ಲಖನೌ: 10ನೇ ತರಗತಿಯ ವಿದ್ಯಾರ್ಥಿಯೊಬ್ಬ ತನ್ನ ಶಿಕ್ಷಕನ ಮೇಲೆ ಮೂರು ಬಾರಿ ಗುಂಡು ಹಾರಿಸಿದ್ದಾನೆ. ಶಿಕ್ಷಕನಿಗೆ ತೀವ್ರ ಗಾಯಗಳಾಗಿದ್ದರೂ, ಜೀವಕ್ಕೇನೂ ಅಪಾಯ ಇಲ್ಲ ಎನ್ನಲಾಗಿದೆ. ಈ ಹುಡುಗ ಮತ್ತು ಇನ್ನೊಬ್ಬ ವಿದ್ಯಾರ್ಥಿ ನಡುವೆ ಶಾಲೆಯಲ್ಲಿ ಗಲಾಟೆಯಾಗಿತ್ತು. ಆಗ ಶಿಕ್ಷಕ ಇನ್ನೊಬ್ಬ ಹುಡುಗನ ಪರ ವಹಿಸಿ, ಈತನನ್ನು ನಿಂದಿಸಿದ್ದರು. ಅದೇ ಸಿಟ್ಟಿಗೆ ಹುಡುಗ ಶೂಟ್ ಮಾಡಿದ್ದಾನೆ ಎಂದು ಹೇಳಲಾಗಿದೆ.
10ನೇ ತರಗತಿ ಹುಡುಗ ಪಿಸ್ತೂಲ್ ಹಿಡಿದು, ಶಿಕ್ಷಕನನ್ನು ಬೆನ್ನತ್ತಿ ಹೋಗಿ ಗುಂಡು ಹಾರಿಸಿದ್ದಾನೆ. ಆ ಜಾಗದಲ್ಲಿ ಇಬ್ಬರು-ಮೂವರು ಇದ್ದರೂ ಅವರಿಗೆ ಬಳಿ ಬರಲು ಭಯವಾಗಿ ದೂರದಲ್ಲೇ ಇದ್ದರು. ಒಬ್ಬಳಂತೂ ಅಲ್ಲಿನ ದೃಶ್ಯ ನೋಡಿಯೇ ಓಡಿ ಹೋಗಿದ್ದಾಳೆ. ಕೊನೆಯಲ್ಲಿ ಆ ಹುಡುಗನನ್ನು ಗಟ್ಟಿಯಾಗಿ ಹಿಡಿದು, ಶಿಕ್ಷಕನನ್ನು ಬಿಡಿಸಲಾಗಿದೆ. ಈ ದೃಶ್ಯಗಳೆಲ್ಲ ಸಿಸಿಟಿವಿ ಕ್ಯಾಮರಾದಲ್ಲಿ ಸೆರೆಯಾಗಿದೆ. ಸದ್ಯ ಶಿಕ್ಷಕನನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಪೊಲೀಸರು ಪ್ರಕರಣ ದಾಖಲು ಮಾಡಿಕೊಂಡು, ತನಿಖೆ ಪ್ರಾರಂಭ ಮಾಡಿದ್ದಾರೆ.
ಈ ಬಗ್ಗೆ ಮಾಹಿತಿ ನೀಡಿದ ಸ್ಥಳೀಯ ಪೊಲೀಸ್ ಅಧಿಕಾರಿ ರಾಜೀವ್ ದೀಕ್ಷಿತ್, ‘ಹುಡುಗ ಮೂರು ಬಾರಿ ಗುಂಡು ಹಾರಿಸಿದರೂ, ಅದೃಷ್ಟಕ್ಕೆ ಶಿಕ್ಷಕನ ಸೂಕ್ಷ್ಮ ಅಂಗಗಳಿಗೆ ತಾಗಲಿಲ್ಲ. ಹೀಗಾಗಿ ಜೀವಕ್ಕೇನೂ ಅಪಾಯ ಇಲ್ಲದಂತಾಗಿದೆ. ಆದರೂ ಸ್ಥಳೀಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಸಾಧ್ಯವಾಗದೆ, ಲಖನೌ ಹಾಸ್ಪಿಟಲ್ಗೆ ಕರೆದೊಯ್ಯಲಾಗಿದೆ’ ಎಂದು ಮಾಹಿತಿ ನೀಡಿದ್ದಾರೆ. ಘಟನೆ ಬಗ್ಗೆ ಪ್ರತಿಕ್ರಿಯೆ ನೀಡಿದ ಶಿಕ್ಷಕ ‘ನಾನು ವಿದ್ಯಾರ್ಥಿಗೆ ಬೈದಿದ್ದರಿಂದ ಆತ ಇಷ್ಟೆಲ್ಲ ಸಿಟ್ಟಾಗಿದ್ದಾನೆ ಎಂದುಕೊಂಡಿರಲಿಲ್ಲ’ ಎಂದಿದ್ದಾರೆ.
ಇದನ್ನೂ ಓದಿ: ಕಾಶ್ಮೀರದಲ್ಲಿ ವಲಸೆ ಕಾರ್ಮಿಕನನ್ನು ಕೊಂದ ಉಗ್ರರು; ಮಧ್ಯರಾತ್ರಿ ಗುಂಡಿನ ದಾಳಿ