ಏಷ್ಯಾದ ಶ್ರೀಮಂತ ವ್ಯಕ್ತಿ ಮುಖೇಶ್ ಅಂಬಾನಿ (mukesh ambani) ತಮ್ಮ ಪುತ್ರ ಅನಂತ್ ಅಂಬಾನಿ ಮತ್ತು ರಾಧಿಕಾ ಮರ್ಚೆಂಟ್ ಅವರ ವಿವಾಹಕ್ಕೆವನ್ನು (Anant Radhika Wedding) ಅದ್ಧೂರಿಯಾಗಿ ನಡೆಸುತ್ತಿರುವುದು ಈಗಾಗಲೇ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ಚರ್ಚೆಯ ಸುದ್ದಿಯಾಗಿದೆ. ವಿವಾಹದ ಅಂದಾಜು ವೆಚ್ಚ 4,000ರಿಂದ 5000 ಕೋಟಿ ರೂ. ಎನ್ನಲಾಗಿದೆ. ಇದು ಅವರ ನಿವ್ವಳ ಆದಾಯದ ಶೇ. 0.5ರಷ್ಟು ಮಾತ್ರ!
ಫೋರ್ಬ್ಸ್ 2024ರ ವರದಿ ಪ್ರಕಾರ ಮುಖೇಶ್ ಅಂಬಾನಿ ಅವರ ನಿವ್ವಳ ಆದಾಯ ಮೌಲ್ಯವು 10,18,612 ಕೋಟಿ ರೂ. ಆಗಿದೆ. ಮಾರ್ಚ್‌ನಲ್ಲಿ ಮದುವೆಯ ಪೂರ್ವಭಾವಿ ಕಾರ್ಯಕ್ರಮಗಳು ಅದ್ಧೂರಿಯಾಗಿ ನಡೆದಿತ್ತು. ಅಂಬಾನಿ ಕುಟುಂಬದ ವಿವಾಹ ಕಾರ್ಯಕ್ರಮದಲ್ಲಿ ಜಾಗತಿಕ ಗಾಯನ ಐಕಾನ್‌ಗಳಾದ ಜಸ್ಟಿನ್ ಬೀಬರ್, ರಿಹಾನ್ನಾ, ದಿಲ್ಜಿತ್ ದೋಸಾಂಜ್ ಸೇರಿದಂತೆ ಹಾಲಿವುಡ್‌-ಬಾಲಿವುಡ್‌ನ ಅನೇಕ ಸೆಲೆಬ್ರಿಟಿಗಳು ಪಾಲ್ಗೊಂಡಿದ್ದರು.
ಮದುವೆಯ ಪೂರ್ವಭಾವಿಯಾಗಿ ಗುಜರಾತ್‌ನ ಜಾಮ್‌ನಗರದಲ್ಲಿ ಮೊದಲ ಕಾರ್ಯಕ್ರಮಗಳು ನಡೆದಿತ್ತು. ಬಳಿಕ ಜೂನ್‌ನಲ್ಲಿ ಇಟಲಿಯಿಂದ ಫ್ರಾನ್ಸ್‌ಗೆ ಐಷಾರಾಮಿ ವಿಹಾರ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು. ವಿವಾಹ ಕಾರ್ಯಕ್ರಮಗಳನ್ನು ಮಹಾರಾಷ್ಟ್ರದ ಮುಂಬಯಿನಲ್ಲಿ ನಡೆಯುತ್ತಿದೆ.
ಮದುವೆಯ ವೆಚ್ಚ ಎಷ್ಟು?
ಅನಂತ್ ಅಂಬಾನಿ ಮತ್ತು ರಾಧಿಕಾ ಮರ್ಚೆಂಟ್ ಅವರ ಸಂಪೂರ್ಣ ವಿವಾಹದ ಅಂದಾಜು ವೆಚ್ಚವು 4,000- 5,000 ಕೋಟಿ ರೂಪಾಯಿಗಳಷ್ಟಿದೆ. ಇದು ಮುಕೇಶ್ ಅಂಬಾನಿ ಅವರ ನಿವ್ವಳ ಆದಾಯ ಮೌಲ್ಯದ ಶೇ. 0.05 ಆಗಿದೆ. ಆದರೆ ಇದು ಅಂಬಾನಿ ಕುಟುಂಬದ ಒಟ್ಟು ಸಂಪತ್ತಿನ ಶೇಕಡಾವಾರು ಪ್ರಮಾಣವನ್ನು ಗಮನಿಸಿದರೆ ಸರಾಸರಿ ಭಾರತೀಯ ಕುಟುಂಬಗಳು ಖರ್ಚು ಮಾಡುವುದಕ್ಕಿಂತ ಕಡಿಮೆ ಖರ್ಚು ಮಾಡುತ್ತಿದೆ ಎನ್ನುತ್ತಾರೆ ಎನ್‌ಸಿ ಫೈನಾನ್ಶಿಯಲ್ ಅಡ್ವೈಸರಿ ಸರ್ವಿಸಸ್‌ನ ಸಂಸ್ಥಾಪಕ ನಿತಿನ್ ಚೌಧರಿ.
ಅನಂತ್ ಅಂಬಾನಿ ಮತ್ತು ರಾಧಿಕಾ ಮರ್ಚೆಂಟ್ ಅವರ ಧಾಮ್‌ಧೂಮ್‌ ವಿವಾಹದ ಒಳನೋಟಗಳನ್ನು ಹಂಚಿಕೊಂಡಿರುವ ಅವರು, ಕುಟುಂಬದ ಒಟ್ಟು ನಿವ್ವಳ ಮೌಲ್ಯದ ಶೇಕಡಾವಾರು ಗಮನಿಸಿದರೆ, ಅಂಬಾನಿ ಕುಟುಂಬವು ಖರ್ಚು ಮಾಡುವ ವೆಚ್ಚವು ಸರಾಸರಿ ಭಾರತೀಯ ಕುಟುಂಬವು ತಮ್ಮ ಮಕ್ಕಳ ಮದುವೆಗೆ ಎಷ್ಟು ಖರ್ಚು ಮಾಡುತ್ತಿದೆ ಎಂಬ ಬಗ್ಗೆ ಕುತೂಹಲ ಮೂಡಿಸುತ್ತದೆ.
50 ಲಕ್ಷದಿಂದ 1 ಕೋಟಿ ರೂಪಾಯಿ ನಿವ್ವಳ ಆದಾಯ ಮೌಲ್ಯ ಹೊಂದಿರುವ ಕುಟುಂಬವು ತಮ್ಮ ಮಕ್ಕಳ ಮದುವೆಗೆ 10-15 ಲಕ್ಷ ರೂಪಾಯಿ ಖರ್ಚು ಮಾಡಲು ಹಿಂಜರಿಯುವುದಿಲ್ಲ. ಅಂತೆಯೇ, ಸುಮಾರು 10 ಕೋಟಿ ರೂಪಾಯಿಗಳ ನಿವ್ವಳ ಮೌಲ್ಯವನ್ನು ಹೊಂದಿರುವ ಸುಸ್ಥಿತಿಯಲ್ಲಿರುವ ಕುಟುಂಬವು ಮದುವೆಗೆ 50 ಲಕ್ಷದಿಂದ 1.5 ಕೋಟಿ ರೂಪಾಯಿಗಳ ನಡುವೆ ಸುಲಭವಾಗಿ ಖರ್ಚು ಮಾಡುತ್ತದೆ. ಸಾಮಾನ್ಯ ಆದಾಯದ ಕುಟುಂಬಗಳು ಕೂಡ ತಮ್ಮ ಮಕ್ಕಳ ಮದುವೆಯನ್ನು ಸಡಗರದಿಂದಲೇ ನಡೆಸುತ್ತವೆ. ಈ ಎಲ್ಲಾ ಅಂಕಿಅಂಶಗಳನ್ನು ಶೇಕಡಾವಾರು ಪ್ರಮಾಣದಲ್ಲಿ ನೋಡಿದಾಗ ಯಾವುದೇ ಭಾರತೀಯ ಕುಟುಂಬವು ಮದುವೆಗೆ ತಮ್ಮ ಒಟ್ಟು ಸಂಪತ್ತಿನ ಶೇಕಡಾ 5ರಿಂದ 15ರಷ್ಟು ವ್ಯಯಿಸುತ್ತದೆ ಎನ್ನಬಹುದು. ಹೀಗಾಗಿ ಅಂಬಾನಿ ಕುಟುಂಬ ಮಾಡುತ್ತಿರುವ ಖರ್ಚು ಸಹಜ ಎನ್ನಬಹುದು.
ಅಂಬಾನಿ ಮದುವೆಯ ಅಂದಾಜು ವೆಚ್ಚ
ಅನಂತ್ ಅಂಬಾನಿ ಮತ್ತು ರಾಧಿಕಾ ಮರ್ಚೆಂಟ್ ಅವರ ವಿವಾಹದ ಬಗ್ಗೆ ವಿಭಿನ್ನ ಅಂದಾಜುಗಳನ್ನು ಹಾಕಿದ್ದರೂ ಇದು ಖಂಡಿತವಾಗಿಯೂ ವ್ಯವಸ್ಥೆಗಳು, ಕಲಾವಿದರು ಮತ್ತು ವೈಭವದ ಪ್ರಮಾಣವನ್ನು ಗಮನಿಸಿದರೆ ಸಾವಿರಾರು ಕೋಟಿಗಳಷ್ಟು ವೆಚ್ಚವಾಗುತ್ತದೆ. 4,000-5,000 ಕೋಟಿ ರೂ. ಅಂದಾಜು ಮಾಡಬಹುದಾಗಿದೆ.
ಇದನ್ನೂ ಓದಿ: Anant Radhika Wedding: ಮಗನ ಮದುವೆ ಸಂದರ್ಭದಲ್ಲಿ ಕಾಶಿಗೆ ಗೌರವ; ನೀತಾ ಅಂಬಾನಿಯ ಈ ವಿಡಿಯೊ ನೋಡಿ
ಫೋರ್ಬ್ಸ್ ಪ್ರಕಾರ ಮುಖೇಶ್ ಅಂಬಾನಿಯವರ ನಿವ್ವಳ ಮೌಲ್ಯವು 2024 ರಲ್ಲಿ 10,28,544 ಕೋಟಿ ರೂ. ಗಳಾಗಿದೆ. ಇದರಲ್ಲಿ 5,000 ಕೋಟಿ ರೂ. ಗಳನ್ನು ವೆಚ್ಚವೆಂದು ಪರಿಗಣಿಸಿದರೆ ಇದು ಸರಿಸುಮಾರು 6 ಬಿಲಿಯನ್ ಡಾಲರ್ ಆಗಿರುತ್ತದೆ. ಅದನ್ನು ಶೇಕಡಾವಾರು ಪ್ರಮಾಣದಲ್ಲಿ ಹೇಳುವುದಾದರೆ ಇದು ಅಂಬಾನಿ ಕುಟುಂಬದ ನಿವ್ವಳ ಮೌಲ್ಯದ ಸರಿಸುಮಾರು ಶೇ. 0.5 ರಷ್ಟಾಗುತ್ತದೆ. ಹಾಗೆ ಲೆಕ್ಕ ಹಾಕಿ ನೋಡಿದರೆ ಅಂಬಾನಿ ಕುಟುಂಬ ಮಾಡುತ್ತಿರುವ ಖರ್ಚು ಸಾಮಾನ್ಯ ಭಾರತೀಯ ಕುಟುಂಬಗಳು ಮಾಡುತ್ತಿರುವ ಸರಾಸರಿ ಖರ್ಚಿಗಿಂತ ಕಡಿಮೆ ಎನ್ನುತ್ತಾರೆ ಆರ್ಥಿಕ ಪರಿಣತರು.