ಪಾಟ್ನಾ: ಮನೆಯಿಂದ ನಾಪತ್ತೆಯಾಗಿದ್ದ ಯುವಕನ ಶವ ಪೊದೆಯಲ್ಲಿ ಸಿಕ್ಕಿದೆ. ಆ ಶವದ ಮೇಲೆಲ್ಲ ಚಾಕುವಿನಿಂದ ಚುಚ್ಚಿದ ಗುರುತಿದೆ. ಸುಮಾರು ನೂರಕ್ಕೂ ಹೆಚ್ಚು ಬಾರಿ ಚುಚ್ಚಿ ಈ ಯುವಕನನ್ನು ಹತ್ಯೆ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಈ ಘಟನೆ ನಡೆದಿದ್ದು ಬಿಹಾರದಲ್ಲಿ. ಯುವಕನ ಹೆಸರು ಚಿಂಟು ಎಂದಾಗಿದ್ದು, ಸೀತಾಮಾರ್ಹಿ ನಗರದ ನಿವಾಸಿಯಾಗಿದ್ದ.
ಚಿಂಟು ಮಂಗಳವಾರದಿಂದ ಮನೆಯಿಂದ ನಾಪತ್ತೆಯಾಗಿದ್ದ. ಆತನನ್ನು ತುಂಬ ಹುಡುಕಲಾಗಿತ್ತು. ಆದರೆ ಪತ್ತೆಯಾಗಿರಲಿಲ್ಲ. ಬುಧವಾರ ಮನೆ ಸಮೀಪದ ಪೊದೆಯಲ್ಲಿ ಅವನ ಮೃತದೇಹ ಸಿಕ್ಕಿತ್ತು. ಪೊಲೀಸರಿಗೆ ಮಾಹಿತಿ ನೀಡಲಾಯಿತು. ಚಿಂಟುವಿನ ಮುಖ ಮತ್ತು ದೇಹದ ಮೇಲೆ ಚಾಕುವಿನಿಂದ ಹರಿತ ಗಾಯಗಳನ್ನು ಮಾಡಲಾಗಿದೆ ಎಂದು ಅವರು ತಿಳಿಸಿದ್ದಾರೆ.
ಚಿಂಟು ಕಳೆದ ತಿಂಗಳ ಹಿಂದಷ್ಟೇ ಮದುವೆಯಾಗಿದ್ದ. ಮಾರ್ಚ್ 8ರಂದು ಹೋಳಿ ಹಬ್ಬದ ದಿನ ಚಿಂಟು ಮತ್ತು ನೆರೆಮನೆಯವನಾದ ರಾಮಾ ಮಹತೋ ನಡುವೆ ದೊಡ್ಡಮಟ್ಟದ ಗಲಾಟೆಯಾಗಿತ್ತು. ಆತನೇ ಚಿಂಟುವನ್ನು ಹತ್ಯೆ ಮಾಡಿದ್ದಾನೆ ಎಂದು ಸಹೋದರ ಪೊಲೀಸರಿಗೆ ದೂರು ನೀಡಿದ್ದಾನೆ. ಇನ್ನು ಚಿಂಟು ಹತ್ಯೆಯ ಬೆನ್ನಲ್ಲೇ ಸ್ಥಳೀಯವಾಗಿ ಹಲವು ರಸ್ತೆಗಳ ತಡೆ ನಡೆಸಿ ಸ್ಥಳೀಯರು ಪ್ರತಿಭಟನೆ ಮಾಡಿದ್ದಾರೆ. ಹಾಗೇ, ಆರೋಪಿಯನ್ನು ಶೀಘ್ರವೇ ಬಂಧಿಸುವುದಾಗಿ ಪೊಲೀಸರು ಹೇಳಿದ್ದಾರೆ.
ಇದನ್ನೂ ಓದಿ: ಬಿಹಾರದಲ್ಲಿ 10 ಲಕ್ಷ ಸ್ಮಾರ್ಟ್ ಪ್ರಿಪೇಯ್ಡ್ ಮೀಟರ್ ಅಳವಡಿಸಲಿದೆ ಜಿಯೋಥಿಂಗ್ಸ್