ನವ ದೆಹಲಿ: ಪಾಕಿಸ್ತಾನ ಸೇನಾ ಹೆಲಿಕಾಪ್ಟರ್ವೊಂದು ಬಲೂಚಿಸ್ತಾನದ ಲಾಸ್ಬೆಲಾ ಬಳಿ ಸೋಮವಾರ ರಾತ್ರಿ ಅಪಘಾತಕ್ಕೀಡಾಗಿದೆ. ಈ ಹೆಲಿಕಾಪ್ಟರ್ನಲ್ಲಿ ಕ್ವೆಟ್ಟಾ ಕಾರ್ಪ್ಸ್ (XII Corp)ನ ಕಮಾಂಡರ್ ಲೆಫ್ಟಿನೆಂಟ್ ಸರ್ಫ್ರಾಜ್ ಅಲಿ ಸೇರಿ ಒಟ್ಟು ಆರು ಮಂದಿ ಮಿಲಿಟರಿ ಅಧಿಕಾರಿಗಳು ಇದ್ದರು. ಹೆಲಿಕಾಪ್ಟರ್ ದುರಂತದಲ್ಲಿ ಇವರೆಲ್ಲರೂ ಮೃತಪಟ್ಟಿದ್ದಾಗಿ ವರದಿಯಾಗಿದೆ. ಬಲೂಚಿಸ್ತಾನ್ ಬಂಡುಕೋರರು ಹೆಲಿಕಾಪ್ಟರ್ರನ್ನು ಹೊಡೆದುರುಳಿಸಿರುವ ಅನುಮಾನ ದಟ್ಟವಾಗಿದ್ದು, ತನಿಖೆಗೆ ಆದೇಶಿಸಲಾಗಿದೆ.
ಸರ್ಫ್ರಾಜ್ ಅಲಿ, ಬ್ರಿಗೇಡಿಯರ್ ಅಮ್ಜದ್ ಹನೀಫ್ (ಕೋಸ್ಟ್ ಗಾರ್ಡ್ ಡಿಜಿ), ಮೇಜರ್ ಸಯೀದ್ (ಪೈಲಟ್), ಮೇಜರ್ ತಲ್ಹಾ ( ಕೋ-ಪೈಲಟ್) ಮತ್ತು ನಾಯಕ್ ಮುದಾಸಿರ್ ಮೃತರಾಗಿದ್ದಾಗಿ ಪಾಕ್ ಸೇನೆ ದೃಢಪಡಿಸಿದೆ. ಪ್ರವಾಹ ಪೀಡಿತ ಜನರಿಗೆ ನೆರವು ನೀಡುತ್ತಿದ್ದ ಈ ಹೆಲಿಕಾಪ್ಟರ್ ಸೋಮವಾರ ರಾತ್ರಿ ವಿಂದರ್ ಮತ್ತು ಸಾಸ್ಸಿ ಪುನ್ನು ಮಧ್ಯದ ಲಾಸ್ಬೆಲಾ ಬಳಿ ಏರ್ ಟ್ರಾಫಿಕ್ ಸಂಪರ್ಕಕ್ಕೆ ಸಿಗದಂತಾಗಿದೆ. ಇದೊಂದು ಪರ್ವತ ಪ್ರದೇಶವಾಗಿದ್ದು, ಜನಸಂಖ್ಯೆಯೂ ತೀರ ವಿರಳ. ಅಲ್ಲೀಗ ವಿಮಾನದ ಅವಶೇಷಗಳನ್ನು ಪತ್ತೆಹಚ್ಚಿ, ಮೃತ ದೇಹಗಳನ್ನು ಹುಡುಕುವುದೂ ಸುಲಭವಾಗಿಲ್ಲ ಎಂದು ಸ್ಥಳೀಯ ಪೊಲೀಸರು ತಿಳಿಸಿದ್ದಾರೆ.
ಬಲೂಚಿಸ್ತಾನ್ ಲಿಬರೇಶನ್ ಆರ್ಮಿಯೇ ಈ ಹೆಲಿಕಾಪ್ಟರ್ ಟಾರ್ಗೆಟ್ ಮಾಡಿರುವ ಶಂಕೆ ವ್ಯಕ್ತವಾಗಿದ್ದರೂ ಬಂಡುಕೋರರು ಈ ಬಗ್ಗೆ ಯಾವುದೇ ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿಲ್ಲ. ಕ್ವೆಟ್ಟಾ ಕಾರ್ಪ್ಸ್ ಕಮಾಂಡರ್ ಸರ್ಫ್ರಾಜ್ ಅಲಿ ಈ ಲಿಬರೇಶನ್ ಆರ್ಮಿ ಪಾಲಿಗೆ ಸಿಂಹಸ್ವಪ್ನವಾಗಿದ್ದರು. ಇವರ ಕಾರ್ಯಾಚರಣೆಗೆ ಸದಾ ಅಡ್ಡಿಯಾಗುತ್ತಿದ್ದರು. ಪಾಕಿಸ್ತಾನದ ಅತ್ಯಂತ ದೊಡ್ಡ ಪ್ರಾಂತ್ಯವಾಗಿರುವ ಬಲೂಚಿಸ್ತಾನ ಪ್ರತ್ಯೇಕತೆಗಾಗಿ ಲಿಬರೇಶನ್ ಆರ್ಮಿ ಸದಾ ಹೋರಾಟ ನಡೆಸುತ್ತಿದೆ. ಹಿಂಸಾತ್ಮಕ ಮಾರ್ಗಗಳನ್ನೂ ಅನುಸರಿಸುತ್ತಿದೆ. ಬಲೂಚಿಸ್ತಾನ್ದ ರಾಜಧಾರಿ ಕ್ವೆಟ್ಟಾಕ್ಕೆ ಕಮಾಂಡರ್ ಆಗಿರುವ ಸರ್ಫ್ರಾಜ್ ಅಲಿ ಇವರ ಪ್ರತ್ಯೇಕತೆ ಹೋರಾಟಕ್ಕೆ ಅಡ್ಡಿಯಾಗಿದ್ದ ಕಾರಣ, ಅವರಿರುವ ಹೆಲಿಕಾಪ್ಟರ್ ಗುರಿಯಾಗಿಸಿ ದಾಳಿ ನಡೆಸಿರಬಹುದು ಎನ್ನಲಾಗಿದೆ. ಸೇನಾ ಅಧಿಕಾರಿಗಳ ಸಾವಿಗೆ ಪಾಕಿಸ್ತಾನದ ಪ್ರಧಾನಮಂತ್ರಿ ಶೆಹಬಾಜ್ ಅಲಿ ಸಂತಾಪ ಸೂಚಿಸಿದ್ದಾರೆ.
ಇದನ್ನೂ ಓದಿ: Al-Jawahiri Dead | ಲಾಡೆನ್‌ ಉತ್ತರಾಧಿಕಾರಿ, 9/11 ಸಂಚುಕೋರ ಜವಾಹಿರಿಯ ಆಟ ಮುಗಿಸಿದ ಅಮೆರಿಕ