ಶಿವಮೊಗ್ಗ: ಇಲ್ಲಿನ ಬೈಪಾಸ್‌ ರಸ್ತೆಯಲ್ಲಿ ಬೆಳಗ್ಗೆ ೯.೩೦ರ ಹೊತ್ತಿಗೆ ಸಂಭವಿಸಿದ ಅಪಘಾತದಲ್ಲಿ ಮಹಿಳೆಯೊಬ್ಬರು ಪ್ರಾಣ ಕಳೆದುಕೊಂಡಿದ್ದಾರೆ. ಗಂಡನ ಜತೆ ಬೈಕ್‌ನಲ್ಲಿ ಹೋಗುತ್ತಿದ್ದಾಗ ಹಿಂಬದಿಯಿಂದ ಬಂದ ಲಾರಿ ಡಿಕ್ಕಿ ಹೊಡೆದಿದೆ. ಬೈಕ್‌ನಿಂದ ಉರುಳಿದ ಮಹಿಳೆ ನೇರವಾಗಿ ಸಿಲುಕಿದ್ದು ಲಾರಿಯ ಚಕ್ರಕ್ಕೆ. ಹೀಗೆ ದುರಂತ ನಡೆದಿರುವುದನ್ನು ಸಿಸಿ ಟಿವಿ ಕ್ಯಾಮೆರಾವೂ ಸೆರೆ ಹಿಡಿದಿದೆ.
ಸೈಫುಲ್ಲಾ ಮತ್ತು ಸಂಜಿದಾಗ ಬೈಪಾಸ್‌ನಲ್ಲಿರುವ ಯಮಹಾ ಶೋರೂಂ ಬಳಿಯ ನಿವಾಸಿಗಳು. ಅವರು ಮನೆಯಿಂದ ಹೊರಟು ಬಸ್‌ ನಿಲ್ದಾಣದ ಕಡೆಗೆ ಹೋಗುತ್ತಿದ್ದರು. ಆಗ ಬೈಪಾಸ್‌ ರೋಡ್‌ನಲ್ಲಿ ಲಾರಿಯೊಂದು ಹಿಂಬದಿಯಿಂದ ಬಂದು ಬೈಕ್‌ಗೆ ಡಿಕ್ಕಿ ಹೊಡೆದಿದೆ. ಡಿಕ್ಕಿಯ ಹೊಡೆತಕ್ಕೆ ಸಂಜಿದಾ ರಸ್ತೆಗೆ ಉರುಳಿ ಬಿದ್ದಿದ್ದಾರೆ. ಅವರು ಬೈಕ್‌ನಿಂದ ಉರುಳುತ್ತಿದ್ದಂತೆಯೇ ಲಾರಿಯ ಚಕ್ರ ಅವರ ಮೇಲೆ ಹರಿದು ಹೋಗಿದೆ. ದೇಹವೆಲ್ಲ ಪುಡಿ ಪುಡಿಯಾಗಿ ಮಹಿಳೆ ಸ್ಥಳದಲ್ಲೇ ಪ್ರಾಣವನ್ನು ಕಳೆದುಕೊಂಡಿದ್ದಾರೆ.
ದಂಪತಿ ಮನೆಯಿಂದ ಹೊರಟು ಕೆಲವೇ ನಿಮಿಷಗಳಲ್ಲಿ ಈ ಘಟನೆ ನಡೆದಿದೆ. ಅಂದರೆ ಶೋರೂಂ ಸಮೀಪದಲ್ಲೇ ಅವರ ಮನೆ ಇದೆ. ಶೋರೂಂನ ಎದುರು ಭಾಗದಲ್ಲೇ ಅಪಘಾತವೂ ನಡೆದು ಹೋಗಿದೆ. ದಂಪತಿ ಎಲ್ಲಿಗೆ ಹೋಗುತ್ತಿದ್ದರು ಎನ್ನುವುದು ತಿಳಿದುಬಂದಿಲ್ಲ. ಗಾಯಗೊಂಡಿರುವ ಸೈಫುಲ್ಲಾ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಚಿಕಿತ್ಸೆ ನೀಡಲಾಗುತ್ತಿದೆ.
ಇದನ್ನೂ ಓದಿ| ಬಳ್ಳಾರಿ ಬಳಿ ಬೈಕ್‌-ಕಾರು ಮಧ್ಯೆ ಅಪಘಾತ: ಸವಾರ ಸ್ಥಳದಲ್ಲೇ ಸಾವು, ಇಬ್ಬರಿಗೆ ಗಾಯ