬಾರಿ ಯಾರೆಲ್ಲಾ ಸ್ಪರ್ಧಿಗಳು (bigg boss kannada contestants) ಬರಬಹುದು ಎಂಬ ಕುತೂಹಲ ಮನೆ ಮಾಡಿದೆ.