ವಾಷಿಂಗ್ಟನ್: ಯುಎಸ್ ಜನಪ್ರತಿನಿಧಿ ಸಭೆಯ ಸ್ಪೀಕರ್ (ಅಮೆರಿಕ ಹೌಸ್ ಸ್ಪೀಕರ್) ನ್ಯಾನ್ಸಿ ಪೆಲೋಸಿ ಅವರ ಕ್ಯಾಲಿಫೋರ್ನಿಯಾದಲ್ಲಿರುವ ನಿವಾಸಕ್ಕೆ ನುಗ್ಗಿದ ವ್ಯಕ್ತಿಯೊಬ್ಬ ನ್ಯಾನ್ಸಿ ಪತಿ ಪೌಲ್ ಪೆಲೋಸಿ ಮೇಲೆ ಸುತ್ತಿಗೆಯಿಂದ ಹಿಂಸಾತ್ಮಕವಾಗಿ ಹಲ್ಲೆ ಮಾಡಿದ್ದಾನೆ. ಶುಕ್ರವಾರ ಮುಂಜಾನೆಯೇ ಮನೆಗೆ ನುಗ್ಗಿದ್ದ ಆತ, ‘ನ್ಯಾನ್ಸಿ ಎಲ್ಲಿ’ ಎಂದು ಒಂದೇ ಸಮನೆ ಕೂಗುತ್ತ, ಪ್ರಶ್ನೆ ಮಾಡುತ್ತಿದ್ದ. ಹೀಗೆ ಹಲ್ಲೆ ಮಾಡಿದವನ ಹೆಸರು ಡೆವಿಡ್ ಡಿಪೇಪ್ ಎಂದಾಗಿದ್ದು, ಆತನಿಗೆ 42 ವರ್ಷ. ಪೊಲೀಸರು ಅವನನ್ನು ಬಂಧಿಸಿದ್ದಾರೆ.
ಸ್ಪೀಕರ್ ನ್ಯಾನ್ಸಿ ಪೆಲೋಸಿ ಈ ಸಮಯದಲ್ಲಿ ಮನೆಯಲ್ಲಿ ಇರಲಿಲ್ಲ, ವಾಷಿಂಗ್ಟನ್ನಲ್ಲಿದ್ದರು. ಪತಿ ಮೇಲೆ ಹಲ್ಲೆಯಾಗಿದೆ ಎಂದು ಗೊತ್ತಾಗುತ್ತಿದ್ದಂತೆ ಮರಳಿಬಂದಿದ್ದಾರೆ. ಆಸ್ಪತ್ರೆಗೆ ಭೇಟಿ ಕೊಟ್ಟು, ಚಿಕಿತ್ಸೆ ಪಡೆಯುತ್ತಿರುವ ಪತಿಯ ಯೋಗಕ್ಷೇಮ ವಿಚಾರಸಿದ್ದಾರೆ. ಪೌಲ್ ಪೆಲೋಸಿಯವರೊಂದಿಗೆ ಆಸ್ಪತ್ರೆಯಲ್ಲಿ ಉಳಿದುಕೊಂಡಿದ್ದಾರೆ. ಇನ್ನು 82 ವರ್ಷದ ಪೌಲ್ ತಲೆಗೆ ಗಂಭೀರ ಗಾಯವಾಗಿದ್ದು ತಲೆಯ ಚಿಪ್ಪು ಫ್ರ್ಯಾಕ್ಚರ್ ಆಗಿದೆ. ಅಲ್ಲದೆ, ಬಲ ಭಾಗದ ತೋಳು, ಎರಡೂ ಕೈಯಿಗಳಿಗೂ ಗಂಭೀರ ಸ್ವರೂಪದ ಗಾಯಗಳಾಗಿವೆ. ಪೂರ್ತಿ ಗುಣಮುಖರಾದ ವಿನಃ ಡಿಸ್ಚಾರ್ಜ್ ಮಾಡಲು ಸಾಧ್ಯವಿಲ್ಲ ಎಂದು ವೈದ್ಯರು ಹೇಳಿದ್ದಾರೆ. ಹಾಗೇ, ಇದು ಉದ್ದೇಶಪೂರ್ವಕವಾಗಿಯೇ ನಡೆಸಲಾದ ಹಲ್ಲೆ, ಹೆಚ್ಚಿನ ತನಿಖೆ ನಡೆಸುತ್ತಿದ್ದೇವೆ ಎಂದೂ ಅಲ್ಲಿನ ಪೊಲೀಸ್ ಹೇಳಿದ್ದಾರೆ.
ಇದನ್ನೂ ಓದಿ: ತೈವಾನ್ ಅಧ್ಯಕ್ಷೆ ಪಕ್ಕ ನಿಂತು ಚೀನಾಕ್ಕೊಂದು ಖಡಕ್ ಸಂದೇಶ ಕೊಟ್ಟ ನ್ಯಾನ್ಸಿ; ಎಚ್ಚರಿಕೆಗೆ ಡೋಂಟ್ ಕೇರ್ !