ಜೈಪುರ: ದೆಹಲಿ ಶ್ರದ್ಧಾ ವಾಳ್ಕರ್ ಹತ್ಯೆ ಮಾದರಿಯಲ್ಲೇ ರಾಜಸ್ಥಾನದ ಜೈಪುರದಲ್ಲಿ ಒಂದು ಕೊಲೆಯಾಗಿದೆ. ಇಲ್ಲೊಬ್ಬ 32ವರ್ಷದ ಯುವಕ ತನ್ನ 64 ವರ್ಷದ ಅತ್ತೆಯನ್ನು ಹತ್ಯೆ ಮಾಡಿ, ಮೃತದೇಹವನ್ನು 10 ತುಂಡುಗಳನ್ನಾಗಿ ಕತ್ತರಿಸಿ, ಬಕೆಟ್ನಲ್ಲಿ ತೆಗೆದುಕೊಂಡು ಹೋಗಿ ಹೆದ್ದಾರಿ ಪಕ್ಕದಲ್ಲಿ ಎಸೆದಿದ್ದಾನೆ. ಆರೋಪಿ ಹೆಸರು ಅನುಜ್ ಶರ್ಮಾ ಎಂದಾಗಿದ್ದು, ಮೃತ ಅತ್ತೆ ಹೆಸರು ಸರೋಜಾ. ಪೊಲೀಸರು ಆರೋಪಿಯನ್ನು ಅರೆಸ್ಟ್ ಮಾಡಿ, ತನಿಖೆ ಪ್ರಾರಂಭಿಸಿದ್ದಾರೆ.
ಜೈಪುರದ ವಿದ್ಯಾನಗರ ಎಂಬಲ್ಲಿ ಅನುಜ್ ತನ್ನ ತಂದೆ ಮತ್ತು ತಂಗಿ ಮತ್ತು ಅತ್ತೆಯೊಂದಿಗೆ ವಾಸವಾಗಿದ್ದ. ಈ ಸರೋಜಾ ತನ್ನ ಪತಿ ತೀರಿಕೊಂಡ ಮೇಲೆ ತವರುಮನೆಗೆ ಬಂದು ಇವರೊಂದಿಗೇ ಇದ್ದರು. ಇನ್ನು ಅನುಜ್ ಅಮ್ಮ ಕೂಡ ಕಳೆದ ವರ್ಷ ಕೊವಿಡ್ 19ನಿಂದ ಮೃತಪಟ್ಟಿದ್ದಾರೆ. ಡಿಸೆಂಬರ್ 11ರಂದು ಅನುಜ್ ಅಪ್ಪ ಮತ್ತು ತಂಗಿ ಮಧ್ಯಪ್ರದೇಶದ ಇಂಧೋರ್ಗೆ ಹೋಗಿದ್ದರು. ಈತನಿಗೆ ಯಾವುದೋ ಕಾರ್ಯಕ್ರಮಕ್ಕೆ ದೆಹಲಿಗೆ ಹೋಗಬೇಕಿತ್ತು. ಆದರೆ ಸರೋಜಾ ಆತನನ್ನು ತಡೆದರು. ‘ಅಪ್ಪನೂ ಇಲ್ಲ, ನೀನು ದೆಹಲಿಗೆ ಹೋಗಬೇಡ’ ಎಂದು ಹೇಳಿದರು. ಇದರಿಂದ ಕುಪಿತಗೊಂಡ ಅನುಜ್ ಅತ್ತೆಯೊಂದಿಗೆ ವಾಗ್ವಾದಕ್ಕೆ ಇಳಿದ. ಇಬ್ಬರ ಮಧ್ಯೆ ಮಾತಿನ ಚಕಮಕಿ ಉಂಟಾಗಿದೆ. ಆಕೆ ಅನುಜ್ಗೆ ಬೈಯುತ್ತಲೇ ಹೋಗಿ ಚಹಾ ಮಾಡುತ್ತಿದ್ದರು. ತೀವ್ರ ಸಿಟ್ಟಿಗೆದ್ದ ಅನುಜ್ ಹಿಂಬದಿಯಿಂದ ಹೋಗಿ ಸುತ್ತಿಗೆಯಿಂದ ಸರೋಜಾ ತಲೆಗೆ ಹೊಡೆದಿದ್ದಾನೆ. ಆಕೆ ಸತ್ತಿದ್ದು ದೃಢಪಡುತ್ತಿದ್ದಂತೆ ಮೃತದೇಹವನ್ನು 10 ತುಂಡುಗಳನ್ನಾಗಿ ಕತ್ತರಿಸಿದ್ದಾನೆ. ಹೀಗೆ ಶವ ಕತ್ತರಿಸಲು ಅವನು ಮಾರ್ಬಲ್ ಕತ್ತರಿಸುವ ಕಟ್ಟರ್ನ್ನು ಬಳಸಿದ್ದಾನೆ. ಬಳಿಕ ಒಂದು ಬಕೆಟ್ ಮತ್ತು ಸೂಟ್ಕೇಸ್ನಲ್ಲಿ ತುಂಬಿಕೊಂಡು, ಜೈಪುರ್-ಸಿಕಾರ್ ಹೆದ್ದಾರಿ ಗುಂಟ ಸಾಗಿ, ದುರ್ಗಮ ಪ್ರದೇಶವೊಂದರಲ್ಲಿ ಅದನ್ನೆಲ್ಲ ಎಸೆದಿದ್ದಾನೆ ಎಂದು ಪೊಲೀಸರು ವಿವರಿಸಿದ್ದಾರೆ.
ಇಷ್ಟೆಲ್ಲ ಆದ ಮೇಲೆ ಅನುಜ್ ಪೊಲೀಸ್ ಠಾಣೆಗೆ ಹೋಗಿ, ತನ್ನ ಅತ್ತೆ ಕಾಣೆಯಾಗಿದ್ದಾರೆ ಎಂದು ದೂರು ನೀಡಿದ್ದಾನೆ. ಅಷ್ಟಲ್ಲದೆ, ತನ್ನ ಇತರ ಸಂಬಂಧಿಕರ ಜತೆ ಸೇರಿಕೊಂಡು ಅತ್ತೆಯನ್ನು ಹುಡುಕುವ ನಾಟಕವನ್ನೂ ಆಡಿದ್ದಾನೆ. ತನಿಖೆ ನಡೆಸುತ್ತಿದ್ದ ಪೊಲೀಸರಿಗೆ ಎಲ್ಲೋ ಏನೋ ತಾಳೆಯಾಗುತ್ತಿಲ್ಲ, ಅನುಜ್ ಹೇಳಿಕೆಗಳೆಲ್ಲ ಗೊಂದಲಕಾರಿಯಾಗಿವೆ ಎಂದು ಗೊತ್ತಾಗುತ್ತಿದ್ದಂತೆ ಮತ್ತಷ್ಟು ಗದರಿ ವಿಚಾರಣೆ ನಡೆಸಿದ್ದಾರೆ. ಅಷ್ಟೇ ಅಲ್ಲ, ಅನುಜ್ ಮನೆ ಬಳಿಯ ಸಿಸಿಟಿವಿ ಫೂಟೇಜ್ ಕೂಡ ಪರಿಶೀಲಿಸಿದ್ದಾರೆ. ಆಗ ಆತ ಒಂದು ಸೂಟ್ಕೇಸ್ ಮತ್ತು ಬಕೆಟ್ ಹಿಡಿದು ಹೋಗುತ್ತಿರುವುದು ಕಾಣಿಸಿದೆ. ಪೊಲೀಸರು ತೀವ್ರ ವಿಚಾರಣೆ ನಡೆಸಿದಾಗ ಆತ ಒಪ್ಪಿಕೊಂಡಿದ್ದಾನೆ. ಇನ್ನು ಅನುಜ್ ಬಿಟೆಕ್ ಪದವೀಧರ ಆಗಿದ್ದು, ತುಂಬ ಬುದ್ಧಿವಂತ ಹುಡುಗ. ನಮ್ಮನ್ನೇ ಗೊಂದಲಕ್ಕೀಡುಮಾಡುವಂತೆ ಪ್ರಶ್ನೆಗಳಿಗೆ ಉತ್ತರಿಸುತ್ತಿದ್ದ. ಅವರ ಅಡುಗೆ ಮನೆಯಲ್ಲೂ ಯಾವಾಗ ರಕ್ತ ಕಾಣಿಸಿತೋ, ಆಗಲೇ ಆತನೇ ಕೊಲೆಗಾರ ಎಂಬುದು ದೃಢಪಟ್ಟಿತ್ತು ಎಂದು ಜೈಪುರ ಪೊಲೀಸ್ ಆಯುಕ್ತ ಆನಂದ್ ಶ್ರೀವಾಸ್ತವ್ ಹೇಳಿದ್ದಾರೆ.
ದೆಹಲಿಯಲ್ಲಿ ಶ್ರದ್ಧಾ ವಾಳ್ಕರ್ ತನ್ನ ಪ್ರಿಯತಮ ಅಫ್ತಾಬ್ನಿಂದ ಹತ್ಯೆಯಾಗಿದ್ದು ದೇಶಾದ್ಯಂತ ಶಾಕ್ ಉಂಟು ಮಾಡಿತ್ತು. ಯಾಕೆಂದರೆ ಆತ ಶ್ರದ್ಧಾಳ ದೇಹವನ್ನು 35 ತುಂಡುಗಳನ್ನಾಗಿ ಕತ್ತರಿಸಿ, ಫ್ರಿಜ್ನಲ್ಲಿಟ್ಟುಕೊಂಡು ಒಂದೊಂದೇ ದಿನ ಹೋಗಿ ಎಸೆದುಬಂದಿದ್ದ. ಆದರೆ ಅದಾದ ಮೇಲೆ ಇಂಥ ಮಾದರಿಯ ಕೊಲೆಗಳು ಪದೇಪದೆ ಬೆಳಕಿಗೆ ಬರುತ್ತಿವೆ. ಇದೊಂದು ಆತಂಕಕಾರಿ ಬೆಳವಣಿಗೆ ಎನ್ನಿಸಿದೆ.
ಇದನ್ನೂ ಓದಿ: Mudhol murder | ಅಪ್ಪನನ್ನು ಕೊಂದು 4 ದಿನದ ಬಳಿಕ ತಾಯಿ-ಅಣ್ಣನ ಬಳಿ ಬಾಯಿ ಬಿಟ್ಟಿದ್ದ ವಿಠಲ ಕುಳಲಿ!