ದೆಹಲಿಯಲ್ಲಿ ಭೀಕರ ಅಪಘಾತದಲ್ಲಿ ಮೃತಪಟ್ಟ 20 ವರ್ಷದ ಯುವತಿ ಮೇಲೆ ಅತ್ಯಾಚಾರ ಆಗಿದ್ದಿರಬಹುದು ಎಂಬುದೊಂದು ಚರ್ಚೆ ಶುರುವಾಗಿದೆ. ಸುಲ್ತಾನ್ಪುರಿಯಲ್ಲಿ ಕಾರಿನ ಅಡಿಗೆ ಸಿಲುಕಿ 12 ಕಿಮೀ ದೂರ ಎಳೆಯಲ್ಪಟ್ಟ ಯುವತಿಯು ಸಂಪೂರ್ಣ ನಗ್ನಾವಸ್ಥೆಯಲ್ಲಿ ಕಂಝಾವಲ್ ಬಳಿ ರಸ್ತೆ ಮೇಲೆ ಬಿದ್ದಿದ್ದಳು. ಆಕೆ ಮೈಮೇಲೆ ಒಂದು ಚೂರು ಬಟ್ಟೆಯೂ ಇರಲಿಲ್ಲ. ಈಗ ಅದೇ ವಿಚಾರವೇ ಅನುಮಾನ ಮೂಡಿಸಿದೆ. ಆಮ್ ಆದ್ಮಿ ಪಕ್ಷದ ನಾಯಕ ಸೌರಭ್ ಭಾರದ್ವಾಜ್ ಅವರು ಯುವತಿ ಮೇಲೆ ರೇಪ್ ಆಗಿರಬಹುದು. ಈ ಆಯಾಮದಲ್ಲಿ ತನಿಖೆಯಾಗಬೇಕು ಎಂದಿದ್ದರು. ಈಗ ಯುವತಿಯ ತಾಯಿ ಕೂಡ ಇದೇ ಪ್ರಶ್ನೆ ಎತ್ತಿದ್ದಾರೆ.
‘ನನ್ನ ಮಗಳು ಹೊರಗೆ ಹೋಗಿದ್ದಳು. ನಾನು ಅವಳಿಗಾಗಿ ಕಾಯುತ್ತಿದ್ದೆ. ಆದರೆ ಹೀಗೆ ಶವವಾಗಿ ಬಂದಳು. ಆದರೆ ಅದು ಹೇಗೆ ಆಕೆಯ ಮೈಮೇಲೆ ಸ್ವಲ್ಪವೂ ಬಟ್ಟೆ ಉಳಿದಿಲ್ಲ? ಪೊಲೀಸರು ನನಗೆ ಅವಳ ದೇಹವನ್ನು ಸರಿಯಾಗಿ ತೋರಿಸಲೂ ಇಲ್ಲ. ನನ್ನ ಮಗಳ ಸಾವಿಗೆ ನ್ಯಾಯ ಬೇಕು’ ಎಂದು ತಾಯಿ ಆಗ್ರಹಿಸಿದ್ದಾರೆ.
‘ಈಕೆ ಅಪಘಾತದಲ್ಲಿ ಸಾವನ್ನಪ್ಪಿದ್ದಾಳೆ ಎಂದು ಮೊದಲು ಗೊತ್ತಾಗಿದ್ದು ನನ್ನ ಸೋದರನಿಗೆ. ಅವನೇ ನನಗೆ ಹೇಳಿದ. ನಮ್ಮ ಕುಟುಂಬದಲ್ಲಿ ಆಕೆಯೊಬ್ಬಳೇ ದುಡಿಯುವವಳು ಆಗಿದ್ದಳು. ಮನೆಯಿಂದ ಹೊರ ಹೋಗುವಾಗ ಮೈತುಂಬ ಬಟ್ಟೆ ತೊಟ್ಟಿದ್ದಳು. ಆದರೆ ಆಕೆ ಪತ್ತೆಯಾಗಿದ್ದಾಗ ಸ್ವಲ್ಪವೂ ಬಟ್ಟೆ ಇರಲಿಲ್ಲ ಎಂದು ಹೇಳಲಾಗುತ್ತಿದೆ. ಇದೆಂಥಾ ಸ್ವರೂಪದ ಅಪಘಾತ?’ ಎಂದೂ ಮಹಿಳೆ ಪ್ರಶ್ನಿಸಿದ್ದಾರೆ.
ಅಪಘಾತದಲ್ಲಿ ಮೃತಪಟ್ಟ ಯುವತಿಯ ಮೇಲೆ ಅತ್ಯಾಚಾರವಾಗಿದೆಯೇ? ಲೈಂಗಿಕ ದೌರ್ಜನ್ಯ ಎಸಗಲಾಗಿದೆಯೇ ಎಂಬುದನ್ನು ಪರಿಶೀಲಿಸಬೇಕು. ಹೀಗಾಗಿ ಅವಳ ಮರಣೋತ್ತರ ಪರೀಕ್ಷೆ ನಡೆಸಬೇಕು ಎಂದು ದೆಹಲಿಯಲ್ಲಿರುವ ರಾಷ್ಟ್ರೀಯ ಮಹಿಳಾ ಆಯೋಗ ಪೊಲೀಸ್ ಆಯುಕ್ತರನ್ನು ಆಗ್ರಹಿಸಿದೆ. ಇನ್ನೊಂದೆಡೆ ವಿಧಿವಿಜ್ಞಾನ ತಂಡದ ಸಿಬ್ಬಂದಿ ಅಪಘಾತ ನಡೆದ ಸ್ಥಳಕ್ಕೆ ಭೇಟಿಕೊಟ್ಟು ಪರಿಶೀಲನೆ ನಡೆಸಿದ್ದಾರೆ. ಅಪಘಾತ ಮಾಡಿದ ಕಾರಿನ ಅಡಿಯಲ್ಲಿ ರಕ್ತದ ಕಲೆ ಪತ್ತೆಯಾಗಿದೆ. ಯುವತಿ ಮೇಲೆ ಲೈಂಗಿಕ ದೌರ್ಜನ್ಯ ಆಗಿರುವ ಸಾಧ್ಯತೆ ಕಡಿಮೆ ಎಂದು ದೆಹಲಿ ಪೊಲೀಸರು ಹೇಳಿದ್ದು, ಮರಣೋತ್ತರ ಪರೀಕ್ಷೆ ಮಾಡುವುದಾಗಿಯೂ ತಿಳಿಸಿದ್ದಾರೆ.
ಇದನ್ನೂ ಓದಿ: Accident In Delhi | ಕಾರಿನಡಿ ಎಳೆಯಲ್ಪಟ್ಟ ಯುವತಿ ಮೇಲೆ ರೇಪ್ ಆಗಿರಬಹುದು ಎಂದ ಆಪ್; ಕಾರ್ಯಕರ್ತರಿಂದ ಪ್ರತಿಭಟನೆ