ಬಲವಂತವಾಗಿ ಚುಂಬಿಸಲು ಬಂದವನ ತುಟಿಗಳನ್ನು ಕಚ್ಚಿ ತುಂಡರಿಸಿದ ಮಹಿಳೆ; ರೇಪ್​ ಮಾಡಲು ಯತ್ನಿಸಿದವನಿಗೆ ತಕ್ಕ ಶಾಸ್ತಿ

ಉತ್ತರ ಪ್ರದೇಶದಲ್ಲಿ ಮಹಿಳೆಯೊಬ್ಬರು ತನ್ನನ್ನು ಅತ್ಯಾಚಾರ ಮಾಡಲು ಬಂದವನಿಗೆ ತಕ್ಕ ಶಾಸ್ತಿ ಮಾಡಿ ಕಳಿಸಿದ್ದಾರೆ. ಆ ಯುವಕ ಮಹಿಳೆಯನ್ನು ಬಲವಂತವಾಗಿ ಬಿಗಿದಪ್ಪಿ, ತುಟಿಗೆ ಚುಂಬಿಸಲು ಪ್ರಯತ್ನ ಮಾಡುತ್ತಿದ್ದ. ಆಗ ಮಹಿಳೆ ಆತನ ಎರಡೂ ತುಟಿಗಳನ್ನು ಕಚ್ಚಿ ಹರಿದಿದ್ದಾರೆ. ಆಗ ಆತನ ತುಟಿಗಳಿಂದ ರಕ್ತ ಹರಿಯಲು ಪ್ರಾರಂಭಿಸಿದೆ. ಯಾವಾಗ ಅವನು ನೋವಿನಿಂದ ನೆಲಕ್ಕೆ ಬಿದ್ದು ಒದ್ದಾಡಲು ಪ್ರಾರಂಭ ಮಾಡಿದನೋ, ಆಗ ಮಹಿಳೆ ದೊಡ್ಡದಾಗಿ ಕೂಗಿ ಸುತ್ತಲೂ ಇದ್ದವರನ್ನು ಕರೆದಿದ್ದಾರೆ. ಆತ ತನ್ನ ಮೇಲೆ ರೇಪ್​ ಮಾಡಲು ಪ್ರಯತ್ನಿಸಿದ ಎಂದು ವಿಷಯ ತಿಳಿಸಿದ್ದಾರೆ. ಬಳಿಕ ಅಲ್ಲಿದ್ದವರೆಲ್ಲ ಸೇರಿ ಯುವಕ ಮೋಹಿತ್ ಸೈನಿಯನ್ನು ಹಿಡಿದು, ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಅಂದಹಾಗೇ, ಈ ಘಟನೆ ನಡೆದಿದ್ದು ಉತ್ತರ ಪ್ರದೇಶದ ಮೀರತ್​​ನ ದರೌಲಾ ಪೊಲೀಸ್ ಠಾಣೆ ವ್ಯಾಪ್ತಿಯ ಹಳ್ಳಿಯೊಂದರಲ್ಲಿ. ಮಹಿಳೆ ಹೊಲಕ್ಕೆ ಹೋಗುತ್ತಿದ್ದಾಗ ಆತ ಅಡ್ಡಗಟ್ಟಿ, ದೌರ್ಜನ್ಯವೆಸಗಲು ಬಂದಿದ್ದ. ಆದರೆ ಮಹಿಳೆ ಆತನಿಗೆ ಮರೆಯಲಾಗದ ಶಿಕ್ಷೆ ಕೊಟ್ಟಿದ್ದಾರೆ. ಆತನ ತುಟಿಯನ್ನು ಹರಿದು ಚೂರಾಗಿಸಿದ್ದು, ಆ ತುಟಿಯ ಚೂರನ್ನೂ ಕೂಡ ಪೊಲೀಸರು ಒಂದು ಪ್ಯಾಕೆಟ್​​ನಲ್ಲಿಟ್ಟು ಸೀಲ್​ ಮಾಡಿದ್ದಾರೆ.

ಇದನ್ನೂ ಓದಿ: Pocso case: ಮೊಮ್ಮಗಳ ಮೇಲೆ ಅತ್ಯಾಚಾರ ಎಸಗಿದ ತಾತನಿಗೆ 20 ವರ್ಷ ಜೈಲು

ಈ ಬಗ್ಗೆ ಪೊಲೀಸರಿಗೆ ದೂರು ಕೊಟ್ಟ ಮಹಿಳೆ ‘ನಾನು ಮಧ್ಯಾಹ್ನದ ಹೊತ್ತು ಕೆಲಸಕ್ಕೆಂದು ಹೊಲಕ್ಕೆ ಹೋಗುತ್ತಿದ್ದೆ. ಆಗ ಮೋಹಿತ್​ ಹಿಂದಿನಿಂದ ಬಂದು ಅಪ್ಪಿ ಹಿಡಿದ. ಅದು ನಿರ್ಜನ ಪ್ರದೇಶವಾಗಿತ್ತು. ನಾನು ಕೂಗಿದರೂ ಕೇಳುವಂತೆ ಇರಲಿಲ್ಲ. ಆತ ನನ್ನ ಬಟ್ಟೆ ಹರಿಯಲು ಪ್ರಾರಂಭಿಸಿ, ಅಪ್ಪಿಕೊಂಡು ಚುಂಬಿಸಲು ಪ್ರಯತ್ನ ಪಟ್ಟ. ನನ್ನನ್ನು ನಾನು ರಕ್ಷಿಸಿಕೊಳ್ಳುವ ಸಲುವಾಗಿ ಆತನ ತುಟಿಗಳನ್ನೇ ಕಚ್ಚಿ ಹರಿದೆ’ ಎಂದು ಹೇಳಿದ್ದಾರೆ. ಪೊಲೀಸರು ಮೋಹಿತ್​ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರಿಸಿದ್ದಾರೆ. ಸದ್ಯ ಅವನಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಲಾಗುತ್ತಿದೆ. ಮಹಿಳೆಯ ಸಾಹಸವನ್ನು ಸ್ಥಳೀಯರು ಮೆಚ್ಚಿಕೊಂಡಿದ್ದಾರೆ.