ಈ ಅಪ್ಪನಿಗೆ ಪತ್ನಿಯ ಮಾತು ಕೇಳಿ, ತಾನು ಹುಟ್ಟಿಸಿದ ಮಗನನ್ನೇ ಕೊಲ್ಲಲು ಅದು ಹೇಗಾದರೂ ಮನಸು ಬಂತೋ?-ಇಂಥದ್ದೊಂದು ದಾರುಣ ಘಟನೆ ಮಧ್ಯಪ್ರದೇಶದ ಇಂದೋರ್ (Indore News)ನಲ್ಲಿ ನಡೆದಿದೆ. ಏಳು ವರ್ಷದ ಬಾಲಕ ತನ್ನ ಅಪ್ಪನಿಂದಲೇ ಹತ್ಯೆಗೀಡಾಗಿದ್ದಾನೆ. 3ನೇ ತರಗತಿ ಬಾಲಕ ಪ್ರತೀಕ್ ಭಾನುವಾರ ರಾತ್ರಿ, ಎಂದಿನಂತೆ ತನ್ನ ಅಜ್ಜ-ಅಜ್ಜಿ ಬಳಿ ಮಲಗಿದ್ದ. ಅದೇ ವೇಳೆ ಅವನಪ್ಪ ಶಶಿಪಾಲ್ ಮುಂಡೆ ಅಲ್ಲಿಗೆ ಬಂದು, ಪ್ರತೀಕ್ನನ್ನು ಎಬ್ಬಿಸಿ ಕರೆದುಕೊಂಡು ಹೋಗಿದ್ದಾನೆ. ನಮ್ಮ ರೂಮಿನಲ್ಲಿ ಕೂಲರ್ ಇದೆ, ಅಲ್ಲಿಗೆ ಬಂದು ಮಲಗು ಎಂದು ಕರೆದುಕೊಂಡು ಹೋಗಿ, ಕೊಂದಿದ್ದಾನೆ.
ಶಶಿಪಾಲ್ ಸಿಂಗ್ (26) ಮತ್ತು ಪಾಯಲ್ (23)ಇಬ್ಬರೂ ಗಂಡ-ಹೆಂಡತಿ. ಆದರೆ ಇಲ್ಲಿ ಶಶಿಪಾಲ್ ಸಿಂಗ್ಗೆ ಪಾಯಲ್ ಮೂರನೇ ಪತ್ನಿ. ಇತ್ತೀಚೆಗೆ ಪಾಯಲ್ಗೆ ಗಂಡು ಮಗು ಹುಟ್ಟಿದ್ದರಿಂದ ಆಕೆ ತವರುಮನೆಗೆ ಹೋಗಿ, ಅಲ್ಲಿಯೇ ಇದ್ದಳು. ಆದರೆ ಅವಳು ವಾಪಸ್ ಬರಲು ಒಪ್ಪುತ್ತಿರಲಿಲ್ಲ. ಆಕೆಗಿದ್ದ ದೊಡ್ಡ ಸಮಸ್ಯೆ ಎಂದರೆ ಶಶಿಪಾಲ್ ಸಿಂಗ್ನ ಮೊದಲ ಪತ್ನಿಯ ಮಗ ಪ್ರತೀಕ್. ಅವನನ್ನು ಕಂಡರೆ ಪಾಯಲ್ಗೆ ಆಗುತ್ತಿರಲಿಲ್ಲ. ಮನೆಯಲ್ಲಿದ್ದಾಗಲೂ ಸದಾ ಬೈಯುತ್ತಲೇ ಇರುತ್ತಿದ್ದಳು. ಆ ಮಗನನ್ನು ಎಲ್ಲಿಗಾದರೂ ಕಳಿಸಿ, ಇಲ್ಲವೇ ಕೊಂದು ಬಿಡಿ. ಹಾಗಿದ್ದರೆ ಮಾತ್ರ ವಾಪಸ್ ಬರುತ್ತೇನೆ ಎಂದು ಹೇಳುತ್ತಿದ್ದಳು. ಪ್ರತೀಕ್ ನೆರಳು ಕಂಡರೆ ಸದಾ ದ್ವೇಷ ಕಾರುತ್ತಿದ್ದ ಪತ್ನಿ ಪಾಯಲ್ಳನ್ನು ಸಂತುಷ್ಟ ಪಡಿಸಿ, ಆಕೆಯನ್ನು ಹೇಗಾದರೂ ಮನೆಗೆ ಕರೆದುಕೊಂಡು ಬರಬೇಕು ಎಂಬ ಉದ್ದೇಶದಿಂದ ಶಶಿಪಾಲ್ ತನ್ನ ಮೊದಲ ಪತ್ನಿಯ ಮಗನನ್ನು ಹತ್ಯೆಗೈದಿದ್ದ. ಈ ಬಗ್ಗೆ ಪೊಲೀಸ್ ಅಧಿಕಾರಿ ಜೈವೀರ್ ಸಿಂಗ್ ಭಡೋರಿಯಾ ತಿಳಿಸಿದ್ದಾರೆ.
ಇದನ್ನೂ ಓದಿ: Murder Case: ಒಂಟಿ ಮಹಿಳೆಯರೇ ಟಾರ್ಗೆಟ್‌; ಹಣಕ್ಕಾಗಿ ಹತ್ಯೆ ಮಾಡಿದ ಹಂತಕ ಅರೆಸ್ಟ್‌
ಹಾಗೇ, ಭಾನುವಾರ ಅಜ್ಜ-ಅಜ್ಜಿ ಬಳಿ ಮಲಗಿದ್ದ ಪ್ರತೀಕ್ನ ಬಳಿ ಬಂದ ಶಶಿಪಾಲ್ ಅವನನ್ನು ತನ್ನ ರೂಮಿಗೆ ಬರುವಂತೆ ಕರೆದಿದ್ದಾನೆ. ಅಪ್ಪ ಕೂಲರ್ ಬಗ್ಗೆ ಹೇಳುತ್ತಿದ್ದಂತೆ ಫುಲ್ ಖುಷಿಯಾದ ಆ ಹುಡುಗ ಅಲ್ಲಿಗೆ ತೆರಳಿದ್ದಾನೆ. ಜತೆಗಿದ್ದ ಅಪ್ಪನ ಪಕ್ಕದಲ್ಲಿ ನೆಮ್ಮದಿಯಿಂದ ಮಲಗಿ, ನಿದ್ರಿಸಿದ್ದಾನೆ. ಇತ್ತ ಈ ಹುಡುಗ ನಿದ್ದೆ ಮಾಡುತ್ತಿದ್ದಂತೆ ಅಪ್ಪ ಕಾರ್ಯಪ್ರವೃತ್ತನಾಗಿದ್ದಾನೆ. ಟಿವಿ ಆಫ್ ಮಾಡಿ, ಮಗನ ಕತ್ತು ಕೊಯ್ದಿದ್ದಾನೆ. ಅಷ್ಟಲ್ಲದೆ ತನ್ನ ಕೃತ್ಯದ ಬಳಿಕ ಪತ್ನಿಗೆ ವಿಡಿಯೊ ಕಾಲ್ ಮಾಡಿದ್ದಾನೆ. ಆದರೆ ಅದು ಕನೆಕ್ಟ್ ಆಗಿರಲಿಲ್ಲ. ಬಳಿಕ ಮಗನ ಶವವನ್ನು ವಿಡಿಯೊ ಮಾಡಿ, ಪತ್ನಿ ಪಾಯಲ್ಗೆ ಕಳಿಸಿದ್ದಾನೆ. ಆದರೆ ಕೋಪಗೊಂಡ ಪಾಯಲ್ ಗಂಡನ ನಂಬರ್ ಬ್ಲಾಕ್ ಮಾಡಿಟ್ಟುಕೊಂಡಿದ್ದಳು. ಹೀಗಾಗಿ ಅವಳಿಗೆ ವಿಡಿಯೊ ರೀಚ್ ಆಗಲಿಲ್ಲ. ಅಷ್ಟಾದ ಬಳಿಕ ಶಶಿಪಾಲ್ ಓಡಿಹೋಗಿದ್ದ.
ಅಜ್ಜ-ಅಜ್ಜಿ ಕೊಟ್ಟ ದೂರಿನ ಅನ್ವಯ ಶಶಿಪಾಲ್ ಮತ್ತು ಆತನ ಪತ್ನಿ ಪಾಯಲ್ಳನ್ನು ಮಂಗಳವಾರ ಪೊಲೀಸರು ಬಂಧಿಸಿದ್ದಾರೆ. ನಾನೇನೂ ಮಾಡಲಿಲ್ಲ ಎಂದು ಮೊದಲು ಪಾಯಲ್ ಹೇಳಿದ್ದಾಳೆ. ಆದರೆ ನಂತರ ಒಪ್ಪಿಕೊಂಡಿದ್ದಾಳೆ. ಸದ್ಯ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.