ಮುಂಬೈ: ಬಾಲಿವುಡ್‌ ನಟ ಸಲ್ಮಾನ್‌ ಖಾನ್‌ (Salman Khan) ಅವರ ಸಹೋದರಿ ಅರ್ಪಿತಾ ಖಾನ್‌ ಅವರ ಡೈಮಂಡ್‌ ಕಿವಿಯೋಲೆಗಳನ್ನು (Earrings) ಕಳ್ಳತನ ಮಾಡಲಾಗಿದೆ. ಮುಂಬೈನಲ್ಲಿರುವ ಅಪಾರ್ಟ್‌ಮೆಂಟ್‌ನಲ್ಲಿ ಕಳ್ಳತನ ಮಾಡಲಾಗಿದ್ದು, ಅರ್ಪಿತಾ ಖಾನ್‌ ಅವರು ಕೂಡಲೇ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದಾರೆ. ಪೊಲೀಸರು ಮನೆಯ ಕೆಲಸದವರೊಬ್ಬರನ್ನು (House Help) ಬಂಧಿಸಿದ್ದಾರೆ. ಬಂಧಿತನನ್ನು ಸಂದೀಪ್‌ ಹೆಗ್ಡೆ ಎಂದು ಗುರುತಿಸಲಾಗಿದೆ.
ಅರ್ಪಿತಾ ಖಾನ್‌ ಮನೆಯಲ್ಲಿ 10 ಸಿಬ್ಬಂದಿಯು ಕೆಲಸ ಮಾಡುತ್ತಿದ್ದಾರೆ. ಇವರಲ್ಲಿ ಅಂಬೇವಾಡಿ ಸ್ಲಮ್‌ ನಿವಾಸಿಯಾದ ಸಂದೀಪ್‌ ಹೆಗ್ಡೆಯು ನಾಲ್ಕು ತಿಂಗಳ ಹಿಂದೆ ಅರ್ಪಿತಾ ನಿವಾಸದಲ್ಲಿ ಕೆಲಸಕ್ಕೆ ಸೇರಿದ್ದ. ಈತ ಅರ್ಪಿತಾ ಖಾನ್‌ ಮನೆಯಲ್ಲಿಯೇ ಇರುತ್ತಿದ್ದ. ಆದರೆ, ಏಕಾಏಕಿ, ಅರ್ಪಿತಾ ಅವರ ಕಿವಿಯೋಲೆಗಳನ್ನು ಕದ್ದ ಈತ ಪರಾರಿಯಾಗಿದ್ದ. ಕೊನೆಗೆ ಪೊಲೀಸರು ಈತನನ್ನು ಬಂಧಿಸಿದ್ದು, ಕಿವಿಯೋಲೆಗಳು ಈತನ ಮನೆಯಲ್ಲಿಯೇ ಸಿಕ್ಕಿವೆ ಎಂದು ತಿಳಿದುಬಂದಿದೆ.
ಕಿವಿಯೋಲೆಗಳ ಬೆಲೆ ಎಷ್ಟು?
ಅರ್ಪಿತಾ ಖಾನ್‌ ಅವರ ಡೈಮಂಡ್‌ ಕಿವಿಯೋಲೆಗಳ ಬೆಲೆ ಸುಮಾರು 5 ಲಕ್ಷ ರೂ. ಎಂದು ತಿಳಿದುಬಂದಿದೆ. ಅರ್ಪಿತಾ ಅವರು ಕಿವಿಯೋಲೆಗಳನ್ನು ಮೇಕಪ್‌ ಟ್ರೇನಲ್ಲಿ ಇಟ್ಟಿದ್ದರು. ಅವು ಇತ್ತೀಚೆಗೆ ದಿಢೀರನೆ ಮಾಯವಾಗಿದ್ದವು. ಹಾಗಾಗಿ, ಪ್ರಕರಣ ದಾಖಲಿಸಿದ್ದರು. ಖಾರ್‌ ಪ್ರದೇಶದಲ್ಲಿ ಅರ್ಪಿತಾ ಖಾನ್‌ ಅವರ ಮನೆ ಇದೆ. ದೂರು ದಾಖಲಿಸಿದ ಬಳಿಕ ಖಾರ್‌ ಠಾಣೆಯ ಹಿರಿಯ ಪೊಲೀಸ್‌ ಇನ್ಸ್‌ಪೆಕ್ಟರ್‌ ಮೋಹನ್‌ ಮಾನೆ ಅವರು ಪ್ರಕರಣ ಭೇದಿಸಲು ತಂಡ ರಚಿಸಿದ್ದರು.
ಅರ್ಪಿತಾ ಖಾನ್‌ ಅವರು ನಟ ಆಯುಷ್‌ ಶರ್ಮಾ ಅವರನ್ನು 2014ರಲ್ಲಿ ಮದುವೆಯಾಗಿದ್ದು, ದಂಪತಿಗೆ ಆಹಿಲ್‌ ಹಾಗೂ ಆಯತ್‌ ಎಂಬ ಇಬ್ಬರು ಮಕ್ಕಳಿದ್ದಾರೆ. ಇತ್ತೀಚೆಗೆ ಮುಂಬೈನಲ್ಲಿ ಅರ್ಪಿತಾ ಹಾಗೂ ಆಯುಷ್‌ ಅವರು ಈದ್ ಪಾರ್ಟಿ ಆಯೋಜಿಸಿದ್ದರು. ಪಾರ್ಟಿಯಲ್ಲಿ ಸಲ್ಮಾನ್‌ ಖಾನ್‌, ಕತ್ರಿನಾ ಕೈಫ್‌, ವಿಕ್ಕಿ ಕೌಶಲ್‌ ಸೇರಿ ಬಾಲಿವುಡ್‌ನ ಹಲವು ಸೆಲೆಬ್ರಿಟಿಗಳು ಭಾಗವಹಿಸಿದ್ದರು.
ಇದನ್ನೂ ಓದಿ: Salman Khan: ಈದ್ ಸಂಭ್ರಮದಲ್ಲಿ ಸಲ್ಮಾನ್‌ ಖಾನ್‌ ಕುಟುಂಬ!