ಬೆಂಗಳೂರು: ‘ಅವತಾರ್’ ಹೆಸರು ಕೇಳಿದ್ರೆ ಸಾಕು ವರ್ಲ್ಡ್ ಸಿನಿಮಾ ಬಾಕ್ಸ್‌ಆಫೀಸ್ ಒಂದು ಕ್ಷಣ ನಡುಗುತ್ತದೆ. ಜಗತ್ತಿನ ಎಲ್ಲ ಸಿನಿಮಾಗಳಿಗೆ ಬಾಸ್ ಆಗಿರುವ ‘ಅವತಾರ್’ ಮತ್ತೆ ಅಬ್ಬರಿಸೋದಕ್ಕೆ ಸಜ್ಜಾಗಿದೆ. ಅಷ್ಟಕ್ಕೂ ‘ಅವತಾರ್’ ಸಿನಿಮಾ ಸೀಕ್ವೆಲ್ ಅಂದ್ರೆ ‘ಅವತಾರ್-2’ (Avatar 2) ರಿಲೀಸ್ ಆಗುತ್ತಿರುವುದು ಗೊತ್ತಿರುವ ವಿಚಾರ. ಆದರೆ ಮತ್ತೊಂದು ಸರ್ಪ್ರೈಸ್ ಕೂಡ ‘ಅವತಾರ್’ ಫ್ಯಾನ್ಸ್ ಕ್ಲಬ್ಗೆ ಸಿಕ್ಕಿದೆ. ಯಾರೂ ಊಹಿಸಲಾಗದ ಮಾಸ್ಟರ್ ಪ್ಲ್ಯಾನ್ ಜತೆಗೆ ‘ಅವತಾರ್’ ತಂಡ ಗ್ರ್ಯಾಂಡ್ ಎಂಟ್ರಿ ಕೊಡುತ್ತಿದೆ.
ಹೌದು, ಬರೋಬ್ಬರಿ 13 ವರ್ಷಗಳ ಹಿಂದೆ ಸಿನಿಮಾ ಮಂದಿರಗಳಿಗೆ ಗ್ರ್ಯಾಂಡ್ ಎಂಟ್ರಿ ಕೊಟ್ಟು ಯಾರೂ ಊಹೆ ಮಾಡಲಾಗದಷ್ಟು ಹಣ ದೋಚಿದ್ದ ಸಿನಿಮಾ ಮತ್ತೆ ಬರುತ್ತಿದೆ. ‘ಅವತಾರ್’ ಟೈಟಲ್ ಮೂಲಕವೇ ಇಡೀ ಜಗತ್ತಿನ ಗಮನ ಸೆಳೆದಿತ್ತು ಈ ಸಿನಿಮಾ. ಅದರಲ್ಲೂ ಕೋಟಿ ಕೋಟಿ ಭಾರತೀಯರಿಗೆ ‘ಅವತಾರ್’ ಎಂಬ ಹೆಸರು ಸಾಕಷ್ಟು ಹತ್ತಿರವಾಗಿತ್ತು. ನಮ್ಮ ನೆಲದ ಹೆಸರಿನ ಸಿನಿಮಾ ಹಾಲಿವುಡ್ ಅಂಗಳದಲ್ಲಿ ಅಬ್ಬರಿಸುತ್ತಿದೆ ಎಂಬುದೇ ಖುಷಿಯ ಸಮಾಚಾರ. ಹೀಗಿರುವಾಗ ‘ಅವತಾರ್’ ಬಾಕ್ಸ್ ಆಫಿಸ್ನಲ್ಲಿ ಹೊಸ ದಾಖಲೆ ಸೃಷ್ಟಿಸಿತ್ತು. ಆಗಿನ ಕಾಲಕ್ಕೆ ₹20 ಸಾವಿರ ಕೋಟಿಗೂ ಹೆಚ್ಚು ಹಣ ಬಾಚಿತ್ತು. ಇದೇ ಸಿನಿಮಾದ ಸೀಕ್ವೆಲ್ ಅಂದ್ರೆ ‘ಅವತಾರ್-2’ ಸದ್ಯ ರಿಲೀಸ್ ಆಗುತ್ತಿದ್ದು, ಅದಕ್ಕೂ ಮೊದಲು ‘ಅವತಾರ್-1’ ಮತ್ತೆ ರಿಲೀಸ್ ಅಂದ್ರೆ ರೀ ರಿಲೀಸ್ ಮಾಡಲು ನಿರ್ಧರಿಸಲಾಗಿದೆ.
ಭರ್ಜರಿ ಪ್ಲ್ಯಾನ್..!
ಬರೋಬ್ಬರಿ 13 ವರ್ಷಗಳ ಹಿಂದೆ ‘ಅವತಾರ್-1’ ರಿಲೀಸ್ ಆಗಿತ್ತು. ಆದರೆ ‘ಅವತಾರ್-2’ ರಿಲೀಸ್ ಆಗುತ್ತಿರುವುದು ಈಗ. ಹೀಗೆ ಸುಮಾರು 1 ದಶಕದ ನಂತರ ಸೀಕ್ವೆಲ್ ಬರುತ್ತಿದೆ. ಹೀಗಾಗಿ ಬಹುತೇಕರಿಗೆ ‘ಅವತಾರ್-1’ನಲ್ಲಿ ಬಂದು ಹೋಗಿದ್ದ ಪಾತ್ರಗಳೇ ಮರೆತು ಹೋಗಿರುತ್ತವೆ. ಇದು ‘ಅವತಾರ್-2’ ನೋಡುವವರಿಗೆ ಗೊಂದಲ ಸೃಷ್ಟಿಸುತ್ತದೆ. ಹೀಗಾಗಿ ‘ಅವತಾರ್-1’ ಅನ್ನು ಜಗತ್ತಿನಾದ್ಯಂತ ರೀ ರಿಲೀಸ್ ಮಾಡಲು ‘ಅವತಾರ್’ ಸಿನಿಮಾ ಟೀಂ ನಿರ್ಧರಿಸಿದೆ. ಭಾರತದಲ್ಲಿ ಸೆಪ್ಟೆಂಬರ್ 23ರಂದು ‘ಅವತಾರ್-1’ ರೀ ರಿಲೀಸ್ ಆಗುತ್ತಿದೆ. ಈ ಮೂಲಕ ಹೊಸ ತಲೆಮಾರಿನ ಜನರನ್ನೂ ‘ಅವತಾರ್-2’ ನೋಡುವಂತೆ ಮಾಡಲು ಭರ್ಜರಿ ಪ್ಲ್ಯಾನ್ ಮಾಡಲಾಗಿದೆ.
ಸಾವಿರಾರು ಸ್ಕ್ರೀನ್..!
‘ಅವತಾರ್’ ಹೆಸರಲ್ಲೇ ಗತ್ತು ಇದೆ, ‘ಅವತಾರ್’ ಟೈಟಲ್ನಲ್ಲೇ ಸೆಳೆತವಿದೆ. ಹೀಗಿರುವಾಗ ‘ಅವತಾರ್-1’ ರೀ ರಿಲೀಸ್ ಆಗುತ್ತೆ ಅಂದ್ರೆ ಅದು ಸಣ್ಣ ವಿಚಾರ ಅಲ್ಲವೇ ಅಲ್ಲ. ಸಾವಿರಾರು ಸ್ಕ್ರೀನ್ನಲ್ಲಿ ‘ಅವತಾರ್-1’ ರೀ ರಿಲೀಸ್ ಮಾಡಲು ಭರ್ಜರಿ ಪ್ಲ್ಯಾನ್ ಮಾಡಲಾಗಿದೆ. ಇನ್ನು ‘ಅವತಾರ್-1’ ರೀ ರಿಲೀಸ್ ಮಾಡೋದಕ್ಕಾಗಿಯೇ ಸುಮಾರು 80 ಕೋಟಿ ಖರ್ಚು ಮಾಡಿ ಭರ್ಜರಿ ಸಿದ್ಧತೆಯಲ್ಲಿದೆ ಸಿನಿಮಾ ತಂಡ. ಜೇಮ್ಸ್ ಕ್ಯಾಮೆರಾನ್ ನಿರ್ದೇಶಿಸಿದ್ದ ಈ ಚಿತ್ರ ದೊಡ್ಡ ಮಟ್ಟದಲ್ಲಿ ಯಶಸ್ಸು ಗಳಿಸಿದ್ದು, ಈಗಲೂ ಮತ್ತೊಮ್ಮೆ ಸಾವಿರಾರು ಕೋಟಿ ಗಳಿಸುವ ನಿರೀಕ್ಷೆ ಇದೆ. ಹೀಗಾಗಿ ಜಗತ್ತಿನಾದ್ಯಂತ ‘ಅವತಾರ್’ ಫೀವರ್ ಶುರುವಾಗಿದೆ.
ಒಟ್ಟಿನಲ್ಲಿ ಕೊರೊನಾ ಬಳಿಕ ಜಗತ್ತಿನಾದ್ಯಂತ ಸಿನಿಮಾ ರಂಗ ಮೈಕೊಡವಿ ನಿಂತಿದೆ. ಅದರ ಭಾಗವಾಗಿ ಸಾಲು ಸಾಲಾಗಿ ಸಿನಿಮಾಗಳು ರಿಲೀಸ್ ಆಗುತ್ತಿದ್ದು, ಈ ಪಟ್ಟಿಯಲ್ಲಿ ‘ಅವತಾರ್-2’ ಕೂಡ ನಿಂತಿದೆ. ‘ಅವತಾರ್-2’ ಬಿಡುಗಡೆಗೂ ಮೊದಲು ಸಖತ್ ಸರ್ಪ್ರೈಸ್ ಕೊಡಲು ಜೇಮ್ಸ್ ಕ್ಯಾಮೆರಾನ್ ಮಾಸ್ಟರ್ ಪ್ಲ್ಯಾನ್ ಮಾಡಿದ್ದು, ಜಗತ್ತಿನಾದ್ಯಂತ ಕೋಟ್ಯಂತರ ಅಭಿಮಾನಿಗಳು ಕಾದು ಕುಳಿತಿದ್ದಾರೆ. ಅಷ್ಟಕ್ಕೂ ಅವತಾರ್ 5 ಪಾರ್ಟ್ ಹೊಂದಿರಲಿದೆ. ಈ ಪೈಕಿ ಅವತಾರ್-3 2024ರ ಡಿಸೆಂಬರ್ 20ರಂದು ರಿಲೀಸ್ ಆದರೆ, 2026ರ ಡಿಸೆಂಬರ್ 18ಕ್ಕೆ ಅವತಾರ್-4 ಹಾಗೂ 2028ರ ಡಿಸೆಂಬರ್ 22ರಂದು ಅವತಾರ್ ಪಾರ್ಟ್ 5 ರಿಲೀಸ್ ಆಗಲಿದೆ.
ಇದನ್ನೂ ಓದಿ : Rocking Star Yash | ರಾಕಿಂಗ್‌ ಸ್ಟಾರ್‌ ಯಶ್‌ ಬಾಲಿವುಡ್‌ ನಂ 1 ಸ್ಟಾರ್‌ ಎಂದ ಶಾಹಿದ್‌ ಕಪೂರ್‌!