ಬಿಜೆಪಿ ಮುಖಂಡನ ಅನುಮಾನಾಸ್ಪದ ಸಾವು; ಮರಕ್ಕೆ ನೇತಾಡುತ್ತಿತ್ತು ಮೃತದೇಹ, ರಕ್ತವೂ ಇತ್ತು !

ಶ್ರೀನಗರ: ಜಮ್ಮು-ಕಾಶ್ಮೀರದ ಕಥುವಾ ಜಿಲ್ಲೆಯ ಹಿರಾನಗರ್​​​ನಲ್ಲಿ ಬಿಜೆಪಿ ನಾಯಕ (BJP Leader)ನೊಬ್ಬನ ಶವ ಅನುಮಾನಾಸ್ಪದವಾಗಿ ಪತ್ತೆಯಾಗಿದೆ. ಮರವೊಂದಕ್ಕೆ ಅವರ ಮೃತದೇಹ ನೇಣು ಹಾಕಿದ ಸ್ಥಿತಿಯಲ್ಲಿ ನೇತಾಡುತ್ತಿತ್ತು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ಅಂದಹಾಗೇ, ಮೃತಪಟ್ಟ ಬಿಜೆಪಿ ನಾಯಕ ಸೋಮ್​ ರಾಜ್​ ಎಂಬುವರಾಗಿದ್ದು, ಇಂದು ಮುಂಜಾನೆ ಅವರ ಮೃತದೇಹವನ್ನು ದಾರಿಹೋಕರೊಬ್ಬರು ನೋಡಿ, ಬಳಿಕ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸೋಮ್​ ರಾಜ್​ ದೇಹದ ಮೇಲೆ ರಕ್ತವಿದೆ. ಸದ್ಯ ಅವರ ಶವವನ್ನು ಪೋಸ್ಟ್ ಮಾರ್ಟಮ್​ ಮಾಡಿ, ಕುಟುಂಬದವರಿಗೆ ಹಸ್ತಾಂತರ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಸೋಮ್​ ರಾಜ್​ ಕಳೆದ ಮೂರ್ನಾಲ್ಕು ದಿನಗಳಿಂದಲೂ ನಾಪತ್ತೆಯಾಗಿದ್ದರು. ಅವರಿಂದು ಮೃತಪಟ್ಟಿದ್ದಾರೆ. ಸೋಮ್​ ರಾಜ್​​ರನ್ನು ಹತ್ಯೆ ಮಾಡಲಾಗಿದೆ ಎಂದು ಅವರ ಕುಟುಂಬದವರು ಆರೋಪ ಮಾಡುತ್ತಿದ್ದಾರೆ. ಅಷ್ಟೇ ಅಲ್ಲ, ಇದೊಂದು ಕೊಲೆ ಕೇಸ್​ ಆಗಿದ್ದು ತನಿಖೆ ಮಾಡಬೇಕು ಎಂದು ಹಲವು ಬಿಜೆಪಿ ನಾಯಕರೂ ಆಗ್ರಹ ಮಾಡುತ್ತಿದ್ದಾರೆ.

ಈ ಬಗ್ಗೆ ಮಾಹಿತಿ ನೀಡಿದ ಕಥುವಾ ಎಸ್​​ಎಸ್​ಪಿ ಆರ್.​ಸಿ. ಕೋಟ್ವಾಲ್​, ಬಿಜೆಪಿ ನಾಯಕನ ಸಾವಿನ ಕೇಸ್​​ ತನಿಖೆಗಾಗಿ ಎಸ್​ಐಟಿ (ವಿಶೇಷ ತನಿಖಾ ತಂಡ) ರಚನೆ ಮಾಡಲಾಗಿದೆ. ಪೋಸ್ಟ್​ ಮಾರ್ಟಮ್​ ರಿಪೋರ್ಟ್​ ಇನ್ನೂ ಬರಬೇಕಿದೆ ಎಂದು ತಿಳಿಸಿದ್ದಾರೆ. ಬಿಜೆಪಿ ನಾಯಕನ ಸಾವಿಗೆ ಕೇಂದ್ರ ಸಚಿವ ಜಿತೇಂದ್ರ ಸಿಂಗ್​ ಸಂತಾಪ ಸೂಚಿಸಿದ್ದಾರೆ. ಸೋಮಾ ನನ್ನ ಹಳೇ ಸಹೋದ್ಯೋಗಿ ಆಗಿದ್ದರು. ಅವರೊಂದಿಗೆ ನನ್ನ ಒಡನಾಟ ತುಂಬ ಚೆನ್ನಾಗಿತ್ತು ಎಂದೂ ಹೇಳಿಕೊಂಡಿದ್ದಾರೆ.

ಇದನ್ನೂ ಓದಿ: ಕಾಶ್ಮೀರಿ ಪಂಡಿತರ ಹಂತಕ ಬಿಟ್ಟಾ ಕರಾಟೆ ಪತ್ನಿ ಸೇರಿ ನಾಲ್ವರನ್ನು ವಜಾಗೊಳಿಸಿದ ಜಮ್ಮು ಕಾಶ್ಮೀರ ಸರ್ಕಾರ