ಹಲ್ಲುಜ್ಜುವ ಬ್ರಷ್ ಮತ್ತು ಲೋಹದ ಸಾಧನವೊಂದನ್ನು ಬಳಸಿ, ಜೈಲಿನ ಗೋಡೆ ಕೊರೆದು ತೂತು ಮಾಡಿಕೊಂಡು ಪರಾರಿಯಾಗಿದ್ದ ಇಬ್ಬರು ಕೈದಿಗಳು (Inmates escape), ಅದಾಗಿ ಒಂದು ತಾಸಿನಲ್ಲಿ ಸಮೀಪದ ರೆಸ್ಟೋರೆಂಟ್ನಲ್ಲಿ ಸಿಕ್ಕಿಬಿದ್ದ ಘಟನೆ ವರ್ಜೀನಿಯಾದಲ್ಲಿ ನಡೆದಿದೆ. ಈ ಇಬ್ಬರು ಕೈದಿಗಳಲ್ಲಿ ಒಬ್ಬನಿಗೆ 37ವರ್ಷ ಮತ್ತು ಇನ್ನೊಬ್ಬನಿಗೆ 43ವರ್ಷ. ಒಬ್ಬಾತ ಹ್ಯಾಂಪ್ಟನ್ ನಿವಾಸಿಯಾಗಿದ್ದು, ನ್ಯಾಯಾಂಗ ನಿಂದನೆ ಮತ್ತು ಇತರ ಕೇಸ್ನಡಿ ಜೈಲುಪಾಲಾಗಿದ್ದ. ಇನ್ನೊಬ್ಬಾತ ಗ್ಲೌಸೆಸ್ಟರ್ ವಾಸಿಯಾಗಿದ್ದು, ಕ್ರೆಡಿಟ್ ಕಾರ್ಡ್ ವಂಚನೆ, ಫೋರ್ಜರಿ ಮತ್ತು ಇನ್ನು ಹಲವು ಕೇಸ್ನಡಿ ಜೈಲು ಸೇರಿದ್ದ. ಅಂದಹಾಗೇ, ಇವರಿಬ್ಬರೂ ನ್ಯೂಸ್ಪೋರ್ಟ್ ನ್ಯೂಸ್ ಜೈಲ್ ಅನೆಕ್ಸ್ನಲ್ಲಿ, ಒಂದೇ ಕೋಣೆಯಲ್ಲಿ ಇದ್ದರು.
ಸೋಮವಾರ ಸಂಜೆ ಕೈದಿಗಳನ್ನು ಲೆಕ್ಕ ಹಾಕುವಾಗ, ಇಬ್ಬರು ನಾಪತ್ತೆಯಾಗಿರುವ ವಿಚಾರ ಬೆಳಕಿಗೆ ಬಂದಿದೆ. ಅವರಿದ್ದ ಕೋಣೆಯನ್ನು ಪರಿಶೀಲನೆ ಮಾಡಿದಾಗ ಗೋಡೆಗೆ ಒಂದು ತೂತಾಗಿರುವುದು ಕಂಡುಬಂದಿದೆ. ಅವರು ಅದನ್ನು ಟೂತ್ಬ್ರಷ್ ಮತ್ತು ಲೋಹದ ವಸ್ತುವಿನಿಂದ ಮಾಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ಅಷ್ಟೇ ಅಲ್ಲ, ಕೂಡಲೇ ಅವರಿಬ್ಬರ ಫೋಟೋವನ್ನು ಪೊಲೀಸರು ಬಿಡುಗಡೆ ಮಾಡಿ, ಪತ್ತೆಗೆ ಸಹಕರಿಸುವಂತೆ ಸಾರ್ವಜನಿಕರಿಗೆ ಮನವಿ ಮಾಡಿದ್ದರು. ಹುಡುಕಾಟವನ್ನೂ ಶುರು ಮಾಡಿದ್ದರು. ಮರುದಿನ ಬೆಳಗ್ಗೆ ಅಂದರೆ ಮಂಗಳವಾರದ ಹೊತ್ತಿಗೆ ಇಬ್ಬರೂ, ಹ್ಯಾಂಪ್ಟನ್ನಲ್ಲಿರುವ ಐಎಚ್ಒಪಿ ರೆಸ್ಟೋರೆಂಟ್ನಲ್ಲಿ ಸಿಕ್ಕಿಬಿದ್ದಿದ್ದಾರೆ. ಪೊಲೀಸರು ಮತ್ತೆ ಅವರನ್ನು ಕಸ್ಟಡಿಗೆ ಪಡೆದಿದ್ದಾರೆ.
ಇದನ್ನೂ ಓದಿ: ನ್ಯಾಯಾಧೀಶರಿಗೇ ಕಾನೂನು ಪಾಠ ಹೇಳಿ, 250 ರೂ.ಕೊಡ್ತೇನೆ ಎಂದ ಏರ್ ಇಂಡಿಯಾ ಪ್ರಯಾಣಿಕ; ಜೈಲು ಶಿಕ್ಷೆ ವಿಧಿಸಿದ ಜಡ್ಜ್!
ಜೈಲಿನ ಗೋಡೆಯ ವಿನ್ಯಾಸವನ್ನು ಅವರು ಮೊದಲು ಅರಿತುಕೊಂಡಿದ್ದಾರೆ. ಬಳಿಕ ತಮ್ಮ ಕಾರ್ಯಾಚರಣೆ ನಡೆಸಿದ್ದರು. ಇನ್ನೊಮ್ಮೆ ಇಂಥ ಪ್ರಯತ್ನವನ್ನು ಯಾರೂ ಮಾಡದ ರೀತಿಯಲ್ಲಿ ನಾವು ಬಂದೋಬಸ್ತ್ ಮಾಡುತ್ತೇವೆ ಎಂದು ಪೊಲೀಸರು ಹೇಳಿಕೊಂಡಿದ್ದಾರೆ. ಅಷ್ಟೇ ಅಲ್ಲ, ಜೈಲಿನಿಂದ ಪರಾರಿಯಾಗಿದ್ದಕ್ಕೆ ಇಬ್ಬರ ವಿರುದ್ಧ ಹೆಚ್ಚುವರಿ ಕೇಸ್ ಹಾಕಲಾಗಿದೆ.