ಪ್ರಯಾಗ್ರಾಜ್ 15 ದಿನಗಳ ಹಿಂದೆ ಕಾಣೆಯಾಗಿದ್ದ 35ವರ್ಷದ ಮಹಿಳೆ ಇದೀಗ ಆಕೆಯ ಪ್ರಿಯಕರನ ಮನೆಯಲ್ಲಿ ಶವವಾಗಿ ಪತ್ತೆಯಾಗಿದ್ದಾಳೆ (woman’s Body Found). ನಿರ್ಮಾಣ ಹಂತದಲ್ಲಿರುವ ಮನೆಯ ನೀರಿನ ಟ್ಯಾಂಕ್ನಿಂದ ಅವಳ ದೇಹವನ್ನು ಹೊರತೆಗೆಯಲಾಗಿದ್ದು, ಆರೋಪಿಯನ್ನು ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ನಡೆಸುತ್ತಿದ್ದಾರೆ. ಉತ್ತರ ಪ್ರದೇಶದ ಪ್ರಯಾಗ್ರಾಜ್ನಲ್ಲಿ ಈ ಘಟನೆ ನಡೆದಿದ್ದು, ಮೃತ ಮಹಿಳೆ ಹೆಸರು ರಾಜ್ ಕೇಸರ್. ಆರೋಪಿ ಅರವಿಂದ್.
ಯಮುನಾಪರ್ ಕರ್ಚನಾ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲಿರುವ ಮಹೇವಾ ಎಂಬಲ್ಲಿ ಅರವಿಂದ್ ವಾಸವಾಗಿದ್ದ. ಆತನ ಮನೆ ನಿರ್ಮಾಣ ಹಂತದಲ್ಲಿ ಇದೆ. ಕಾಮಗಾರಿ ನಡೆಯುತ್ತಿತ್ತು. ಈಗ ಅದೇ ಮನೆಯ ನೀರಿನ ಟ್ಯಾಂಕ್ನಲ್ಲಿ ಮಹಿಳೆ ಶವ ಸಿಕ್ಕಿದ್ದಾಗಿ ಪೊಲೀಸ್ ಅಧಿಕಾರಿ ವಿಶ್ವಜಿತ್ ಸಿಂಗ್ ತಿಳಿಸಿದ್ದಾರೆ. ರಾಜ್ ಕೇಸರ್ ಮತ್ತು ಅರವಿಂದ್ ಪರಸ್ಪರ ಪ್ರೀತಿಸುತ್ತಿದ್ದರು ಎಂಬುದು ಈಗ ಬೆಳಕಿಗೆ ಬಂದಿದೆ. 15 ದಿನಗಳ ಹಿಂದೆ ರಾಜ್ ಕೇಸರ್ ನಾಪತ್ತೆಯಾಗಿದ್ದಳು. ಈ ಬಗ್ಗೆ ಆಕೆಯ ಕುಟುಂಬದವರು ಪೊಲೀಸರಿಗೆ ದೂರು ಕೊಟ್ಟಿದ್ದರು. ತನಿಖೆ ನಡೆಸಿದ ಪೊಲೀಸರು ಈಗ ಅವಳ ಮೃತದೇಹವನ್ನು ಪತ್ತೆಹಚ್ಚಿದ್ದಾರೆ.
ಇದನ್ನೂ ಓದಿ: Molestation Case: ಮೊಬೈಲ್‌ ಕೊಡುವೆ ಬಾ ಎಂದ ಪ್ರಿಯಕರ; ಗೆಳೆಯನೊಂದಿಗೆ ಸೇರಿ ಅತ್ಯಾಚಾರ
‘ರಾಜ್ ಕೇಸರ್ ಮನೆಯವರು ಮೇ 30ರಂದು ಕೊಟ್ಟ ದೂರಿನ ಅನ್ವಯ ತನಿಖೆ ಪ್ರಾರಂಭ ಮಾಡಿದೆವು. ರಾಜ್ ಕೇಸರ್ ಫೋನ್ ಕಾಲ್ ಡಿಟೇಲ್ಸ್ ಪರಿಶೀಲನೆ ನಡೆಸಿದಾಗ ಅರವಿಂದ್ ನಂಬರ್ಗೆ ಹೆಚ್ಚಿನ ಕರೆ ಹೋಗಿದ್ದು ಗೊತ್ತಾಯಿತು. ಆತನನ್ನು ಹಿಡಿದು ವಿಚಾರಣೆ ನಡೆಸಿದಾಗ ಸತ್ಯ ಬಾಯ್ಬಿಟ್ಟಿದ್ದಾನೆ. ರಾಜ್ ಕೇಸರ್ಳ ಜತೆ ತನಗೆ ಸಂಬಂಧವಿತ್ತು, ಆಕೆ 15ದಿನಗಳ ಹಿಂದೆ ನನ್ನನ್ನು ಹುಡುಕಿಕೊಂಡು ಬಂದಿದ್ದಳು. ಆಕೆಯನ್ನು ನಾನೇ ಕೊಂದಿದ್ದೇನೆ ಎಂದು ಅವನು ಒಪ್ಪಿಕೊಂಡಿದ್ದಾನೆ. ಹಾಗೇ, ಶವ ಬಚ್ಚಿಟ್ಟ ಸ್ಥಳವನ್ನೂ ತೋರಿಸಿದ್ದಾನೆ‘ ಎಂದು ಪೊಲೀಸ್ ಅಧಿಕಾರಿ ಮಾಹಿತಿ ನೀಡಿದ್ದಾರೆ. ಅಂದಹಾಗೇ, ಈತ ಕೊಲೆ ಮಾಡಲು ಕಾರಣವೇನು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.