ಬೆಳಗಾವಿ: ಇಲ್ಲಿನ ದೇವಸ್ಥಾನಕ್ಕೆ ಸಂಬಂಧಿಸಿದ ಹೊಂಡದಲ್ಲಿ (Temple pond) ಬೆಳ್ಳಂಬೆಳಗ್ಗೆ ಜೋಡಿ ಶವಗಳು (dead bodies found) ತೇಲುವುದು ಕಂಡುಬಂದಿದ್ದು, ಇದು ಆತ್ಮಹತ್ಯೆನಾ? ಕೊಲೆನಾ ಎಂಬ ಸಂಶಯ ಮೂಡಿದೆ. ಬೆಳಗಾವಿ ನಗರದ ಕಪಿಲೇಶ್ವರ ಮಂದಿರದ (Belagavi Kapileshwara Temple) ಹೊಂಡದಲ್ಲಿ ಒಂದು ಗಂಡು ಒಂದು ಹೆಣ್ಣಿನ ಶವ ಪತ್ತೆಯಾಗಿದೆ. ಇವರಿಬ್ಬರು ತಡರಾತ್ರಿ ಆತ್ಮಹತ್ಯೆ ಮಾಡಿಕೊಂಡಿರುವ ಶಂಕೆ ವ್ಯಾಪಕವಾಗಿದೆ. ಆದರೆ, ಮುಖ ಕೆಳಗಾಗಿ ಮೃತದೇಹಗಳು ಬಿದ್ದಿರುವುದರಿಂದ ಮೃತರ ಗುರುತು ಇನ್ನೂ ಪತ್ತೆಯಾಗಿಲ್ಲ.
ಬುಧವಾರ ಬೆಳಗ್ಗೆ ಎಂದಿನಂತೆ ಜನ ವಾಕಿಂಗ್‌ಗೆ ಹೋದಾಗ ಶವಗಳನ್ನು ನೋಡಿ ಬೆಚ್ಚಿ ಬಿದ್ದಿದ್ದಾರೆ. ಈ ಸುದ್ದಿ ಹರಡುತಿದ್ದಂತೆಯೇ ತಂಡೋಪತಂಡವಾಗಿ ವೀಕ್ಷಿಸಲು ಜನರು ಆಗಮಿಸುತ್ತಿದ್ದಾರೆ.
ಯುವತಿ ಹಸಿರು ಚೂಡಿದಾರ್‌ ಧರಿಸಿದ್ದರೆ, ಯುವಕ ನೀಲಿ ಟೀ ಶರ್ಟ್‌ ಧರಿಸಿದ್ದಾರೆ. ಇಬ್ಬರೂ ದೃಢಕಾಯರಾಗಿದ್ದಾರೆ. ಅವರ ದೇಹವನ್ನು ನೋಡಿದಾಗ ವಯಸ್ಸು 35ರಿಂದ 40 ಇರುವಂತೆ ಕಾಣುತ್ತಿದೆ. ಇವರು ವಿವಾಹಿತರು ಇರುವ ಬಗ್ಗೆ ಜನರು ಮಾತನಾಡಿಕೊಳ್ಳುತ್ತಿದ್ದಾರೆ.
ಸ್ಥಳಕ್ಕೆ ನಗರದ ಹಿರಿಯ ಪೊಲೀಸರ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು, ಮೃತದೇಹಗಳನ್ನು ಮೇಲಕ್ಕೆತ್ತಲು ವ್ಯವಸ್ಥೆ ಮಾಡುತ್ತಿದ್ದಾರೆ. ಶಹಾಪುರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದ ಘಟನೆ ಇದು.
ಇದನ್ನೂ ಓದಿ: Murder Case: ಅನೈತಿಕ ಸಂಬಂಧ ನೋಡಿದ ಮಗನನ್ನು ಕೊಂದಿದ್ದ ತಾಯಿಗೆ ಜೀವಾವಧಿ ಶಿಕ್ಷೆ
ಪ್ಯಾಂಟ್‌ನ ಲೇಸನ್ನು ಕುತ್ತಿಗೆಗೆ ಬಿಗಿದು ಸ್ನೇಹಿತನ ಕೊಲೆ
ರಾಯಚೂರು: ಕುಡಿದ ಮತ್ತಿನಲ್ಲಿ ವ್ಯಕ್ತಿಯೊಬ್ಬ ತನ್ನ ಸ್ನೇಹಿತನನ್ನೇ ಕೊಲೆ ಮಾಡಿದ್ದಾನೆ. ಅದೂ ನೈಟ್ ಪ್ಯಾಂಟ್‌ನ ಲೇಸನ್ನೇ ಕುತ್ತಿಗೆಗೆ ಬಿಗಿದು. ಈ ಘಟನೆ ನಡೆದಿರುವುದು ಲಿಂಗಸುಗೂರು ತಾಲ್ಲೂಕಿನ ನಾಗರಾಳ ಗ್ರಾಮದಲ್ಲಿ.
ರವಿಕುಮಾರ (33) ಕೊಲೆಯಾದ ಯುವಕ. ಹುಬ್ಬಳ್ಳಿ ಮೂಲದ ಪವನ ಕುಮಾರ ಕೊಲೆ ಮಾಡಿದ ಆರೋಪಿ. ಮಂಗಳವಾರ ರಾತ್ರಿ ಇವರಿಬ್ಬರು ಜತೆಯಾಗಿ ಮದ್ಯಪಾನ ಮಾಡುತ್ತಿದ್ದರು. ಆಗ ಅವರಿಬ್ಬರ ನಡುವೆ ಕ್ಷುಲ್ಲಕ ಕಾರಣಕ್ಕೆ ಜಗಳ ಆರಂಭವಾಗಿದೆ. ಪವನ್‌ ಕುಮಾರ್‌ ಸಿಟ್ಟು ಮತ್ತು ಮತ್ತಿನಲ್ಲಿ ನೈಟ್ ಪ್ಯಾಂಟ್ ಲೇಸನ್ನೇ ಕುತ್ತಿಗೆಗೆ ಬಿಗಿದು ಸ್ನೇಹಿತನ ರವಿಕುಮಾರ್‌ನ್ನು ಕೊಲೆ ಮಾಡಿದ್ದಾನೆ.
ನಿಜವೆಂದರೆ ಈ ಕೊಲೆ ನಡೆದಿದ್ದು ಕೊಲೆಯಾದ ರವಿಕುಮಾರ್‌ನ ಮನೆಯಲ್ಲೇ. ಕುಡಿಯುವ ಅಭ್ಯಾಸವಿದ್ದ ಅವರು ಸ್ವಾತಂತ್ರ್ಯದ ಸಂಭ್ರಮದ ಹಿನ್ನೆಲೆಯಲ್ಲಿ ಮದ್ಯಪಾನಕ್ಕೆ ಮುಂದಾಗಿದ್ದರು. ಅದಕ್ಕಾಗಿ ಪವನ್‌ ರವಿಕುಮಾರ್‌ನ ಮನೆಗೇ ಬಂದಿದ್ದ. ರವಿಕುಮಾರ್‌ನ ಮನೆಯ ಟೆರೇಸ್‌ ಮೇಲೆಯೇ ಕುಳಿತು ಕಿಕ್ಕೇರಿಸಿಕೊಳ್ಳುತ್ತಿದ್ದರು. ಮಧ್ಯೆ ಜಗಳ ಹುಟ್ಟಿಕೊಂಡು ಕೊಲೆಯಲ್ಲಿ ಅಂತ್ಯಗೊಂಡಿದೆ.
ಮುದಗಲ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಆರೋಪಿ ಪವನ್‌ನನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.