ಬೆಂಗಳೂರು: ಕನ್ನಡದ ಪ್ರಖ್ಯಾತ ರಿಯಾಲಿಟಿ ಶೋ ವೀಕೆಂಡ್‌ ವಿತ್‌ ರಮೇಶ್‌ (Weekend With Ramesh) ಇದೀಗ ಮತ್ತೆ ಸದ್ದು ಮಾಡಲಾರಂಭಿಸಿದೆ. ಮೋಹಕ ತಾರೆ ರಮ್ಯ, ಪ್ರಭುದೇವ್‌, ದತ್ತಣ, ಖ್ಯಾತ ಹೃದಯ ತಜ್ಞ ಮಂಜುನಾಥ್‌ ಅವರನ್ನು ಈ ವೇದಿಕೆಯಲ್ಲಿ ಕೂರಿಸಿ ಅವರ ಬದುಕನ್ನು ಬಿಚ್ಚಿಡಲಾಗಿದೆ. ಇದೀಗ ಈ ವಾರಾಂತ್ಯದಲ್ಲಿ ಪ್ರಸಾರವಾಗಲಿರುವ ಶೋಗೆ ಯುವಜನತೆಯ ಫೇವರಿಟ್‌ ನಟ ಡಾಲಿ ಧನಂಜಯ್‌ ಆಗಮಿಸಲಿದ್ದಾರೆ.
ಹೌದು. ಈ ವಾರದ ವೀಕೆಂಡ್‌ ವಿತ್‌ ರಮೇಶ್‌ ಕಾರ್ಯಕ್ರಮದಲ್ಲಿ ಡಾಲಿ ಧನಂಜಯ್‌ ಅತಿಥಿಯಾಗಿರಲಿದ್ದಾರೆ. ಅದರ ಪ್ರೋಮೋ ಅನ್ನೂ ಕೂಡ ಜೀ ಕನ್ನಡ ವಾಹಿನಿ ಬಿಡುಗಡೆ ಮಾಡಿದೆ. ʼಬಡವರ ಮಕ್ಳು ಬೆಳಿಬೇಕುʼ ಎನ್ನೋ ಡೈಲಾಗ್‌ ಮೂಲಕವೇ ಅಪಾರ ಅಭಿಮಾನಿಗಳ ಹೃದಯ ಗೆದ್ದಿರುವ ಡಾಲಿಯ ಕಾರ್ಯಕ್ರಮದಲ್ಲಿ ಧನಂಜಯ್‌ ಅವರ ಬದುಕಿನ ಹಲವಾರು ವಿಚಾರಗಳು ವೀಕ್ಷಕರ ಮುಂದೆ ಬಿಚ್ಚಿಕೊಳ್ಳಲಿವೆ.
ಇದನ್ನೂ ಓದಿ: Dolly Dhananjay: ನಮ್ಮ ಮಧ್ಯೆ ಏನೂ ಇಲ್ಲ, ಡಾಲಿಗೆ ಹೆಣ್ಣು ಕೊಡುತ್ತಿಲ್ಲ ಎಂದ ಅಮೃತಾ ಅಯ್ಯಂಗಾರ್‌
ಡಾಲಿ ಧನಂಜಯ್‌ ಕನ್ನಡ ಚಿತ್ರರಂಗಕ್ಕೆ ಪರಿಚಯವಾಗಿದ್ದು ಡೈರೆಕ್ಟರ್‌ ಸ್ಪೆಷಲ್‌ ಸಿನಿಮಾ ಮೂಲಕ. ಆದರೆ ಈ ವೃತ್ತಿಗೆ ಬರುವುದಕ್ಕೂ ಮೊದಲು ಅವರು ಐಟಿ ಕ್ಷೇತ್ರದಲ್ಲಿ ಪ್ರಮುಖ ಸಂಸ್ಥೆಯೊಂದರಲ್ಲಿ ಕೆಲಸ ಗಿಟ್ಟಿಸಿಕೊಂಡಿದ್ದರು. ಆದರೆ ಸಿನಿಮಾ ಬಗ್ಗೆ ಇದ್ದ ಅವರ ಆಸಕ್ತಿ ಆ ಕೆಲಸವನ್ನು ಬಿಟ್ಟು ಚಿತ್ರರಂಗದತ್ತ ಎಳೆತಂದದ್ದು ಹೇಗೆ ಎನ್ನುವುದನ್ನು ನಟ ಈ ಕಾರ್ಯಕ್ರಮದಲ್ಲಿ ಹೇಳಿಕೊಳ್ಳಲಿದ್ದಾರೆ.
ರಂಗಭೂಮಿ ಸೇರಿಕೊಂಡು ಅಲ್ಲಿ ಮಾಡಿದ ಕೆಲಸಗಳು, ತಮ್ಮದೇ ಆದ ಡೊಳ್ಳು ತಂಡ ಕಟ್ಟಿದ ನೆನಪು ಹೀಗೆ ಹಲವಾರು ನೆನಪುಗಳನ್ನು ಡಾಲಿ ವೀಕೆಂಡ್‌ ವಿತ್‌ ರಮೇಶ್‌ ಕಾರ್ಯಕ್ರಮದಲ್ಲಿ ರಮೇಶ್‌ ಅವರೊಂದಿಗೆ ಹಂಚಿಕೊಳ್ಳಲಿದ್ದಾರೆ. ಚಿಕ್ಕವರಿದ್ದಾಗ ಗಣಪತಿ ಕೂರಿಸಿ, ಮೈ ಚಳಿ ಬಿಟ್ಟು ಕುಣಿಯುತ್ತಿದ್ದದ್ದು, ಸ್ನೇಹಿತರೊಂದಿಗೆ ಸೇರಿಕೊಂಡು ಮಾಡುತ್ತಿದ್ದ ಕಿತಾಪತಿಗಳೆಲ್ಲವನ್ನೂ ಎಳೆಎಳೆಯಾಗಿ ಬಿಚ್ಚಿಡಲಿದ್ದಾರೆ.
ಇದನ್ನೂ ಓದಿ: Hoysala Movie: ಡಾಲಿ ಧನಂಜಯ್‌ ಅಭಿನಯದ `ಹೊಯ್ಸಳ’ ಸಿನಿಮಾ ರಿಲೀಸ್‌: ರಶ್ಮಿಕಾ, ರಮ್ಯಾ ಶುಭ ಹಾರೈಕೆ
ಕೇವಲ ನಗು ಮಾತ್ರವಲ್ಲದೆ ಈ ಕಾರ್ಯಕ್ರಮದಲ್ಲಿ ಅಳುವೂ ಇರಲಿದೆ. ಡಾಲಿ ಅವರು ತಮ್ಮ ಬದುಕಿನ ಕಹಿ ಘಟನೆಗಳನ್ನು ನೆನೆದು ಕಣ್ಣೀರು ಹಾಕಿರುವುದನ್ನು ಪ್ರೋಮೋದಲ್ಲಿ ಕಾಣಬಹುದು. ಕಾರ್ಯಕ್ರಮಕ್ಕೆ ಬರಬೇಕಿದ್ದ ತಮ್ಮಿಷ್ಟದ ಶಿಕ್ಷಕಿ ಕಾರ್ಯಕ್ರಮಕ್ಕೆ ಕೆಲ ದಿನಗಳ ಮೊದಲೇ ನಿಧನರಾಗಿದ್ದನ್ನೂ ನಟ ಇಲ್ಲಿ ನೋವಿನಿಂದ ಹೇಳಿಕೊಂಡಿದ್ದಾರೆ. ಹಾಗೆಯೇ ಡಾಲಿ ಅವರ ಅಕ್ಕನ ಬಗ್ಗೆಯೂ ಯಾರಿಗೂ ತಿಳಿದಿರದ ವಿಚಾರವೊಂದು ಈ ಕಾರ್ಯಕ್ರಮದಿಂದ ಹೊರಬೀಳಲಿದೆ. “ಇವಳು ನನ್ನ ಅಕ್ಕ ಅಲ್ಲ ನನಗೆ ದೇವರು ಕೊಟ್ಟಿರೋ ಗಿಫ್ಟ್‌, ನನ್ನ ಮಗಳು” ಎಂದು ಡಾಲಿ ಅಕ್ಕನಿಗೆ ಏಕಾಗಿ ಹೇಳಿದರು ಎನ್ನುವುದನ್ನು ನೀವು ಕಾರ್ಯಕ್ರಮದಲ್ಲಿ ನೋಡಬಹುದು.
ಕಾರ್ಯಕ್ರಮದಲ್ಲಿ ಡಾಲಿ ಅವರ ದೊಡ್ಡ ಕುಟುಂಬ, ಕಾಳೇನಹಳ್ಳಿ ಗ್ಯಾಂಗ್‌, ಸ್ನೇಹಿತರು ಸೇರಿ ಅನೇಕರು ಭಾಗವಹಿಸಲಿದ್ದಾರೆ. ಹಾಗೆಯೇ ಹ್ಯಾಟ್ರಿಕ್‌ ಹೀರೋ ಶಿವಣ್ಣ ಕೂಡ ಡಾಲಿ ಅವರಿಗೆ ವಿಡಿಯೊ ಮೂಲಕ ಶುಭ ಹಾರೈಸಲಿದ್ದಾರೆ.