ಮುಂಬೈ: ಬಾಲಿವುಡ್‌ನ ಆಮೀರ್‌ ಖಾನ್‌, ಶಾರುಖ್‌ ಖಾನ್‌ ಸೇರಿ ಹಲವು ಪ್ರಮುಖ ಹೀರೊಗಳ ಜತೆ ನಟಿಸಿ ಸೈ ಎನಿಸಿಕೊಂಡಿದ್ದ ನಟ ಜಾವೇದ್‌ ಖಾನ್‌ ಅಮ್ರೋಹಿ (೫೦) (Javed Khan Amrohi) ನಿಧನರಾಗಿದ್ದಾರೆ. ಕಳೆದ ಒಂದು ವರ್ಷದಿಂದ ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿದ್ದ ಅವರು ಶ್ವಾಸಕೋಶದ ವೈಫಲ್ಯದಿಂದಾಗಿ ನಿಧನರಾಗಿದ್ದಾರೆ ಎಂದು ನಟನ ಕುಟುಂಬದ ಮೂಲಗಳು ತಿಳಿಸಿವೆ.
“ನಟ ಜಾವೇದ್‌ ಖಾನ್‌ ಅವರು ಮುಂಬೈನ ಸ್ಯಾಂಟಾಕ್ರೂಸ್‌ನಲ್ಲಿರುವ ಸೂರ್ಯ ನರ್ಸಿಂಗ್‌ ಹೋಮ್‌ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಆದರೆ, ಶ್ವಾಸಕೋಶದ ವೈಫಲ್ಯದಿಂದಾಗಿ ಮಂಗಳವಾರ ಸಂಜೆ ೬.೩೦ರ ಸುಮಾರಿಗೆ ಕೊನೆಯುಸಿರೆಳೆದಿದ್ದಾರೆ. ಓಶಿವಾರ ಶವಾಗಾರದಲ್ಲಿ ಅವರ ಅಂತ್ಯಸಂಸ್ಕಾರ ನೆರವೇರಿಸಲಾಗುತ್ತದೆ” ಎಂದು ಮೂಲಗಳಿಂದ ತಿಳಿದುಬಂದಿದೆ.
150ಕ್ಕೂ ಅಧಿಕ ಚಿತ್ರಗಳಲ್ಲಿ ನಟನೆ
ಜಾವೇದ್‌ ಖಾನ್‌ ಅವರು ಬಾಲಿವುಡ್‌ನ ೧೫೦ಕ್ಕೂ ಸಿನಿಮಾಗಳಲ್ಲಿ ನಟಿಸಿದ್ದರು. ಹಮ್‌ ಹೈ ರಹಿ ಪ್ಯಾರ್‌ ಕೆ, ಅಂದಾಜ್‌ ಅಪ್ನಾ ಅಪ್ನಾ, ಇಶ್ಕ್‌, ಲಗಾನ್, ಚಕ್‌ ದೇ ಇಂಡಿಯಾ ಸೇರಿ ಹಲವು ಸಿನಿಮಾಗಳು ಅವರಿಗೆ ಖ್ಯಾತಿ ತಂದಿದ್ದವು. ಅದರಲ್ಲೂ, ಚಕ್‌ ದೇ ಇಂಡಿಯಾ ಸಿನಿಮಾದಲ್ಲಿ ಅವರ ನಟನೆ ಕುರಿತು ಭಾರಿ ಮೆಚ್ಚುಗೆ ವ್ಯಕ್ತವಾಗಿತ್ತು. ಕಿರುತೆರೆಯಲ್ಲೂ ಮಿಂಚಿದ್ದ ಅವರು, ‘ಮಿರ್ಜಾ ಗಾಲಿಬ್‌’ ಧಾರಾವಾಹಿಯಲ್ಲಿ ನಟಿಸಿದ್ದರು. ಇನ್ನು ಇತ್ತೀಚಿನ ಪೀಳಿಗೆಯವರಿಗೆ ಲಗಾನ್ ಚಿತ್ರದ ‘ಹಮ್‌ ಜೀತ್‌ ಗಯೇ’ ಎಂಬ ಡೈಲಾಗ್‌ನ ಮೀಮ್ಸ್‌ನಿಂದಲೇ ಪರಿಚಿತರಾಗಿದ್ದರು. ಟ್ರೋಲ್‌ ಪೇಜ್‌ಗಳಲ್ಲಿ ಇವರ ಡೈಲಾಗ್‌ ಉಲ್ಲೇಖಿಸಿ ಮೀಮ್ಸ್‌ ಮಾಡಲಾಗುತ್ತಿತ್ತು.
ಇದನ್ನೂ ಓದಿ: Lalita Lajmi Passes Away: ಬಾಲಿವುಡ್‌ ನಟ ಗುರುದತ್‌ ಸಹೋದರಿ, ’ತಾರೆ ಜಮೀನ್‌ ಪರ್’ ನಟಿ ಲಲಿತಾ ಲಜ್ಮಿ ಇನ್ನಿಲ್ಲ