ಮಧ್ಯಪ್ರದೇಶದ ಭೋಪಾಲ್ನಲ್ಲಿ ಮೂರು ವರ್ಷದ ಬಾಲಕಿ ಮೇಲೆ ಅತ್ಯಾಚಾರ ಎಸಗಿದ ನರ್ಸರಿ ಬಸ್ ಚಾಲಕ ಹನುಮಂತ್ ಜಾಧವ್ಗೆ ಅಲ್ಲಿನ ಜಿಲ್ಲಾಡಳಿತ ಬಿಸಿ ಮುಟ್ಟಿಸಿದೆ. ಹನುಮಂತ್ ಈಗಾಗಲೇ ಅರೆಸ್ಟ್ ಆಗಿ ಜೈಲು ಸೇರಿದ್ದಾನೆ. ಇತ್ತ ಶಾಹ್ಪುರ ಏರಿಯಾದಲ್ಲಿ ಆತ ಅಕ್ರಮವಾಗಿ ನಿರ್ಮಿಸಿಕೊಂಡಿದ್ದ ಮನೆಯನ್ನು ಜಿಲ್ಲಾಡಳಿತ ಬುಲ್ಡೋಜರ್ ಮೂಲಕ ನೆಲಸಮ ಮಾಡಿದೆ. ಶಾಹ್ಪುರ್ನಲ್ಲಿರುವ ವಸಂತ್ ಕುಂಜ್ ಕಾಲೊನಿಯ ಉದ್ಯಾನ ಪ್ರದೇಶವನ್ನು ಅತಿಕ್ರಮಿಸಿ ಹನುಮಂತ್ ಮನೆ ಕಟ್ಟಿಕೊಂಡಿದ್ದ. ಹೀಗಾಗಿ ಅದನ್ನು ಕೆಡವಲು ಕಂದಾಯ ಇಲಾಖೆ, ಪೊಲೀಸ್ ಮತ್ತು ಮುನ್ಸಿಪಲ್ ಕಾರ್ಪೋರೇಶನ್ ಜಂಟಿಯಾಗಿ ತೀರ್ಮಾನ ತೆಗೆದುಕೊಂಡಿದ್ದವು. ಹಾಗೇ ನೆಲಸಮಕ್ಕೂ ಮೊದಲು ಮನೆ ಖಾಲಿ ಮಾಡಿಸಲಾಗಿತ್ತು.
ಹನುಮಂತ್ ಜಾಧವ್ ಸೆಪ್ಟೆಂಬರ್ 8ರಂದು ಬಸ್ನಲ್ಲಿಯೇ ಮೂರು ವರ್ಷದ ಬಾಲಕಿ ಮೇಲೆ ಅತ್ಯಾಚಾರ ಎಸಗಿದ್ದ. ಅದೇ ಬಸ್ನಲ್ಲಿದ್ದ ಮಹಿಳಾ ಅಟೆಂಡೆಂಟ್ ಊರ್ಮಿಳಾ ಸಾಹು ಎಂಬಾಕೆಯ ಮುಂದೆಯೇ ನಡೆದಿತ್ತು ದುಷ್ಕೃತ್ಯ. ಹನುಮಂತ್ಗೆ ಸಹಕರಿಸಿದ ಈ ಊರ್ಮಿಳಾನ್ನೂ ಪೊಲೀಸರು ಬಂಧಿಸಿದ್ದಾರೆ. ಅದೆಷ್ಟು ದಿನದಿಂದ ಆ ಪುಟ್ಟ ಹುಡುಗಿ ಮೇಲೆ ಆತ ದೌರ್ಜನ್ಯ ಎಸಗುತ್ತಿದ್ದನೋ ಏನೋ, ಆಕೆ ಮನೆಗೆ ಹೋಗಿ ತನ್ನ ಖಾಸಗಿ ಅಂಗದಲ್ಲಿ ನೋವು ಎನ್ನುತ್ತಿದ್ದಳು. ಸೆಪ್ಟೆಂಬರ್ 8ರಂದು ಹನುಮಂತ್ ಬಾಲಕಿ ಮೇಲೆ ಅತ್ಯಾಚಾರ ಮಾಡಿ, ಅಂಗಿಯನ್ನೂ ಬದಲಿಸಿ ಕಳಿಸಿದ್ದ. ಆಗ ಪಾಲಕರು ಸರಿಯಾಗಿ ವಿಚಾರಿಸಿದಾಗ ವಿಷಯ ಬೆಳಕಿಗೆ ಬಂದಿದೆ. ಅವರು ಶಾಲಾ ಆಡಳಿತ ಮಂಡಳಿ ಮತ್ತು ಪೊಲೀಸರಿಗೆ ದೂರು ಕೊಟ್ಟಿದ್ದಾರೆ.
ಭೋಪಾಲ್ ಜಿಲ್ಲಾಧಿಕಾರಿ ಈ ಕೇಸ್ನ್ನು ಗಂಭೀರವಾಗಿ ಪರಿಗಣಿಸಿದ್ದಾರೆ. ನರ್ಸರಿಯ ಬಸ್ಗಳಲ್ಲಿ ಸಿಸಿಟಿವಿ ಕ್ಯಾಮೆರಾವನ್ನು ಕಡ್ಡಾಯವಾಗಿ ಅಳವಡಿಸಬೇಕು. ಮಹಿಳಾ ಸಿಬ್ಬಂದಿ ಇರಬೇಕು. ವಿದ್ಯಾರ್ಥಿಗಳ ಸುರಕ್ಷತೆಗೆ ಶಾಲಾ ಆಡಳಿತ ಮಂಡಳಿಯೇ ಹೊಣೆ. ನಿರ್ಲಕ್ಷ್ಯ ಮಾಡಿದರೆ ಕಠಿಣ ಕ್ರಮ ಕೈಗೊಳ್ಳುತ್ತೇವೆ ಎಂದಿದ್ದಾರೆ. ಇನ್ನು ಹನುಮಂತ್ ಮತ್ತು ಊರ್ಮಿಳಾ ವಿರುದ್ಧ ಪೋಕ್ಸೋ ಕಾಯ್ದೆಯಡಿ ಕೇಸ್ ದಾಖಲಾಗಿದೆ.
ಇದನ್ನೂ ಓದಿ:3 ವರ್ಷದ ಬಾಲೆಯ ಮೇಲೆ ಸ್ಕೂಲ್ ಬಸ್ನಲ್ಲಿ ಅತ್ಯಾಚಾರ; ಅಂಗಿ ಬದಲಿಸಿ ಕಳಿಸಿದ್ದ ಕ್ರೂರ ಚಾಲಕ