ದೆಹಲಿಯಲ್ಲಿ ಮತ್ತೊಂದು ಭೀಕರ ಹತ್ಯೆಯಾಗಿದೆ (Delhi Murder). ಗೀತಾ ಕಾಲೋನಿ ಫ್ಲೈಓವರ್ ಬಳಿ ಮಹಿಳೆಯೊಬ್ಬರ ದೇಹ ತುಂಡುತುಂಡಾದ ರೂಪದಲ್ಲಿ ಸಿಕ್ಕಿದೆ. ಸ್ಥಳದಲ್ಲಿ ಪೊಲೀಸ್ ತಂಡ ಬೀಡುಬಿಟ್ಟಿದ್ದು, ಪರಿಶೀಲನೆ ನಡೆಸುತ್ತಿದೆ. ಮಹಿಳೆಯ ದೇಹ ತುಂಡುತುಂಡಾಗಿದೆ. ಜನ್ಮುನಾ ಖಾದರ್ ಎಂಬಲ್ಲಿ ಈ ಗೀತಾ ಕಾಲೋನಿ ಇದೆ. ಸಮೀಪವೇ ಇರುವ ಮೇಲ್ಸೇತುವೆ ಬಳಿ ಎರಡು ಪ್ರದೇಶಗಳಲ್ಲಿ ಮಹಿಳೆಯ ದೇಹದ ತುಂಡುಗಳು ಸಿಕ್ಕಿವೆ. ಮೃತ ಮಹಿಳೆಗೆ ಅಂದಾಜು 35-40 ವರ್ಷ ವಯಸ್ಸಾಗಿರಬಹುದು ಎಂದು ಉತ್ತರ ದೆಹಲಿ ಡೈರೆಕ್ಟರ್ ಜನರಲ್ ಆಫ್ ಪೊಲೀಸ್ ತಿಳಿಸಿದ್ದಾರೆ. ವಿಧಿವಿಜ್ಞಾನ ವಿಭಾಗದ ತಂಡದವರು ಮೃತದೇಹಗಳನ್ನು ತಪಾಸಣೆ ಮಾಡುತ್ತಿದ್ದಾರೆ. ಹೆಣ ಸಿಕ್ಕ ಪ್ರದೇಶಗಳಲ್ಲಿ ಕೂಲಂಕಷವಾಗಿ ಹುಡುಕಾಟ ನಡೆದಿದೆ. ಏನಾದರೂ ಪುರಾವೆ ಸಿಗಬಹುದು ಎಂದಿದ್ದಾರೆ.
#WATCH | Delhi Police recovers the body of a woman, chopped into several pieces from near Geeta Colony flyover area. Police present at the spot.
— ANI (@ANI) July 12, 2023
More details are awaited. pic.twitter.com/F68RdUaifx
ಕಳೆದ ವರ್ಷ ದೆಹಲಿಯಲ್ಲಿ ಶ್ರದ್ಧಾ ವಾಳ್ಕರ್ ಹತ್ಯೆ ಪ್ರಕರಣ ಇಡೀ ದೇಶವನ್ನು ಬೆಚ್ಚಿಬೀಳಿಸಿತ್ತು. ಮುಂಬಯಿ ಮೂಲದ ಈಕೆ ತನ್ನ ಗೆಳೆಯ ಅಫ್ತಾಬ್ ಪೂನಾವಾಲಾ ಜತೆ ಲಿವ್ ಇನ್ ರಿಲೇಶನ್ಶಿಪ್ನಲ್ಲಿ ಇದ್ದಳು. ಇವರಿಬ್ಬರೂ ದೆಹಲಿಯ ಅಪಾರ್ಟ್ಮೆಂಟ್ನಲ್ಲಿ ವಾಸವಾಗಿದ್ದರು. ಆದರೆ ಅಫ್ತಾಬ್ ಪೂನಾವಾಲಾ ಆಕೆಯನ್ನು ಉಸಿರುಗಟ್ಟಿಸಿಕೊಂದು, ಬಳಿಕ ಶವವನ್ನು 35 ತುಂಡುಗಳಾಗಿ ಕತ್ತರಿಸಿ, ಫ್ರಿಜ್ನಲ್ಲಿ ಇಟ್ಟಿದ್ದ. ಪ್ರತಿದಿನ ಕೆಲವೇ ತುಂಡುಗಳನ್ನು ತೆಗೆದುಕೊಂಡು ಹೋಗಿ, ಮೆಹ್ರೌಲಿ ಅರಣ್ಯ ಪ್ರದೇಶದ ವಿವಿಧೆಡೆಗಳಲ್ಲಿ ಎಸೆದಿದ್ದ. ಶ್ರದ್ಧಾ ವಾಳ್ಕರ್ ಹೀಗೆ ಭಯಾನಕ ಹತ್ಯೆಯಾದ ಬೆನ್ನಲ್ಲೇ ಇಂಥ ಸ್ವರೂಪದ ಹಲವು ಕೊಲೆಗಳು ಬೆಳಕಿಗೆ ಬಂದಿವೆ.
ಇದನ್ನೂ ಓದಿ: Crime News: ಪತ್ನಿಯ ಶವ ಫ್ರೀಜರ್‌ನಲ್ಲಿ ಇಟ್ಟ, ಪೊಲೀಸರು ಕೇಳಿದರೆ ಜಾಂಡೀಸ್‌ನಿಂದ ಸಾವು ಎಂದ, ಮುಂದೇನಾಯ್ತು?
ಅದೇ ರೀತಿ ಮುಂಬಯಿಯಲ್ಲೂ ಇಂಥದ್ದೇ ಘಟನೆ ನಡೆದಿತ್ತು. ಅಲ್ಲಿನ ಗೀತಾ ನಗರದ ಅಪಾರ್ಟ್ಮೆಂಟ್ನಲ್ಲಿದ್ದ ಮನೋಜ್ ಸಹಾನಿ ಎಂಬಾತ ತನ್ನ ಲಿವ್ ಇನ್ ಸಂಗಾತಿ ಸರಸ್ವತಿ ವೈದ್ಯ ಎಂಬಾಕೆಯನ್ನು ಕೊಂದು, ಮೃತದೇಹವನ್ನು ಸಣ್ಣಸಣ್ಣ ತುಣುಕಗಳಾಗಿ ಕತ್ತರಿಸಿದ್ದ. ಬಳಿಕ ಆ ತುಣುಕುಗಳನ್ನು ಫ್ರಿಜ್ನಲ್ಲಿ ಇಟ್ಟು ಬೇಯಿಸಿದ್ದ. ಕಳೆದ ವರ್ಷ ಡಿಸೆಂಬರ್ನಲ್ಲಿ ರಾಜಸ್ಥಾನ ಜೈಪುರದಲ್ಲೂ ಇಂಥದ್ದೇ ಕೊಲೆಯಾಗಿತ್ತು. 32ವರ್ಷದ ಯುವಕನೊಬ್ಬ, ತನ್ನ ಅತ್ತೆಯನ್ನು ಕೊಂದು, ಅವರ ಮೃತದೇಹವನ್ನು 10 ತುಂಡುಗಳಾಗಿ ಕತ್ತರಿಸಿ, ಬಕೆಟ್ನಲ್ಲಿ ತುಂಬಿಕೊಂಡು ಹೋಗಿ ರಸ್ತೆ ಪಕ್ಕ ಎಸೆದಿದ್ದ. ಇತ್ತೀಚೆಗೆ ಕರ್ನಾಟಕದ ಚಿಕ್ಕೋಡಿಯಲ್ಲಿ ನಡೆದ ಜೈನಮುನಿ ಕಾಮಕುಮಾರ ಮಹಾರಾಜರ ಹತ್ಯೆಯೂ ಇದೇ ರೀತಿ ಭೀಕರವಾಗಿದೆ. ಅವರ ದೇಹವನ್ನು ತುಂಡು ಮಾಡಿದ ಹಂತಕರು ಕೊಳವೆಬಾವಿಗೆ ಎಸೆದಿದ್ದರು.