ಎಸ್‌ಎಸ್‌ಎಲ್‌ಸಿ ಫಲಿತಾಂಶ (SSLC Result 2023) ಪ್ರಕಟಗೊಂಡ ನಂತರ ಬಹುತೇಕ ಪೋಷಕರನ್ನು, ವಿದ್ಯಾರ್ಥಿಗಳನ್ನು ಕಾಡುವ ಬಹುದೊಡ್ಡ ಪ್ರಶ್ನೆ ಎಂದರೆ ʼಮುಂದೇನು?ʼ ಎಂಬುದು. ವಿದ್ಯಾರ್ಥಿಗಳು ʼಮುಂದೆ ನಾನು ಇದನ್ನು ಓದುತ್ತೇನೆ… ಅದನ್ನು ಮಾಡುತ್ತೇನೆʼ ಎಂದು ಮನಸ್ಸಿನಲ್ಲಿಯೇ ಲೆಕ್ಕಾಚಾರ ಹಾಕಿರುತ್ತಾರೆ. ಪೋಷಕರು ಕೂಡ ತಮ್ಮ ಮಕ್ಕಳ ಓದಿನ ಬಗ್ಗೆ ಸಾಕಷ್ಟು ಕನಸು ಹೊತ್ತಿರುತ್ತಾರೆ. ಆದರೆ ಫಲಿತಾಂಶ ಬಂದಾಗ ವಿದ್ಯಾರ್ಥಿಗಳು ಪಡೆದ ಅಂಕಗಳು (ನಿರೀಕ್ಷಗಿಂತ ಹೆಚ್ಚಿರಲಿ, ಕಡಿಮೆ ಇರಲಿ) ಅವರನ್ನು ಇನ್ನೊಮ್ಮೆ ಈ ಬಗ್ಗೆ ಯೋಚಿಸುವಂತೆ ಮಾಡುವುದಂತೂ ಖಚಿತ.
ಇಷ್ಟು ಅಂಕ ಬಂದಿರುವುದರಿಂದ ಈಗ ಏನು ಓದಿದರೆ ಒಳ್ಳೆಯದು ಯಾವ ವಿಷಯ ತೆಗೆದುಕೊಂಡರೆ ಮುಂದೆ ಹೆಚ್ಚು ಅಂಕ ಪಡೆಯಬಹುದು? ಯಾವ ಶಿಕ್ಷಣಕ್ಕೆ ಸ್ಕೋಪ್ ಇದೆ? ಏನು ಓದಿದರೆ ಭವಿಷ್ಯ ಚೆನ್ನಾಗಿರುತ್ತದೆ? ಹೀಗೆ ಪ್ರಶ್ನೆಗಳ ಸರಮಾಲೆಯೆ ವಿದ್ಯಾರ್ಥಿಗಳ ಮತ್ತು ಪೋಷಕರ ಮುಂದೆ ಇರುತ್ತದೆ. ಈ ಎಲ್ಲಾ ಪ್ರಶ್ನೆಗಳಿಗೆ ” ರೆಡಿಮೇಡ್” ಉತ್ತರ ಖಂಡಿತಾ ಇಲ್ಲ.
ಒಬ್ಬೊಬ್ಬ ವಿದ್ಯಾರ್ಥಿಯದು ಒಂದೊಂದು ರೀತಿಯ ಪರಿಸ್ಥಿತಿ. ಸೌಕರ್ಯಗಳ ಕೊರತೆಯಿಂದಾಗಿ ಕೆಲವರಿಗೆ ಸೀಮಿತ ಅವಕಾಶಗಳು ಕೂಡ ಇರುತ್ತವೆ. ಹೀಗಾಗಿ ಇರುವುದರಲ್ಲಿಯೇ ಅತ್ಯುತ್ತಮವಾದ ತೀರ್ಮಾನವನ್ನು ವಿದ್ಯಾರ್ಥಿಯು ತೆಗೆದುಕೊಳ್ಳಬೇಕಾಗುತ್ತದೆ.
ಇದನ್ನೂ ಓದಿ :SSLC Result 2023 : ಎಸ್‌ಎಸ್‌ಎಲ್‌ಸಿ ಫಲಿತಾಂಶ ಪ್ರಕಟ; ನಾಲ್ವರು ವಿದ್ಯಾರ್ಥಿಗಳು ಔಟ್‌ ಆಫ್‌ ಔಟ್‌
ಆದರೆ ಮುಂದೇನು ಎಂಬುದನ್ನು ತೀರ್ಮಾನಿಸುವಾಗ ಎಚ್ಚರಿಕೆ ವಹಿಸಬೇಕು. ಇಲ್ಲದಿದ್ದರೆ ವಿದ್ಯಾರ್ಥಿಯ ಆಸಕ್ತಿ, ಪೋಷಕರ ಕನಸು ಒಂದೆಡೆಯಾಗಿರುತ್ತದೆ, ವಿದ್ಯಾರ್ಥಿಯು ಓದುವುದೇ ಮತ್ತೊಂದಾಗಿರುತ್ತದೆ. ಮುಖ್ಯವಾಗಿ ವಿದ್ಯಾರ್ಥಿಯು ಈ ಸಂದರ್ಭದಲ್ಲಿ ಎಲ್ಲರಿಂದಲೂ ಮಾಹಿತಿ ಪಡೆದುಕೊಂಡು, ಸೂಕ್ತವಾದ ತೀರ್ಮಾನ ತೆಗೆದುಕೊಂಡಲ್ಲಿ ಮಾತ್ರ ಅವರ ಭವಿಷ್ಯ ಉಜ್ವಲವಾಗಿರುತ್ತದೆ.
ʼʼತೀರ್ಮಾನ ತೆಗೆದುಕೊಳ್ಳುವಾಗ ” ಜೀವನದ ಉದ್ದೇಶ”, “ಸ್ವ -ವ್ಯಕ್ತಿತ್ವ”, “ಬೆಳೆದ ಪರಿಸರ” ಮತ್ತು “ಬಾಧ್ಯತೆ” ಈ ನಾಲ್ಕು ವಿಷಯಗಳನ್ನು ಗಮನದಲ್ಲಿರಿಸಿ, ಸೂಕ್ತವಾದ ವಿಷಯವನ್ನು ಆರಿಸಿ, ಶಿಕ್ಷಣ ಮುಂದುವರಿಸುವುದು ಇಂದಿನ ಸ್ಪರ್ಧಾತ್ಮಕ ಸಮಾಜದಲ್ಲಿ ಆನೀವಾರ್ಯ ಮತ್ತು ಅಗತ್ಯವಾಗಿದೆʼʼ ಎನ್ನುತ್ತಾರೆ ಮಂಗಳೂರಿನ ಸಂತ ಅಲೋಶಿಯಸ್ ಕಾಲೇಜಿನ ಅಸೋಸಿಯೇಟ್‌ ಪ್ರೊಫೆಸರ್‌ ಡಾ. ಕೆ.ಎನ್. ಲೋಬೋ.
ನಿಮ್ಮ ಉದ್ದೇಶವೇನು, ಪೋಷಕರ ಕನುಸಗಳೇನು, ಏನಾಗಬೇಕೆಂದುಕೊಂಡಿದ್ದೀರಿ ಎಂಬುದನ್ನು ಮೊದಲು ಸ್ಪಷ್ಟಮಾಡಿಕೊಳ್ಳಿ, ನಂತರ ನಿಮ್ಮ ವ್ಯಕ್ತಿತ್ವಕ್ಕೆ ನೀವಂದುಕೊಂಡಿದ್ದು ಸೂಕ್ತವಾಗಿದೆಯೇ, ಇದರಲ್ಲಿ ನಿಮಗೆ ಹೆಚ್ಚಿನ ಆಸಕ್ತಿ ಇದೆಯೇ ಎಂಬುದನ್ನು ಪರಿಶೀಲಿಸಿಕೊಳ್ಳಿ. ಮೂರನೇಯದಾಗಿ, ನೀವೇನಂದುಕೊಂಡಿದ್ದೀರೋ ಅದನ್ನು ಸಾಧಿಸುವ ಅವಕಾಶಗಳು, ಸೌಕರ್ಯಗಳು ನಿಮಗಿದೆಯೇ ಎಂದು ನೋಡಿಕೊಳ್ಳಿ. ಕೊನೆಯದಾಗಿ ನೀವಂದುಕೊಂಡಿದ್ದನ್ನು ಸಾಧಿಸುವ ಬದ್ಧತೆ ನಿಮಗಿದೆಯೇ, ನೂರಕ್ಕೆ ನೂರರಷ್ಟು ಅಂದುಕೊಂಡಿದ್ದನ್ನು ಸಾಧಿಸುವ ಛಲ ಹೊಂದಿರುವಿರಾ ಎಂಬುದನ್ನು ನೀವೇ ನೋಡಿಕೊಂಡು ತೀರ್ಮಾನಿಸಿ ಎಂದು ಅವರು ಸಲಹೆ ನೀಡಿದ್ದಾರೆ.
ಇಂದು ಯಾವುದೇ ಶಿಕ್ಷಣ ಪಡೆಯುವುದಕ್ಕೂ ತುಂಬಾ ಹಣ ಖರ್ಚು ಮಾಡಬೇಕಾಗುತ್ತದೆ. ನಾವು ಮಾರುಕಟ್ಟೆಯಲ್ಲಿ ಯಾವುದೇ ವಸ್ತು ಕೊಂಡರೂ ನಮಗೆ ಗ್ಯಾರಂಟಿ /ವಾರಂಟಿ ಸಿಗುತ್ತದೆ. ಆದರೆ ನಾವು ಕಲಿತ ಶಿಕ್ಷಣಕ್ಕೆ ಅಥವಾ ಪದವಿಗೆ ಉದ್ಯೋಗ ದೊರೆಯುತ್ತದೆ ಎಂದು ಯಾವೂದೇ ಶಿಕ್ಷಣ ಸಂಸ್ಥೆಯಾಗಲಿ ಆಥವಾ ವಿಶ್ವವಿದ್ಯಾನಿಲಯವಾಗಲಿ ಯಾವುದೇ ರೀತಿಯ ಗ್ಯಾರಂಟಿ / ವಾರಂಟಿ ಕೊಡುವುದಿಲ್ಲ. ಹೀಗಾಗಿ ನಾವು ಬಹಳ ಎಚ್ಚರಿಕೆಯಿಂದ ತೀರ್ಮಾನ ತೆಗೆದುಕೊಳ್ಳಬೇಕು.
ಡಾ. ಕೆ.ಎನ್. ಲೋಬೋ | ಅಸೋಸಿಯೇಟ್‌ ಪ್ರೊಫೆಸರ್‌, ಸಂತ ಅಲೋಶಿಯಸ್ ಕಾಲೇಜು ಮಂಗಳೂರು
ನಿಮ್ಮನ್ನೇ ನೀವು ಪ್ರಶ್ನಿಸಿಕೊಳ್ಳಿ
ಇಂದು ನೀವು ಮಾಡುವ ತೀರ್ಮಾನ ನಾಳೆಯ ನಿಮ್ಮ ಭವಿಷ್ಯಕ್ಕೆ ಭದ್ರ ಬುನಾದಿ ಹಾಕುತ್ತದೆ. ಹೀಗಾಗಿ ನೀವು ಎಷ್ಟು ಎಚ್ಚರಿಕೆ ವಹಿಸಿದರೂ ಸಾಲದು. ಮೊದಲಿಗೆ ಭವಿಷ್ಯದ ಕುರಿತಂತೆ ಸ್ಪಸ್ಟ ಗುರಿ ಮತ್ತು ಪರಿಕಲ್ಪನೆ ಇಟ್ಟುಕೊಂಡರೆ ಇಂತಹ ಸಂದರ್ಭದಲ್ಲಿ ಅತ್ಯುತ್ತಮ ತೀರ್ಮಾನವನ್ನು ತೆಗೆದುಕೊಳ್ಳುವುದು ಸುಲಭವಾಗುತ್ತದೆ.
ನೀವು ನಿಮ್ಮ ಗುರಿ ತಲುಪಲು ಸೂಕ್ತವಾದ ಶಿಕ್ಷಣ ವಿಷಯ ಆಯ್ಕೆ ಮಾಡಿಕೊಳ್ಳಲು ಈ ಕೆಳಗಿನ ಪ್ರಶ್ನೆಗಳನ್ನು ನೀವೇ ನಿಮಗೆ ಕೇಳಿಕೊಳ್ಳಿ.
- ನನಗೆ ಮುಂದೆ ಓದಲು ಏನೆಲ್ಲಾ ಆವಾಕಾಶಗಳಿವೆ? ಪಟ್ಟಿ ಮಾಡಿಕೊಳ್ಳಿ.
- ನಾನು ಜೀವನದಲ್ಲಿ ಏನಾಗಬೇಕೆಂದುಕೋಂಡಿದ್ದೇನೆ, ಅದನ್ನು ಸಾಧಿಸುವ ದಾರಿ ಯಾವುದು?
- ನಾನು ಈಗ ಓದಬೇಕೆಂದುಕೊಂಡಿರುವ ವಿಷಯದ ಆಯ್ಕೆ ನಾನಾಗಿಯೇ ಮಾಡಿದ್ದೇ, ಮಾಡಿದ್ದರೆ ಇದಕ್ಕೆ ಕಾರಣವೇನು, ಪ್ರಶ್ನೆ ಮಾಡುತ್ತಾ ಸ್ಪಷ್ಟಮಾಡಿಕೊಳ್ಳಿ.
- ನಾನು ಆಯ್ಕೆ ಮಾಡಿಕೊಂಡಿದ್ದಕ್ಕೂ, ನಾನೇನಾಗಬೇಕೆಂದುಕೊಂಡಿದ್ದೆನೋ ಅದಕ್ಕೂ ತಾಳೆಯಾಗುತ್ತಿದೆಯೇ, ತಾಳೆಯಾಗದಿದ್ದರೆ ಯಾವ ರೀತಿ ಹೊಂದಾಣಿಕೆ ಮಾಡಿಕೊಳ್ಳಬೇಕು?
- ನಾನು ಆಯ್ಕೆ ಮಾಡಿಕೊಂಡ ಕೋರ್ಸ್‌/ ವೃತ್ತಿಯ ಬಗ್ಗೆ ನನಗೆ ಸರಿಯಾದ ಮಾಹಿತಿಗೆ ಇದೆಯೇ, ಮುಂದೆ ಯಾವ ರೀತಿಯ ಕೆಲಸ ಸಿಗಬಹುದು, ಎಷ್ಟು ವೇತನ ಇರುತ್ತದೆ, ಅವಕಾಶಗಳು ಹೇಗಿರಬಹುದು ಯೋಚಿಸಿದ್ದೇನೆಯೇ?
- ಈ ಕುರಿತ ಸಮರ್ಪಕವಾದ ಮಾಹಿತಿ ಎಲ್ಲಿ ಸಿಗುತ್ತದೆ ಅಥವಾ ಯಾರಿಂದ ಪಡೆಯಬಹುದು?
- ಈ ವಿಷಯ ಓದಲು ನನಗೆ ಆಸಕ್ತಿ ಇದೆಯೇ, ಸರಿಯಾದ ಮಾನಸಿಕ ಸಿದ್ಧತೆ ಮಾಡಿಕೊಂಡಿದ್ದೇನೆಯೇ?
- ಕೋರ್ಸು/ ವೃತ್ತಿಯನ್ನು ಹೊರತು ಪಡಿಸಿ ಬೇರೆ ಯಾವೆಲ್ಲಾ ಕೋರ್ಸು / ವೃತ್ತಿ ಮಾಡಲು ನಾನು ಸಿದ್ದನಿದ್ದೇನೆ?
- ನನ್ನ ಆಸಕ್ತೀಯ ಕೋರ್ಸು/ ವೃತ್ತಿ ಮಾಡಲು ನನಗೆ ಯಾವೆಲ್ಲಾ ತೊಂದರೆಗಳಿವೆ, ಅವುಗಳನ್ನು ಹೇಗೆ ಬಗೆಹರಿಸಿಕೊಳ್ಳಬಹುದು?
- ನಾನು ಆಯ್ಕೆ ಮಾಡಿಕೊಂಡಿದ್ದನ್ನು ಓದಲು ಸೂಕ್ತವಾದ ಶಿಕ್ಷಣ ಸಂಸ್ಥೆ/ಕಾಲೇಜು ಇದೆಯೇ? ಇದಕ್ಕೆ ಬೇಕಾಗಿರುವ ಹಣಕಾಸು ವೆಚ್ಚವನ್ನು ಭರಿಸುವ ಶಕ್ತಿ ಪೋಷಕರಿಗೆ ಇದೆಯೇ?
- ವಿಜ್ಞಾನ ಮತ್ತು ತಂತ್ರಜ್ಞಾನ ನಿತ್ಯವೂ ಜಗತ್ತನ್ನು ಬದಲಾಯಿಸುತ್ತಿದೆ. ನಾನಂದುಕೊಂಡ ಕೋರ್ಸ್‌ ಮಾಡಿದರೆ, ಮುಂದೆ ಉದ್ಯೋಗ ಸಿಗಬಹುದೇ? ನಾನು ಮಾಡಬೇಕೆಂದಿರುವ ವೃತ್ತಿಗೆ ಹೆಚ್ಚಿನ ಅವಕಾಶಗಳಿರುತ್ತವೆಯೇ?
- ನನ್ನ ಜೀವನದಲ್ಲಿ ವೃತ್ತಿ ತೃಪ್ತಿ ಮತ್ತು ವೃತ್ತಿ ಭದ್ರತೆ ಈ ಎರಡರಲ್ಲಿ ನಾನು ಯಾವುದಕ್ಕೆ ಹೆಚ್ಚಿನ ಪ್ರಾಮುಖ್ಯತೆ ನೀಡುತ್ತಿದ್ದೇನೆ, ನನ್ನ ತೀರ್ಮಾನ ಸರಿಯಾಗಿದೆಯೇ?
- ಒಂದು ವೇಳೆ ನಾನು ಓದಿದ ವಿಷಯದಿಂದ ಕೆಲಸ ಸಿಗದೇ ಹೋದರೆ ಮುಂದಿರುವ ಅವಕಾಶಗಳೇನು? ಸ್ವ-ಉದ್ಯೋಗ ಮಾಡಬಹುದೇ?
- ನಾನು ಬಯಸುವ ಕೋರ್ಸಿಗೆ ಪ್ರವೇಶ ಪಡೆಯಲು ನನಗೆ ಬಂದಿರುವ ಅಂಕ ಸಾಕೇ? ಸಾಲದಿದ್ದರೆ ಏನು ಮಾಡಬೇಕು?
ಹೀಗೆ ನೀವು ನಿಮಗೇ ಬೇರೆ ಬೇರೆ ರೀತಿಯ ಪ್ರಶ್ನೆಗಳನ್ನು ಕೇಳಿಕೊಂಡು, ಅದಕ್ಕೆ ಉತ್ತರವನ್ನು ಸಾಧ್ಯವಾದರೆ ಬರೆಯಿರಿ. ಇದರಿಂದ ನಿಮ್ಮ ಯೋಚನೆಯು ಸ್ಪಷ್ಟವಾಗುತ್ತಾ ಹೋಗುತ್ತದೆ. ಸೂಕ್ತ ತೀರ್ಮಾನವನ್ನು ತೆಗೆದುಕೊಳ್ಳುವುದು ಸುಲಭವಾಗುತ್ತದೆ.
ಆಲ್‌ ದಿ ಬೆಸ್ಟ್‌ !
ಇದನ್ನೂ ಓದಿ: SSLC Result 2023: ಎಸ್‌ಎಸ್‌ಎಲ್‌ಸಿ ಫಲಿತಾಂಶದಲ್ಲಿ ಚಿತ್ರದುರ್ಗ ಫಸ್ಟ್‌, ಮಂಡ್ಯ ನೆಕ್ಸ್ಟ್‌, ಯಾದಗಿರಿ ಲಾಸ್ಟ್‌